1 SAMUEL 26 - PATHIAN LEKHABU THIANGTHO (BSI)

David in Saul Hinna A Hoi piak Niveina

¹ Ziph mite chu Gibeah khua Saul kiang in a hung un a kiang in, “Jeshimon gâl tâng ah Hakhilah gam ah David kisêl ahi,” ti a vahil tau a.

² A kipandok ta’n; Israelte lak ah sepai doichuam sang thum pui in, Ziph Gamthip lam ah David hawl dingin a chia tau hi.

³ Saul chu, Jeshimon gâl ah Hakhilah tâng, lamlian pâm in a sepaite tawh a kikul ua; David ahileh, gamthip in a um zing hi. David in Saul, ama hawl in a hung hi ti a het phat in,

⁴ gâl entha dingin mi a sawl ah; tichun, Saul chu hung kuan tak tak ahi ti a hechian tai.

⁵ Kin tak in a chia ah, Saul tawh a sepai hotu lianpen Ner chapa Abner giana mun chu a vahawldok ah. A sepaite’n a ûm kîmvêl uh giabuk sung ah chun, Saul chu a lailung tak in a ipmu tai.

⁶ Ziaphatchun, David in, Hit mi Ahimelekh tawh, Zeruiah chapa Joab suapipa Abishai kiang ah chun, “Nang uh teni lak ah kua zawk la hiu em Saul giakna mun ah ei hung zui ding?” ti’n a dong a. Abishai in, “Ken hun zui ing ka,” ti’n a dawnhu tai.

⁷ Tichun, zia jan ah chun David tawh Abishai chu Saul giabuk in a va lut un; Saul chu a sepaite’n a ûm kîmvêl uh, a lailung ah thamuang tak ah ipmu leh a lutûn ah a cheicha lei ah kisunchang chu tawh a vamu tau a. Abner tawh a sepaite chu a kîmvêl in a ipmuu hi.

⁸ Abishai in David kiang ah chun, “Tu’ni hin Pathian in la mêlmapa chu la khut in a hun pia ta hi. Tu’ ma ma hin ama hi cheicha’n lei tual tawh kilden ziang ing ka; sut kit le ngai ta pua’n a,” a tia.

⁹ Himaleh, David in Abishai kiang ah chun, “That him him kin; Lalpa sathaunu’ chung ah khut tha chu thiammaw chang lo ah kua suakcha ding a hem?” ti’n a dawnhu a.

¹⁰ Chuleh, David in, “Lalpa hinna sâl in ka gen ahi: Lalpa‘n ama chu that na’n ah; ahiloleh, a hinkhua bei ni hung tung intin, gâlmun ah le a hinkhua la thei ahi.

¹¹ Lalpa sathaunu’ chung ah khut tha dingin Lalpa‘n ei phal puai; a lutûn ah a cheicha tawh a tuiûm kha hun la’n la chia tai ti,” a tia.

¹² Tichun, David in Saul lutûn ah cheicha tawh a tuiûm chu la’n a chia mang kit tau a. Kuama’n a mu puau ah, a he le umlo in, a khanglo le a um diak puau a. Lalpa‘n i-mut tuina a piak ziakin, tui tak in a ipmu chiat tau hi.

¹³ Ziazaw chun, David chu gâl langkhat lam in a gâlkai ah, gamla tak ah tângvûm chung in a dingdok ah, a kikâl uh gamla tawk tak ahi.

¹⁴ David in Ner chapa Abner tawh a sepaite chu a ko ah, “Abner, lei hun dawnhu thei diam?” a vak tia. Abner inle, “Lengpa hun ko chu kua la hi em?” ti’n a dawnhu a.

¹⁵ David in Abner kiang ah chun, “Israelte lak ah pawsal phapen hilo la hem? Bang ding ah la lalpa lengpa chu veng bit lo la hiu em? La lalpa, lengpa that dingin mi pakhat a hung hi.

¹⁶ La thilbawl dan hi a pha puai. Lalpa sathaunu’ la lalpa la venbit zaw lo ziakin a thitâk la hi, ti Lalpa min in ka hun hil hi. Tu’hin, vak en tiam in, lengpa lutûn ah a cheicha leh a tuiûm kha khoilam tung ahi tam?” ti’n a kiko khum tai.

¹⁷ Saul in David aw chu a vak hia’n, “Ka chapa David, zia chu nang aw hilo a hem?” a hun tia. David in, “Aw lengpa, ka lalpa, ka aw ahi;

¹⁸ bang ding ah ka lalpa‘n a suakpa hi tha gua delzui zing a hem? Bang ka hun law ah a hem? Ka khut in bang bawlkhial ka nei em?

¹⁹ Tu’hin, ka lalpa, lengpa chun a suak thugen hi a la ngai in. Keima thalupna ding ah hun tîl chu Lalpa ahi chun, a kiang ah kithoina thilpiak chu pom ta hen; himaleh, a hun tîl chu mihing ahileh vang, Lalpa ah kipat ka gochan ding lai nusia in, ‘Chia inla, pathian dangte na sêm in,’ ei ti ziakin tu’ni tiang ah del châkvai ah ei umsak ziakin, Lalpa ma ah hânsia law in um tau hen.

²⁰ Ziaziakchun, tu’hin vang, Lalpa âng ah ka thisan chu leitual in kiakthâk sak kin; keima uihik pakhat gual bep hi that dingin, Israel lengpa hial hi tânggam ah vavêng del gual ah ei del dingin a hung kuandok la hi chu lam,” a tia.

²¹ Ziaphatchun Saul in, “Ka chapa David hung kit in, ka la bawlkhial ta ahi; tu’ni hin ka hinkhua nang in lûl tak ah lei koi ziakin, bangma hun law ta pua’ng ka; ka la ngol ziakin, thil ka la bawlkhial nasa ta law ta ahi,” ti’n a hun dawnhu tai.

²² David in, “Aw lengpa, la cheicha zia tak ah hin a um hi. La tangvalte lak ah pakhat hung lâksak in.

²³ Lalpa‘n a dik leh ginum taphotte chu kipakman a pesek in; tu’ni’n la hinna Lalpa‘n ka khut in ei pia ta’n; himaleh, Lalpa sathaunu’ chung ah ka khut ka thanuam puai.

²⁴ Ka mit mu ah la hinna a lûl gual in, keima hinna le Lalpa mit mu in lûl hen la, lungkhamna zosia lak ah kipat in ei hukdok ta hen,” a ti tai.

²⁵ Ziaphatchun, Saul in David kiang ah chun, “Ka chapa David, maljawl in um ta’n. Thil lopi takte hun bawl inla, ziate ah chun lawting jel ta’n,” a hun ti tai. Tichun, David chu a chia mang ta’n, Saul chu a In lam in a chia kit tai.