1 SAMUEL 28 - PATHIAN LEKHABU THIANGTHO (BSI)

¹ Zia hun lai ah chun, Israelte do dingin Philistinte chun a sepaiteu a ko khawm tau a. Akhish in David kiang ah chun, “Nang tawh la sepaite hi gâl do ah kuan khawm ding I hiu ti la het ding ahi,” ti’n a gen a.

² David in Akhish kiang in, “A pha ngut hi, ziaphat chuleh la suak hin bang bawl thei ahi em ti hun he ta’n la,” ti’n a dawnhu a. Akhish in David kiang ah chun, “A pha ngut hi, ei vêng ah la pan ding ahi tai,” a ti tai.

Saul in Phunsânte A Dotna

³ Samuel chu a thi ta’n, Israelte zosia’n a sûn un, ama khawpi Ramah ah chun a vui tau a. Saul in phunsânte leh dawithiamte zosia chu a gam ah kipat in a la naw mang zawsa ahi tai.

⁴ Philistinte chu a kiko khawm tau ah, a hung kuan un, Shunem ah chun a kikul tau a. Saul inle Israelte zosia a ko khawm ah, Gilboa mun in a kikul tau a.

⁵ Saul in Philistin sepaite chu a mu phât in a lau ta’n, lauthawng tak in a kithing ziang tai.

⁶ Saul in Lalpa kiang ah thu a dot phatin, Lalpa‘n mang lam hileh, Urim hileh jawlneite mang inle a dawnhu ta puai.

⁷ Ziaphatchun, Saul in a suakte kiang in, “Numei dawithiam pakhat ka vakawm ah, ka dot theina dingin, ei kandaw piak tiam un,” a tia. A suakte chun a kiang in, “Endor ah dawithiam numei pakhat a um hi,” a ti tau hi.

⁸ Tichun, Saul chu a kisiam lamdang ah, puan chuam in a kithuam ah, pawsal pani tawh zia lam ah chun a chiau a. Jan in zia nu kiang chu a va tung un. A kiang in, “Dawi ei ho piak inla, a min ka hun gen pen pen chu ei ko daw piak tiam in,” ti’n a don a.

⁹ Numei chun, “Saul in a thilbawl, gam sung ah dawithiam leh âisân thiam zosia a sukmang sik sek dan haw zosia a la he ta ngei ding la hi’n. Aleh, ka thi’na ding leh, ka hinna awkna ding thâng bang ding ah ei kam piak la hiu em?” ti’n a la dawnhu a.

¹⁰ Himaleh, Saul in Lalpa min in a kiang ah chun kitiamna a nei ta’n, “Lalpa min in, zia chungchâng ah hin gawtna tuak lo ding la hi,” a ti tai.

¹¹ Ziaphatchun numei chun, “Kua ahi em ka hun kodaw piak ding chu?” ti’n a dong ah. Ama chun, “Samuel ei kodaw piak in,” ti’n a dawnhu a.

¹² Numei chun Samuel chu a mu phât in, aw ngai tak in a kikojak ziang ta’n; chuleh, Saul kiang ah chun, “Bang ding ah ei thêm la hi em? Saul chu lah la hi’ngâl in!” a tia.

¹³ Lengpa chun a manu kiang in, “Bangma lau kin; bang la mu em leh?” ti’n a dong ah. Ama chun Saul kiang in, “Lei ah kipat pathian tawh bang hung pawtdok ka mui,” ti’n a dawnhu a.

¹⁴ Saul in a kiang ah chun, “Bang gual mêl a pu em?” ti’n a dong ah. Ama chunle, “Teksepu pakhat a hung pawtdok in; puanâk chual ah kivan ahi,” ti’n a dawnhu a. Tichun, Saul in zia chu Samuel ahi ti a he ngâl ah; a mai ah leitual si’n chibai a bûk tai.

¹⁵ Ziaphatchun, Samuel in Saul kiang ah chun, “Bang ding ah ei subuai mai mai ding bep ah ei kodok la hi em?” a hun tia. Saul in, “Philistinte’n ei do un, Pathian in lah ei nusia ta’n; mang lam hileh, jawlneite mang inle ei dawnhu nuam ta pua’n, ka lung a kham ma ma phatin, nang in ka bawl ding ei hil lechin tia, hung ko ka hi,” ti’n a dawnhu a.

¹⁶ Samuel in, “Lalpa‘n nang hun nusia ah, la mêlma ah pang ahi tâk ziakin bang ding ah ei dong nalai la hi em?

¹⁷ Ka kiang ah a gen dungzui in, Lalpa‘n la chung in a hun bawl ta ahi; la lenggam chu la khut ah kipat in Lalpa‘n a hun lak piak in, la Invêngpa David kiang in a pia zaw ta ahi.

¹⁸ Lalpa thu la mang pua’n, Amalekte chung ah a lungnatna huaisia tak chu la sukpitin piak lo ziakin; ziaziak tak ah chun, tu’ni hin la chung ah zia gual hin Lalpa‘n a hun bawl ta ahi hih.

¹⁹ Zia bep chule hilo in, Lalpa‘n Israelte leh nang chu Philistinte khut ah pedok ding ahi tai; jing leh nang tawh la chapate, ka kiang hung tung ding la hitau hi; Israel sepaite chule Lalpa‘n Philistinte khut in pedok ding ahi tai,” a ti piak tai.

²⁰ Samuel thugen chu a het phat in, Saul chu a lau ma ma ziakin joitha hial in tual ah chun a kiseppai ta’n; a sun a jan ah bangma ne talo ahiziak in, tha ziang le a nei ta puai.

²¹ Numei chu Saul kiang in a hung ah, a lau ziak ahi ti a mu phât in a kiang in, “La suak hin la thu ka mang ah; ka thi leh ka thi ti’n la thu ka la ngai ta ahi.

²² Tu’hin, nang inle la suaknu thugen hi ngai in; an neucha hun luidaw piak ing ka. La chia kitna ding ah tha la neitheina ding in,” a tia.

²³ Ama chu nuam lo in, “Ne pua’ng ka,” a tia. Himaleh, a suakte tawh numeite kithua in a sawl tei tei un; a thu gen uh chu a hun mang khong ta’n. Tichun, lei tual ah kipat thodok in, lupna chung in a kichudok tai.

²⁴ Zia numei chun bawngno kivakthau pakhat a nei a. Kin tak in a that ah, changbuang a la’n, a dia ah, thawipanglo vaithum a kan piak a.

²⁵ Saul tawh a suakte âng in a luidaw piak ah, a netau ah. Ziaphatchun a kipandok un, zia jan ah chun a chia mang tau hi.