1 SAMUEL 25 - PATHIAN LEKHABU THIANGTHO (BSI)

Samuel Thi’na

¹ Samuel a thi ta’n; ama sûn dingin Israel mite zosia a hung khawm tau a. Ramah khua a In mun ah chun a vui tau hi. Ziazaw chun, David a kipandok ah, Paran gamthip lam zuan in a chia suk tai.

David Tawh Nabal Ji Abigail

² Maon khua mi pakhat in, Karmel tâng ah gam a nei a. Zia pa chu mi hausa tak a hia; Belam sang thum leh kêlcha sang khat a nei a, Karmel ah chun a belam mul mêt in a um hi.

³ Zia pa min chu Nabal ahi’n; a ji min chu Abigail ahi. A ji chu numei pilthei tak leh mêlpha tak ahi’n, a pawsal chu vang mi thukhel leh lungthim neu ahi; ama chu Kaleb Inkuan ah mi ahi.

⁴ Gamthip ah kipat in David in Nabal chu belam mul mêt ahi ti a la he ta’n.

⁵ Tichun, David in tangval sawmkhat a sawl ah, a kiang un, “Karmel lam ah Nabal kiang in vachiau inla, ka min in chibai vabûk un.

⁶ Zia gual hin chibai vabawl unla: nang leh la Inkuante leh la nei zosia chung in thamuanna um ta hen.

⁷ La belam mulmêt in la hung hi ti ka la he hen; la belamchingte ka kiang in a um un, bangma ka law puau ah; chuleh, Karmel ah a um sung un bangma matsua a nei puau hi.

⁸ La tangvalte chu a la dong lechin hun hil thei in au. Ziaziakchun, ka tangvalte hi la doisakna hun pia’n, la luaithe ni khel khel ah ka hun sawl a hiu. Lungsiat tak in la suakte leh la chapa David hi la nei lam lam ei hun piau hen, vatiu in,” ti’n a sawl tai.

⁹ David tangval sawlte chu Nabal kiang a tun phat un, a thu vaithâk zosia chu David min in a gen tau a; tichun, a ngâk zing tau hi.

¹⁰ Himaleh, Nabal in David suakte kiang ah chun, David chu kua a hem? Jesse chapa la tiu chu kua a hem? Tu’lai ah hin suak a puteu ah kipat tai mang a tam tau hilam.

¹¹ Ka belam mul mêtte â ding ah ka vaithum, tui leh sate chu, khoilam ah kipat hung kuandok a hiu bawn ka hetlote kiang ah bang ding ah pia ziang ding ka hi em? ti’n a la dawnhu a.

¹² Tichun, David tangval sawlte chun a hun nusiau ah, a hung tun kit phat un a thugen zosia chu a hil tau hi.

¹³ David in a sepaite kiang ah chun, la kawng un la chemjam uh vop chiat un! a tia. Tichun, a chemjam uh a kawng un a vop chiat tau ah, David inle a chemjam a vop ah; sepai za li ding vel in David a zui un, za ni vel chu a vanteu vêng dingin a nusia tau hi.

¹⁴ A belam chingteu lak ah pakhat in Nabal ji Abigail kiang in thil um dan a la hil ah, Gamthip ah kipat in David in ka pu chibai bûk dingin palai a hun sawl ah, ka pu’n a la hosia ei vei.

¹⁵ A lak ua ka um lai ua khan, zia mite chu ka chung un a pha ma mau ah, bangma ei law lo in, gamlak ah ka chia mang sung unle bangma ka mansua kha puau a;

¹⁶ belam ching ah a kiang ua ka um sung siau ah khan, a sun a jan in ka kulbâng uh himai a hiu in.

¹⁷ Ziaziakchun, tu’hin zia chu hia’n la, la bawl ding dan ngaitua in; ka pu leh a Inkuante zosia chung ah thil phalo tak hung tung tawl in ah; ka pu lah a lungchom ziakin bangma genna thei ahi paw’ngâl in, a vati tau hi.

¹⁸ Ziaphatchun, Abigail in kin tak in vaithum za ni, zu thawl ni, belam panga sa kihaiminsa tawh, changpêl phâilel dim nga, grep-ho bawk za khat tawh theipi vaithum pei za ni chu sabiltung puaksak in,

¹⁹ a tangvalte kiang in, ka ma lam in a la chia pek unla, la nung un hung ding ka hi, a tia. Zia thilte chu a pawsal Nabal a hil puai.

²⁰ A sabiltung ah chuang ah a chia zing lai un, mual pang ah David tawh a sepaite chu amau lam zuan in a hung suk un; a kituakpi ta mai ua.

²¹ David in, zia mipa hin a thil neite gamthip ah pakhat chale mang lo ah chin piak in, ka la venbit uh hi vang a thawn a hita hilam; ka thilpha bawl piak a phalo ah ei dit kit ta hi!

²² Jingkal khawvak tiang ah, zia mipa thil neite lak ah pawsal khat ziangle hawi lo ah ka bawl lo tâk leh, Lalpa‘n David chung ah a khawk zaw’nle hun bawl mai hen, a la tisa ahi.

²³ Abigail in David a mu phât in, sabiltung chung ah kipat hung kum in, David ma-âng ah chun lei tual si’n a bokkhup ta mai a.

