1 SAMUEL 2 - PATHIAN LEKHABU THIANGTHO (BSI)

Hannah Pauchapna

¹ Hannah in zia gualah gen in a pauchapah: Ka lunggil hi Lalpa ah chun a kipak hi; ka hatna chu ka Pathian ah choisa’n in a um tai, Ka gualzaw’na ka kipak ziakin, ka kam in ka mêlmate ka engho tai.

² Lalpa gual ah mithiangtho dang a um puai, nangma tilo ngâl chu; I Pathian uh tilo ngâl Suangpi dang a um puai.

³ Kisathei tak in pau ta kiu inla, la kam ua kipat êngpauna him him pawt ta ki’hen; Lalpa chu hetna Pathian ahi ngâlah, ama chun I thilbawl dan zosiau a te’tuak sek hi.

⁴ Mihatte thalpi hibot ahi’n, chaute tâi chu hatna gâk ahi.

⁵ Mi kiningtingte chun nêk kawm ding a kilaw tau in, mi gilkialte chu vang gâl lâkah suk-hausat in a um tau hi. Cha nei theilonu chun pasagi a nei ta’n, cha tam tak neinu chu a thawmhau tai.

⁶ Lalpa‘n a thatah, a hinsak kit tai; Sheol ah a paitha suk in, a kaidok kit tai.

⁷ Lalpa‘n a chatgasak in, a hausatsak hi; a niamsak ah, a chawisâng sek hi.

⁸ Chaga chu leivui lak ah kipat in a kaitho in, mi tasam chu leivui lakah kipat dom sâng in, leng chate lak in a kichutsak in, lopina chutpha a luasak hi. Lei kingakna khuamte chu Lalpa â a hia, khawvel chu a chung un a nga ahi.

⁹ A mi ginumte keng chu vêng tup intin, himaleh, mi nunsiate vang, thim lak ah paithâk in hung um in au; thagum hatna ziak mai in kuama’n, zaw’na a chang diak pawngâl ua.

¹⁰ Lalpa do-te chu suksiat hi’n tiu in; Chungnung Penpa chu vanah, van-gi’n hung ding ahi. Lalpa‘n kawlkil tiangah vaihawm intin, a lengpa kiang ah hatna pia’n tin, a sathaunu’te thilhitheina chu vang, chawisâng ding ahi, ti in.

Eli Chate Nunsiatna

¹¹ Tichun, Elkanah chu Ramah khua a In lam in a chia kit ta’n; naupang chu Lalpa nasêm in, thiampu Eli kiang in a um den tai.

¹² Tu’hin, Eli chate chu mi chavai a hiziak un, Lalpa a ja puau a;

¹³ mipite â ding ah thiampute thillat bawl sek dan chu; kithoina, thillatna sa a huan lai un, thiampute suak nasêmte a hung un, thik satul kâ thum nei hun chawi in,

¹⁴ bêldal a hem, bêlkûm a hem leh sabêl lian ah sa kihuan lai chu a sun un, a sut khâk khâk uh chu thiampu’n a kilak sek ahi. Shilloh khua Israel mi, kithawi ah hung tapote â chu Eli chate chun zia gual chun a la bawl sek ua.

¹⁵ Zia mai chule hilo in, sathau haw a hâltum masang un, thiampute suak nasêmte chu hung in, kithoina thillânte kiang ah chun, “Thiampute â ding sa ei piau in, la sa huan uh a du puau in, a kihâi min bep a dawi ui,” a hung ti sek ua.

¹⁶ Kua a hem khat in, “A sathau hâltum phot uh hen la, ziazaw chu leh la doina nau chu kilâk un,” a tiu leh le, “Hilo e, tu’ ma ma hi’n lei piak ding uh ahi; lei piak lo ua leh kilâk tho tho ding ka hiu,” a ti sek ui.

¹⁷ Lalpa kiang ah mite thillat chu bangma a ngai lo ziak un, zia tangvalte gitlona chu Lalpa mit mu in a huaisia ma ma hi.

Shiloh Ah Naupang Samuel Chu

¹⁸ Samuel chu puan malngat ephod ah kithuam in, Lalpa âng in na a sêm a.

¹⁹ Chuleh, a nu chun a pawsal tawh kum si’n ah thil lân dingah a chia si’n leh, a puanâk dingah a bawl piak chu a puak piak sek a.

