1 SAMUEL 24 - PATHIAN LEKHABU THIANGTHO (BSI)

David in Saul Hinna Hawi

¹ Saul chun Philistinte vadel a hung tun kit phat ah chun, “Engedi mun bit lam ah David a um hi,” ti a hil ua.

² Saul chu, Israelte lak ah têldaw sepai sang thum tawh, David leh a lawite hawl dingin sakêl kawl lam in, a chia tau hi.

³ Lamlian pâm ah belam huang kiang a tung un, a kiang ah chun kawlhawm pakhat a um ah; Saul chu zia tak ah chun a vadâilêng a. Zia kawlhawm sunggil lam tak ah chun, David tawh a sepaite a la kichutkhawm lai tak uh ahi.

⁴ David sepaite chun a kiang in, “Tu’ni hivang Lalpa‘n la kiang ah, ‘La gâlte chu la khut ah hun pia’ng ka tin, la nop nop la law ding ahi,’ ti ah a genna hun chu hung tung a hita hi,” a tiu a. Ziaphatchun, David awlchân a chia ah, Saul puanâk chual mong neukhat a va âttha tai.

⁵ David in Saul puanâk chual mong a va âtthak ziak ah chun a vainung in a hung lauthawng ma ma hi.

⁶ A sepaite kiang ah chun, “Lalpa sathaunu’, ka hotu ahi ziakin, Lalpa sathaunu’ chung ah ka khut neuchale tha lo dingin Lalpa‘n ei vêng ta hen,” ti’n a gen a.

⁷ Tichun, David in a sepaite chu nasa tak in a tho tâng ah, Saul chu that ziang dingin a phal him him ta puai. Tichun, Saul le a kipandok ah, ma lam zuan in a chia tai.

⁸ A nung ah chun David le a kipandok ah, kawlhawm ah kipat chun a pawtdok ah, Saul chu a vak gâl ko ah, “Ka hotupa, lengpa!” a ti’n. Saul in a et phatin, David in leitual si’ bokkhup in jana a pia tai.

⁹ David in Saul kiang ah chun, bang ding ah la kiang ah, David in hun thalup gua ahi, tite thugen taksang ziang la hem?

¹⁰ Tu’ni ma ma hin la hinna Lalpa‘n kawlhawm ah khan ei la pia ta ahi, ti la mit ngei in la mu tai; mi khenkhat in that ziang in ei tiu ah; ahi’n, la hinna ka hawi piak la hi. A kiang un, ka hotupa chung in ka khut tha pua’ng ka, ama chu Lalpa sathaunu’ ahi ngâl in, ka ti ahi.

¹¹ En in, he pa, la puanâk chual mong ka khut ah um hi; nang in tha dingin ei hawl vêl ziang malechin le, nang hun that lo ah, la puanâk chual mong ka âtthak thei ah kipat hin, la chung ah khut thanuam lo ka hi’dan hethei in la.

¹² Nang leh kei kikâl thu Lalpa‘n vaihawm mai ta hen! La chung ah ka khut ka thâk lo ziak hin a nop leh Lalpa‘n ka chung ah phuba la zaw mai hen!

¹³ Malai thupil in, thil phalo chu mi phalote’n a bawl sek ui, a la tiu ah; ka khut hivang la chung ah tha lo ding ka hi.

¹⁴ Israel lengpa chu kua do ding ah kipan a hem? Kua a hem la del tawl tawl chu? Uicha thisa hilo maw? Thosi del la hi em leh?

¹⁵ Ziaziakchun, nang tawh kei chungchâng ah hin Lalpa‘n vaihawm hen la, a dik leh a maw khen ta hen. Enchian hen la, ei panpi in, nang ah kipat in ei hukdok ta hen! ti’n a gen tai.

¹⁶ David in zia thute chu Saul kiang ah a gen zaw phatin, Saul in, ka chapa David, zia thugen chu nangma aw ahi em? a tia. Saul chu ngai tak ah kiko in, a kap tai.

¹⁷ David kiang ah chun, “Kei sâng in nang la dik zaw ma ma hi; keima’n phalo tak ah hun bawl ka guat lai inle nang in thilpha’n lei dit hi.

¹⁸ Tu’ni ka hinna Lalpa‘n la khut ah a hun piak lai inle ei that lo ah, pha tak ah lei khawtua dan lei etsak zaw ta’ngâl a.

¹⁹ Zia gual chun min a mêlma sikha leh, kua a hem dam tak ah tha’suak kit ding? Tu’ni ka chung ah la thilbawl phat ziak hin, Lalpa‘n phatna’n hun vuk ta hen.

²⁰ Tu’hin vang nangma chu leng ah hung pang ding la hi, ti leh, Israel lenggam hi nangma khut ah tundin hung hiding ahi ti ka hechian tai.

²¹ Ka nung ah ka suan leh pâk hung um dingte sumangthai lo ding leh, ka pa Inkuan ah mite lak ah kipat ka min thaimang lo dingin Lalpa min in thutiam ei bawl piak in,” ti’n a don a.

²² Tichun, David in Saul kiang ah chun thu a tiam a. Zia phat ah chun Saul chu a In lam in a chia kit ta’n; David tawh a sepaite chu vang kul lam zuan in a chia to tau hi.