1 SAMUEL 23 - PATHIAN LEKHABU THIANGTHO (BSI)

David in Keilah Khawpi A Hukdawna

¹ David kiang in, “Keilah khua chu Philistinte’n a do un, a phual ua bute chu a lâkpiak ui,” ti’n a hil tau a.

² David in Lalpa a dong ah, “Zia Philistinte chu do ah chia ding ka hem?” a tia. Lalpa‘n David kiang in, “Chia inla, Philistinte chu vado inla, Keilah khua chu va hukdok in,” a hun tia.

³ Himaleh, David sepaite chun a kiang in, “Ngaitia, zia Judai gam ah um hi bawn kilau ma ma ah, Keilah khua Philistin sepaite I vado nâk lai vang ua leh lau um ta law lo ding a hem?” a ti tau a.

⁴ Ziaphatchun, David in Lalpa a dong kit ah, Lalpa chun, “Keilah ah chun chiau in; Philistinte chu la khut ah hun pia ding ka hi’ngâl a,” ti’n a hun dawnhu a.

⁵ Tichun, David tawh a sepaite chu Keilah ah chun chia in, Philistinte chu a vado tau ah; a ganchateu chu lak piak in, tam tak a that tau a. Tichun, David in Keilah khua chêngte chu a hukdok tai.

⁶ Ahimelekh chapa, Abiathar in Keilah lam ah David kiang ah a jam lai ah chun, thiampu puanâk Ephod pakhat a la paw tung a.

⁷ David chu Keilah khua’n a chia hi ti Saul a hil un. Chuleh, Saul in, “Khawpi kulpi leh thik dâi ah ki-ûm sung ah hung tai lut ahileh, David chu Pathian in ka khut ah ei pia a hita chu,” a ti’n.

⁸ Saul chun, Keilah lam ah chia suk ah, David leh a lawite zosia vaman dingin, a sepaite zosia chu a ko khawm a.

⁹ David in ama do ding ah Saul hung kuan ding ahi ti a la het phat in, thiampu Abiathar kiang in, “Thiampu puanâk Ephod kha hun la tiam in,” a tia.

¹⁰ David in, “Aw Lalpa, Israelte Pathian, la suakpa hin keima ziak ah Keilah khua do ding ah Saul hung kuan ding ahi ti ka la he hen.

¹¹ Aleh, tu’hin la suak in ka la het gual in, Saul chu hung kuan suk tak tak ding ahi diam? Aw Lalpa, Israelte Pathian, la suakpa hi ei hil dingin ka hun don hi,” a tia. Lalpa‘n a kiang in, “Hung kuan suk ding ahi,” ti’n a dawnhu hi.

¹² Ziaphatchun, David in, “Aleh, Keilah khua mite hin, keima leh ka sepaite hi Saul khut in ei pedok diam uh?” ti’n a dong a. Lalpa chun, “Hun pia ding a hiu,” a hun ti tai.

¹³ Ziaphatchun, David tawh a sepaite, mi za guk ding vel chu a kipandok un, Keilah khua a nusia tau a; a chiatheina lam lam un a vâkvai tau a. Keilah khua David in a nusia tai ti Saul a hil phat un, a do ding ah kuan a guat uh chu a haisan tau hi.

¹⁴ David chu Ziph Gamthip tânggam ah kawlhawm ah chun a um den ah, nisi’n leh Saul in a hawl zel ah; himaleh, Lalpa ‘n ama chu Saul khut in a pedok puai.

Gamthip ah David in Saul Kilepdawsan

¹⁵ Saul in thalup dingin a hawl zing hi ti hezing in, David chu Ziph Gamthip ah Horesh mun in a um hi.

¹⁶ Saul chapa Jonathan chu Horesh ah David kiang in a hung a; zia tak ah chun Lalpa‘n a khut a suk-hat piak a.

¹⁷ David kiang ah chun, “Lau him him kin; ka pa Saul in hun mai kha ngai ngai lo ding ahi’n; nang hi Israelte chung ah leng ah pang ding la hi; zia tak chuleh, nang zathuap ah pang ding ka hi; ka pa Saul inle zia gual chu hung hiding la hi, ti a henai,” a tia.

¹⁸ Tichun, amau teni chun Lalpa âng ah thuthung a siam un; David chu Horesh ah a um den ah, Jonathan chu In lam in a chia kit tai.

¹⁹ Ziaphatchun, Ziph gam ah mite chu Gibeah khua Saul kiang in a vachiau ah, “David chu Jeshimon simlam ah Hakhilah tânggam Horesh kawlbûk ah, kei haw lak ah hung kisêl ahi.

²⁰ Tu’hin, aw lengpa, la hung suk nop phat phat leh hung ziang in; ama chu lengpa khut ah hun pedok ding ka hiu,” ti’n a vagen tau hi.

²¹ Saul in a kiang un, “Lei khawtua ziak un Lalpa‘n hun maljawl ta hen!

²² Chiau inla, kuale ama leh umna mu kha a um uh em ti hun hechian un; ama hi pilvâng ma ma ahi ti min ei hil uh ahi.

²³ A kisêlna mun leh a panna mun zosia vahechian unla, la vahetchian zaw phat ua leh hung kit un. Ziaphat chuleh, kiton hi tiu in, zia bial ah chu um nalai a hinâk leh, Judah mi a sâng têlte lak ah kipat chun hawldok na’ng ka,” ti’n a gen tai.

²⁴ Ziaphatchun, a kipandok un, Saul ma-âng in Ziph lam ah chun a chia tau a. David tawh a sepaite chu Jeshimon simlam, Maon Gamthip ah Arabah lam ah um a hiu.

²⁵ Saul tawh a sepaite a hawl in a kuan tau a. Zia thu chu David a hil phat un, Maon gamthip ah suangpi kawm lak ah kisêl dingin a chia suk a. Zia chu Saul in a het phat in, Maon gamthip ah chun David a delzui pek a.

²⁶ Saul chu tângpang langkhat lam in a chia ah, David tawh a sepaite chu tângpang langkhat lam in a pang un. Saul tawh a sepaite’n David tawh a sepaite chu man ziang thei ta ding ah a ûm kîmvêl phat un, David chu kin tak ah Saul ah kipat jam mang ding a guat lai tak in,

²⁷ Saul kiang ah thangko pakhat a hung ah, a kiang in, “Kin tak in hung in; Philistinte’n I gam uh a hung bulu tau hi,” a hung tiu a.

²⁸ Tichun, Saul in David chu delzui talo in, Philistinte do dingin a kile’kit zaw tai; ziaziakchun, zia mun chu Suachâtna Suangpi ti min a sak tau hi.

²⁹ Zia mun ah kipat chun David a pawtdok ah, Engedi mun bit lam in a chêng den tai.