1 SAMUEL 22 - PATHIAN LEKHABU THIANGTHO (BSI)

David Tawh A Nungzuite Adullam Tunna

¹ David in zia tak chu nusia in Adullam kawlbûk lam in a taidok ta; a suapite leh a chanaute zosia’n a het phat un, zia mun ah chu ama mu dingin a chia suk tau a.

² Mi lungdongte, leiba neite leh a lung awi lo taphot a hung khawm un; amau lak ah hotu’n a hung pang tai. A kiang ah umte chu za li lam hial a ting tau a.

³ Zia tak ah kipat chu David pawtdok in, Moab gam ah Mizpeh a tung a. Moab lengpa kiang in, “Pathian in kei â ding ah bang ei hun bawl piak ding a hem ti ka het masang sia, lungsiat tak in ka nu leh pa la kiang ah hung uh hen la, la kiang ah hung um tadi leu ti ah hung don ka hi,” a vatia.

⁴ Moab lengpa kiang ah um dingin a nusia ah, David chu a kul lam a chun a vaum kit tai.

⁵ Ziaphatchun, jawlnei Gad in David kiang in, “Kul ah chun um den ziang kin; pawtdok inla, Judai gam ah chia in,” a hung tia. Tichun, David a pawt kit ah, Hereth gammâng lam in a chia tai.

Nob Ah Thiampute Saul in A Thalupna

⁶ Saul in David tawh a lawite umna mun a hun hedok ta. Saul chu a cheicha chawi zing kawm ah, Gibeah tânggam ah mangge thing bul lîm in a kitung ah; a sepaite chu a kîmvêl in a ding zing ui.

⁷ Saul in a kiang ah ding sepaite kiang ah chun, “Ngai un, nanghaw Benjaminte haw, Jesse chapa hin lou leh grep huante hun pia’n, sepai sang khat chung ah te, za têl chung ah te hotu hun siam ding a hem?

⁸ Zia chu kineppi ah ka chung ah thil phalo bawl gua hilo la hiu em? Ka chapa leh Jesse chapa hin kitiamna thuthung a siam ui ti ei hil pakhat chale la um puau a. Ka chapa hin kei ei changgu ding ah ka suakpa panpi in, tu’ni tiang hin kuama ei lungkhampi le la um puau a,” ti’n a gen a.

⁹ Edom mi Doeg, Saul suakte chung ah hotupa chun, “Jesse chapa kha Nob khua, Ahitub chapa Ahimelekh kiang in a hung ka la mu’n;

¹⁰ a chungchâng thu Lalpa kiang in a dot piak ah, nêk leh châkle pia’n, Goliath chemjam kha le a la piai,” ti’n a dawnhu a.

¹¹ Lengpa Saul chun, Ahitub chapa Ahimelekh tawh a Inkuan un, Nob khua thiampute zosia chu a ko khawm ah; a leng un lengpa kiang in a hung khawm tau a.

¹² Saul in a kiang in, “Tu’hin ngai in, nang Ahitub chapa,” a tia. Ama chunle, “Ka Lalpa, zia hin ka um hi,” ti’n a dawnhu a.

¹³ Saul in a kiang in, “Bang ding ah nang tawh Jesse chapa hin ka siatna ding vaisawm ah, vaithum tawh chemjam la piak tawh, ama â ding ah Pathian la dot piak nalai ah; tu’ni tiang ah hin ei thalupna ding lemchâng hawl a hita hilam?” ti’n a gen hi.

¹⁴ Ziaphatchun, Ahimelekh in lengpa chu a dawnhu ah, “La suakpa David gual tuk ah ginum kua dang a um em? Ama chu lengpa mâkpa le hi, a bawl ding la ti taphot bawl ziang leh, la Insung ah mi za-um ahi nalai a.

¹⁵ Tu’ni bep ah hi ama â ding ah Pathian ko piak ei sa la hem? Hinaisai lo ahi! La suakpa leh ka Inkuanpite pakhat cha hile Lengpa hin ei ngaw him him kin; zia thu chu la suakpa hin bangma hetkhâk ka nei puai,” a tia.

¹⁶ Lengpa chun, “Ahimelekh, nang leh la Insung mite thigam ding la hiu,” ti’n a gen a.

¹⁷ Lengpa chun ama vêng ah pang, a kiang ah dingte kiang ah chun, “Kihei unla, Lalpa thiampute chu that un, David tawh kithukop a hiu; a jam ahi ti he ngâl in ei hil puau hi,” a tia. Himaleh, lengpa sepaite chun Lalpa thiampute chung in a khut uh a tha ngam puau hi.

¹⁸ Ziaphatchun, lengpa chun Doeg kiang in, “Nang Doeg, kipan in la thiampute chu that in,” ti’n a sawl ah. Edom mi Doeg le a kipan ah, thiampute chu a that in; zia ni chun thiampute puanâk Ephod âk ngen mi sawmgiat leh nga a that a.

¹⁹ Thiampute khawpi Nob chule a vabulu ah, numei, pawsal, a lian, a neu, bawngchal, sabiltung leh belam natiang in chemjam in a that gam suak tai.

²⁰ Himaleh, Ahitub chapa Ahimelekh chapate lak ah pakhat, a min Abiathar chu a suakcha’n, David a zui tai.

²¹ Abiathar in David kiang ah chun, Saul in Lalpa thiampute a thalup dan chu a hil tai.

²² David in Abiathar kiang in, “Zia ni khan Edom mi Doeg a um hi ti ka het ah kipat khan, Saul chu vahil ngei ngei in ah ti chu ka ngaituasa mawng ahi. La Inkuanpite zosia chung ah thil tung hi kei mawna ahi.

²³ Ka kiang ah um den inla, lau kin; ka hinna hawlpa hin nang hinnale a hun hawl hi; ka kiang ah um lechin bit ding la hi,” ti’n a gen tai.