1 SAMUEL 20 - PATHIAN LEKHABU THIANGTHO (BSI)

David Leh Jonathan Kivoptheina

¹ David chu Ramah lam ah Naioth ah kipat in a taimang ah. Jonathan kiang in a hung ah, a kiang in, bang ka bawl ziak a hem? Bang a hem ka gitlona? La pa chung ah le bang bawlkhial ka nei ah, thalup ding ei guat a hem? ti’n a dong a.

² Jonathan in, Chuti maijenlo e! Thi lo ding la hi. Ka pa’n a thilbawl ding zosia, a lian a neu, ei hil lo in bangma a bawl ngai puai; zia gual thu chu um hileh ka pa’n ka kiang ah îmlo hial ding ahi. Zia gual chu hi him him pua’n a! ti’n a dawnhu a.

³ Himaleh, David in kitiam hial in, la pa hin lei ngainat hi a he chutiloleh, lungngai kha’n ah, a ti hiding ahi. Himaleh, a dik tak ah gen in, Lalpa leh nangma hinna sâl in ka hun hil ahi, thi’na tawh ka kikâl uh hi kãl khat bepcha ahi, ti’n a dawnhu a.

⁴ Jonathan in David kiang in, bang hiziang lehle la gen taphot hi’piak ing ka, a tia.

⁵ David in Jonathan kiang ah chun, Jing hi thathak kût ni hiding a hita’n, lengpa kiang ah an ka nêk lo thei lo hiding a hi’n; himaleh, gamlak ah jan thum vakisêl ing ka.

⁶ La pa’n ei hawl ah ei mu lo phat leh, kum si’n ah a Inkuan ua kithoina pang dingin David in a khawpiu Beth-lehem ah chia ding ka hi, ti’n a don ah ka la chiasak ahi, a la tin la.

⁷ A pha chu, a tileh la suak hi thamuang intin; a lungnat leh vang, ka chung ah thil phalo bawl gua ahi ti he ziang in.

⁸ Ziaziakchun, la suak kiang ah thu a tak tak ah la tiam tâk ziakin, pha tak in bawl in. Ahi’n, thil bawlkhial ka hileh vang nang in ei that ziang in; bang ding ah la pa kiang ei tut khel khel ding la hi em? ti’n a gen a.

⁹ Jonathan in, zia gual chun vang gêl him him kin! Ka pa’n la chung ah thil phalo bawl gua ahi he leng, bang ding ah hun hil lo mai jen ding ka hi em? ti’n a dawnhu a.

¹⁰ Ziaphatchun, David in Jonathan kiang in, la pa’n lungna tak ah hun dawnhu ahi ti kua’n ei hil ding a hem? a tia.

¹¹ Jonathan in David kiang ah chun, hung in, gamlak ah vachia hi ti, a tia. Tichun, a paniu in gamlak in a vakdok tau hi.

¹² Jonathan in David kiang in, Lalpa, Israelte Pathian in he ta hen! Jing jingkal a hem, a jingkal thumna a hem ah, zia thu hi ka pa kiang ah ka gen ah; David chung ah a lungdam leh, la kiang ah gen dingin palai hun sawl lo in um thei ding ka hem?

¹³ Himaleh, ka pa chun la chung ah thil phalo bawl gua ahileh vang, nang kiang ah ka hun hil lo ah, la bitna ding ah hun sawl mang lo ah ka um chun, Lalpa‘n Jonathan chung ah a khawk zaw sêm inle bawl mai zaw hen. Ka pa a la umpi gual in Lalpa chun hun umpi zing ta hen.

¹⁴ Chuleh, ka dam nâk lai ahi chun, Lalpa hepina ginum tak chu ei musak inla, ka thi ahileh la,

¹⁵ David mêlmate zosia lei chung pumpi Lalpa‘n a thagam nung inle, ka Inkuante chung ah la ginumna sulang zing in aw, ti’n a gen a.

¹⁶ Tichun, Jonathan in David Inkuante tawh a kikâl un thuthung siam in, zia gual hin a gen ah, “Lalpa‘n David mêlmate chung ah phuba la ta hen,” ti in.

¹⁷ Jonathan in ama hinna tuk ah David chu a lungsiat ziakin, a kiang in thuthung a siam tai.

¹⁸ Jonathan in a kiang in, “Jing hi thathak kût ni hiding ahi’n; nang la umlo ding ziakin an nêk phat leh la panna awng ta ding ahi.

¹⁹ Jing kit leh chia suk kit nalai inla, la kisêlna masa lam ah khan chia suk inla, zia tak ah Ezel suangpi pang ah khan a la um zing in.

²⁰ Kungmui kâp gual in zia lam ah chun thalchang thumvei hun kâp ing ka tin.

²¹ Ziaphat chuleh, tanglak pakhat hun sawl ing ka tin, ‘Chia in la, thalchang vahawl in,’ hun ti’ng ka tin. Tanglak kiang ah, ‘En in, thalchang chu nang lam kâi ah hin a chu hen, vala khawm in,’ ka hun ti ahileh la hung ziang ding ahi. Zia chu Lalpa hinna sâl ah, nang â ding ah lau umlo ah bit ding la hi, ti’na hiding ahi.

