1 SAMUEL 29 - PATHIAN LEKHABU THIANGTHO (BSI)

Philistinte’n David A Ngailonau

¹ Philistinte chun a sepaiteu zosia Aphek mun in a ko khawm un, Israelte chu Jezreel tuinâk mun in a kikul ua.

² Philistin mi liante chu a za têl leh a sang têl in a kizawt zung zung un; David tawh a sepaite chu Akhish nungdâl in a pang un;

³ Philistin sepai hotute chun, “Zia Hebraite hi bang bawl ding ah hung pang a hiu em?” a tiu a. Akhish in Philistin sepai hotute kiang ah chun, “Zia hi David, Israelte lengpa Saul suakte lak ah mi, zia ni bang jat leh kum bang jat a hem ka kiang ah um ahi tâk hi helo la hiu em? Ka kiang ah a hung um ah kipat tu’ni tiang hin a diklona ka mudok nai puai,” ti’n a dawnhu a.

⁴ Himaleh, Philistin sepai hotute chu a chung in a lungnau a, Philistin sepai hotute chun a kiang in, “Zia mipa hi a umna ding ah la piakna lam ah chun a chia kit mai hen, sawl kit inla; kido’na mun lam ah hin vang hung pan dâ mai uh hen; achutiloleh, kido’na mun ah chun hung langpan ziang kha tawl in au. Zia mipa hi a pu tawh hung kihotuak kit ziang thei lo ding ah la ngaituau a hem? Chutileh, I lubûk hi a khut ah um hi talo ding a hem?

⁵ Zia hi a kidawngtua ah lâm kawm ah La a sak uh: ‘Saul in a sangtêl a that in, David in a sîngtêl a that hi,’ a tiu David kha hilo a hem?” a ti tau hi.

⁶ Ziaphatchun, Akhish in David chu a ko ah, a kiang in, “Lalpa hinna sâl in ka gen hi: midik tak la hi’n, gâldona mun ah hung pawt ah, ka kiang ah hung lut kit dingin muanmawna neuchale ka hun nei puai. Ka kiang la hung tun ah kipat tu’ni tiang hin, nangma ah diklona bangma ka mu nai paw’ngâl in. Himaleh, zia miliante hin a hun ngaina puau hi.

⁷ Ziaziakchun, a la chia kit mai in; thamuang tak in a la chia kit inla, zia Philistin miliante lung nopmawna ding hin bangma bawl kin,” a ti tai.

⁸ David in Akhish kiang ah chun, “Aleh, bang ka hi’khial ah a hem? La nasêm ah ka hung pan lim ah kipat tu’ni tiang hin bang ka bawl ziak ah, ka lalpa, lengpa mêlmate do ding ah ei pansak theilo la hiu em?” ti’n a dawnhu a.

⁹ Akhish in David kiang in, “Ka mit mu in Pathian van sawlchakte gual khop ah demna bei la hi ti ka hia’i; himaleh, zia Philistin sepai hotute hin, ‘Kido’na chun ei hun zui dau hen,’ a ti ziak bep uh ahi.

¹⁰ Tu’hin, jingkal ma tak in tho unla, nang tawh la kitonpi la lalpa suakte cheng hi, la umna ding ua ka hun guat piakna mun lam in a la chia kit ziang tau in. Thu phalo kigen haw hi bangma’n ngai kin, ka mit mu in dik tak ah um la hi’ngâl a. Jingkal matak in kipandok unla, khawvak la muthei phat ua leh kipandok ziang un,” a tia.

¹¹ Tichun, David chu a lawite tawh jingkal matak in a kipandok un, Philistinte gam lam ah chun a kile’kit tau a. Philistinte chu vang Jezreel lam zuan in a kuan to tau hi.