1 SAMUEL 21 - PATHIAN LEKHABU THIANGTHO (BSI)

David Leh Vaithum Thiangtho

¹ David chu Nob khua thiampu Ahimelekh kiang in a hung a. Ahimelekh chu lau ah kithing kawm kawm in David lamtua dingin a hung ah; David kiang in, “Bang ding ah nang ngawn ah hung ah, mi pakhatle la hun pui lo a hem?” ti’n a la dong a.

² David in thiampu Ahimelekh kiang ah chun, “Lengpa’n thil pakhat bawl dingin ei sawl ah; ka kiang in, ‘Ka hun sawlna thu leh la bawl ding ka tite hi kuama’n a hetlo ding a hi,’ ei tia. Tangvalte le zia bawl ding ah chu mun chuam chuam ah ka sawlmang ahi.

³ Tu’hin bang la nei em? Vaithum panga a hem, la nei nei chu ei pia mai in,” a tia.

⁴ Thiampu chun David kiang in, “Vaithum vantang ka nei pua’n, vaithum thiangtho chu vang a um hi; la tangvalte chu, numei lak ah kipat kikoi thiangtho a hiu leh zia vaithum chu hun pia thei ing ka,” ti’n a dawnhu a.

⁵ David in thiampu kiang ah chun, “Gâl do ding ah ka kuan si’n ua leh, numei lak ah kikoi thiangtho zosa ngen ka hiu ah; nasep vantang ding ah ka kuan tak uh le bawn tangvalte hi kikoi thiangtho sek ka hiu leh, tu’ ah na poimaw tak nei ah hung kuante vang vang hi bang gual bep in a thiangtho ta ding awm?” ti’n a dawnhu tai.

⁶ Tichun, Umpi zing vaithum, Lalpa ma ah lakdaw ahi’phat si’n leh a thak, a salum ah kitheng zing sekte tilo chu umlo ahi ziakin, thiampu chun a pê tai.

⁷ Zia ni chun, zia mun ma ma ah chun Saul suakte lak ah mi pakhat, Lalpa ma ah a la châm nalai a um ah; ama chu Moab mi Doeg, Saul belamchingte lak ah hotupa chu ahi.

⁸ David in Ahimelekh kiang ah chun, “La kiang ah cheicha a hem, chemjam a hem bêk umlo a hem? Lengpa thupiak a chan-gang tâkluat bêk ziakin ka chemjam hi’n, ka gâlvan hileh, khat chale hun chawi manlo ka hi,” a tia.

⁹ Thiampu chun, “Philistin mipa, Elah phâijawl ah la thalup Goliath chemjam kha, puan ah pha tak ah kituam, Ephod sung ah kikoi a um hi; zia tilo chu a dang khat chale umlo a hiziak in, la dawi leh kilâk in,” a tia. David in, “Zia khel tha chu um ding a hem, ei hun pia’n,” a ti tai.

Gath Lam ah David Jamna

¹⁰ Zia ni chun Saul ah kipat in David a jam ta’n; Gath khua lengpa Akhish kiang in a chia hi.

¹¹ Akhish suakte chun, “Zia hi gam khat ah lengpa David kha hilo a hia hem? Lâm kawm ah kidawngtua ah La a sak uh: ‘Saul in a sangtêl a that in, David in a sîngtêl a that hi,’ a tiu kha ama hi a tiu hilo a hem?” a la tiu a.

¹² David in zia thu chu pha tak in a tepte ah, Gath khua lengpa Akhish chu a kicha ma ma ziang hi.

¹³ Tichun, a ma-âng ua chun a umdan a sudanglam ah; a mu’nau ah chun a ki-ngolsak tai. Kulkotkhak kijemnate po chu a khuat ah, a khamul ah a zelphuan a kaisak jeng jung a.

¹⁴ Akhish in a suakte kiang in, “En tiam un, zia pa hi mingol ahi; bang ding ah ka kiang ah la hun puilût uh a hem?

¹⁵ Mingol tasam ah, zia mipa hile a ngol dan taklang ding ah la hun pui uh ahi em? Bang ding ah zia gual mihing hi ka In ah hung lutsak gua la hiu em?” ti’n a gen tai.