²² Himaleh, tanglak kiang ah chun, ‘En in, thalchang chu nang khêl lam ah chu ahi,’ ka hun ti ahileh vang, la tai mang mai ding ahi; zia chu Lalpa‘n a hun sawlmangna hi mai in a.

²³ Zia thu ah I kitiamna chungchâng ah hin, Lalpa chu ei te ni kikâl ah hiatpitu hita hen,” ti’n a gen tai.

²⁴ Tichun, David chu khûl lak ah chun a vakisêl tai. Thathak kût a hung hi’phatin, lengpa chu luaithena an ne dingin a hung ta’n,

²⁵ lengpa chu a chutna ngai, bâng bul ah chun a kichu ta’n. Saul kiang ah Abner a kichu’n, Jonathan chu a kiang un a ding zing ah; David chutna ding chu a awng in a um tai.

²⁶ Zia ni chun Saul in bangma a gen pua’n; “Bangti a hem khat ah um le hi’ntin, a thian lo ziak le hi kha maw pua’n ah; a thianglo himle ahi,” ti’n a ngaitua a.

²⁷ Himaleh, a jing ah thathak kût zaw phat ah chunle David chutna chu a awng in a um nalai a. Saul in Jonathan kiang in, “Jesse chapa hi ja’ni leh tu’ni tiang ah, bang ziak ah luaithe’na hung pang lo ahi em?” ti’n a dong a.

²⁸ Jonathan chun Saul kiang in, “David in Beth-lehem ah ei chiasak in ti’n ei don ngût ngût a;

²⁹ ‘Ei chiasak in; ka khawpiu ah Inkuan kithoina bawl ding ka hiu in; ka suapipa’n, La hung pan tei tei ding ahi ei ti hen, la mittung ka hinâk chun, ei chiasak inla, ka suapite vamu’ng ka,’ a tia. Zia thu ziak ah chu lengpa luaithe’na dawkan ah hi hung pang lo ahi,” ti’n a dawnhu tai.

³⁰ Ziaphatchun, Saul chu Jonathan chung in a lungna ma ma ah; a kiang in, “Nang, numei dukdak lo leh lochalnu chapa hin, Jesse chapa kha nangma leh la nu sukmualphona ding ah la la têl a hi ti he lo ah lei bawl a hem?

³¹ Jesse chapa hi lei ah a dam sung sia, nang hin, la lenggam hileh sukdet in um pua’n ah; a kin thei pen in vakosak inla, hun pui lût in; a thi lo tâk leh aw!” ti’n a dawnhu a.

³² Ziaphatchun, Jonathan in a pa Saul kiang ah chun, “Bang ding ah ama chu thalup ding la guat a hem? Bang a susia a hem?” ti’n a dawnhu tai.

³³ Saul in Jonathan kiang ah David a vatha’na dingin a thalpi chu a pia’n; tichun, Jonathan in a pan David tha tei tei gua ahi, ti chu a hechian tai.

³⁴ Jonathan chun David a lungsiat ziak ah a pan a sukmualpho ziakin, a lung a na ma ma ah; zia tha a ni ni ni’ chun an ne lo in a pawtdok tai.

³⁵ A jingkal kit ah chun, Jonathan chu gamlak ah David tawh a kitiam hun chet uh khan, tanglak pakhat tawh a vachiau a,

³⁶ tanglak kiang ah chun, “Tai inla, ka thalchang kâpdawte chu la vahawl ding ahi,” ti’n a sawl a. A tai phat ah chun a khêl lam ah thalchang a kâp a.

³⁷ Tanglak chun Jonathan thalchang a kâpna mun a tun phatin, Jonathan in tanglakpa chu a vak ko ah, “Thalchang in la khêl lam pek kâp hilo a hem?” a vak tia.

³⁸ Jonathan in tanglakpa chu a nung ko ah, “Kin tak in hung kit in,” a tia. Tichun, Jonathan in tanglak a sawlpa chun thalchangte chu luak khawm vak in, a pu kiang lam in a hung tai kit a.

³⁹ Tanglak chun bangma a hepua’n, Jonathan tawh David bep in a thil guanggal uh chu a hiau hi.

⁴⁰ Jonathan in a gâlvante chu tanglakpa chu pia’n, a kiang in, “Chia inla, zia hi khawpi lam in a la pua’n,” ti’n a hil a.

⁴¹ Tanglakpa chia mang zaw zaw ah chun, David chu suang kisia khawm pang ah kipat chu hung pawtdok in, a mai ah leitual si’n a bok khup a. Thumvei hial a bok khup ah, a kichawptuau ah, a kikâ khum ta mai un; David chu a thasia zaw diak hi.

⁴² Ziaphatchun, Jonathan in David kiang ah chun, “Thamuang tak in chia ta’n, Lalpa chu nang leh keima kikâl leh, la suante tawh ka suante kikâl tiang ah ei hiatpitu hi zing ta hen, ti’n, Lalpa min in thuthung I la siam zo ta’ngâl a,” ti’n a gen a. David le a kipandok ah, a nusia ta’n; Jonathan le khawpi lam zuan in a chia tai.