²⁴ A kengbul ah bokkhup in, David kiang ah chun, ka Lalpa, zia thilphalo hi kei ei ngaw inla; lungsiat tak in, la suak hi la kiang ah thu gensak inla, la suak thugen hi ngai tiam in.

²⁵ Ka Lalpa, zia mi umdan helo, Nabal hi bangma’n ngai dâ mai in; ama hi a min gual gual hi mai ahi; a min hi Nabal ahi gual ma’n, mingol ahi; keima la suak hin, ka Lalpa tangval hun sawlte kha ka la mu pua ahi.

²⁶ Tu’hin, ka lalpa, Lalpa hinna leh nangma hinna sâl in ka gen ahi; thisan sua lo ding leh nangma ngei in phuba la lo dingin Lalpa‘n a hun tûktân ziakin; tu’hin vang, la mêlmate leh ka lalpa chung ah thil phalo bawl gaw tapo chu Nabal tawh bang in um mai tau hen.

²⁷ Chuleh, tu’hin la suak in ka lalpa kiang ah thilpiak ding ah ka hun choite hi, ka lalpa nungzui tangvalte kiang ah hin piak hi hen.

²⁸ Lungsiat tak in, la suakpa bawlkhialna hi ngaidam in; ka lalpa hin Lalpa mêlmate do la hiziak in, Lalpa‘n ka pu Inkuan hidet in tin, la dam sung sia thil phalo him him kimu lo ding ahi ngâl a.

²⁹ Nangma thalup gua’n hun del in, hun châng tawl tawl ziang maleu le, ka lalpa hinna hi Lalpa la Pathian in a venbit dingte hinna tawh kân khawm intin; la mêlmate hinna chu vang vaisuangse chang gual in kikhawdok in au.

³⁰ Lalpa‘n ka lalpa chung ah thilpha bawl piak ding a la tiam zosia chu la chung ah a bawl ah, nang chu Israelte chung ah leng ah a hun pansak phat leh,

³¹ a ziak bei ah thisan la sua lo ziak leh, phuba la lâk lo ziakin, ka lalpa â dingin lungkhamna leh lungthim natna ding um talo ding a hi; chuleh, ka lalpa chung ah Lalpa‘n thilpha a hun bawl piak phat leh la suak hi ei hun hezing ta’n, ti’n a gen tai.

³² Ziaphatchun, David in Abigail kiang in, “Lalpa, Israelte Pathian, tu’ni ka mu ding ah nang hun sawlpa chu pâk in um ta hen!

³³ Tu’ni thisan sua lo ding leh ka khut ngei ah phuba ka lâk lona ding ah ei tutâng la ngaituana pha chu pâk in um hen la, nangma ngei chu pâkchâk in um ta’n!

³⁴ Lalpa, Israelte Pathian in nang hun suna lo ding ah ei tutâng dingin nang hi a hun sawl la hi hih; ka kiang ah kin tak ah hung lo hilechin, matheilo in jing khua hung vak leh Nabal chu, pawsal khat chale hawi lo ah hung that gam ding ka hiu,” ti’n a dawnhu a.

³⁵ Ziaphatchun, a thil hun puak haw chu a khut ah kipat David in a sâng tai; a kiang ah chun, “Thamuang tak in la In lam ah chia to kit ta’n; ngai in, la thugen ka ngai in, la thil dot ka hun lawtinsak ta ahi,” a ti tai.

³⁶ Abigail chu Nabal kiang a hung tung kit ah; ama chun lengpa gual ah a In ah luaithe’na thupi tak a siam lai tak ahi’n. Nabal chu zu a dawn kham ziakin, lungthim nuam tak in a la um ah; tichun, jingkal lam ah khawvak masang sia bangma a hil puai.

³⁷ Jingkal in, Nabal chu a zudawn kham le a hung pha ta’n; a ji chun thil um dante chu a hil phat in, a lungphût a chawl in, suangtum gual ah khawhelo in a um tai.

³⁸ Ni sawm ding vêl zaw ah chun, Lalpa‘n Nabal chung in a khut a tha ta’n; tichun, a thiden tai.

³⁹ David in Nabal a thi tai ti a het phat in, “Nabal in ei hosiatna thu ei ngaitua piak ah, a suak hi thil phalo bawl lo ding ah ei la tutâng Lalpa chu choihoi in um ta hen. Lalpa‘n Nabal chu a thil phalo bawl man a dit ta ahi,” a tia. Ziaphat ah chun, David in mi a sawl ah, Abigail chu a ji dingin a va hêlsak tai.

⁴⁰ David suakte chu Karmel ah Abigail kiang a vatun phat un, a kiang in, “David in a ji ding ah nang pui ding ah ei sawl uh ka hiu,” a tiu a.

⁴¹ Ama le a kipan ah, leitual si’n a bokkhup ah, a kiang un, “La suak uh hi ka lalpa suakte keng sil piak ding ah kilawm bep ka hi hilam,” a tia.

⁴² Abigail le kin tak in a kipan ah, a sabiltung ah chuang in a chia tai; a suak numei panga’nle a zui tau a. David palai sawlte nung chu a zui pek ah; tichun, David tawh a kicheng tau hi.

⁴³ David in Jezreel mi Ahinoam le a la kichenpisa ahi’n; tichun, a paniu in ji’n a nei kop tai.

⁴⁴ Saul chanu, David ji Mikhal kha, Gallim ah um Laish chapa Palti tawh a la kichensak man tai.