²⁰ Ziaphat chuleh, Eli chun Elkanah leh a ji chu zia gual hin maljawlna a dot piak sekah: “Lalpa â dingah zia la thilpiak ziak ua hin zia numei hi Lalpa‘n chate pia’n, hun dit kit ta hen,” ti’n; ziazaw chuleh, a In lam un a chia kit bep sek ui.

²¹ Chun, Lalpa‘n Hannah chu a tepte ah; tichun, chapa pathum leh chanu pani a hun hing tai. Chuleh, naupang Samuel chu Lalpa ma’n a hung khanglian tai.

Elite Inkuan Chung ah Hillawkna

²² Ahi’n Eli chu a têk ma ma tai. A chate’n Israelte zosia chung ah a thilbawl dan uh leh kikhopna biakbûk kotkhak bul ah numei a la luppi danteu haw zosia le a he suak a.

²³ A kiang un, “Bang dingah zia gual ah chu bawl la hiu em? Zia mipi zosiate ah kipat hin la thilbawl dan phalo uh ka la he tai.

²⁴ Ahipuai, ka chate haw; Lalpa mipite lakah la chanchin uh kithang ka la hiatte hi a pha puai.

²⁵ Mi kua a hem khat in midang khat chung ah thil bawl khial leu, mi kua a hem khat bêk in Lalpa kiang ah a gitlonau chu ngaidam dot piak thei ding ahi’n; himaleh, min Lalpa chung ah thil bawl khial leu kua’n dot piak thei ta ding a hem?” ti’n a hil sek a. Himaleh, amau thalup ding chu Lalpa‘n pha a la sak lam a la hi tak ziakin, a pau thu gente chu bangma’n a ngaisak puau hi.

²⁶ Zia hun ah chun naupang Samuel chu hung khanglian jel in, Lalpa leh mipite doisakna chang in a khanglian deu deu tai.

²⁷ Pathian mi pakhat Eli kiang ah hung in, zia gual hin a hung gen a, “Lalpa‘n zia gual hin a gen hi, ‘La pu leh pateu kha Aigupta gam ah Pharaoh suak leh salah a um lai un, a kiang un ka la kilâk ta’n.

²⁸ Israel nam zosia lakah kipat, ka thiampu nasep sêm ding leh ka mâichâm ah gimtui hâl ding ah chia to ding ah ka âng ah ephod ah kithuam dingin ka la têlchuam ta’n; chuleh, Israel mipi zosia’n mei ah a thillatteu chu nang uh Inkuan chan dingin ka la pia ta ahi.

²⁹ Bang dingah ka thupiak dungzui ah ka mipi Israelte kithoina leh thillatte chu enlâ nalai ah, la chate kivâk thauna ding chu keima sâng ah ngaikhawk zaw la hi em?’

³⁰ Ziaziakchun, Lalpa, Israelte Pathian in zia gual hin a gen hi, ‘Nangma Inkuan leh la suantuteu Inkuan chu ka ma-âng ah kumtuang ah lut leh pawt in pansak dingin ka kitiam hi,’ ti’n; himaleh, tu’hin vang zia gual hin Lalpa‘n a gen tai: ‘Zia gual chu hilo hial ding a hi; keima ei chawisâng tapo chu chawisâng ing ka tin, ei musit tapo chu bangmalo ah koi ding ka hi.

³¹ Ngai in, nangma hatna leh la pu leh pate hatna ka tan bot ni chu hung tung ding ahi tai; tichun, la Inkuan sung ah kipat kuama têk chan dam um talo ding la hiu.

³² Israelte chung ah vangphatna ka hun vuk ding chu lungngai tak kawm in enlâ ma ma ta’n la tin; la Inkuan lakua kuama a têk chanah dam um talo ding la hiu.

³³ Ka mâichâm ah kipat ka paithâk lo pen pen chu, la mitdo pen ding leh la lung ngaina pen ding hita’n tin; la Inkuante zosia chu chemjam ah thalup ding ngen hi ta’n au.

³⁴ La chapate pani Hophni leh Phinehas hi nang â ding ah tepte’na hi’n au; a paniu in ni khat sung ah thi ding a hiu.

³⁵ Kei â ding ah thiampu ginum, ka lungthim leh ka ngaituana dungzuiah bawl ding mi hun tungding ding ka hi. Ama chu In buldet siam piak ing ka tin, ka sathaunu’ kiangah lut leh pawt in umsak ding ka hi.

³⁶ La Inkuan ua a suakcha taphot in a kiang ah an nêk ding vaithum a hem, dangka thik a hem don in hung intiu in, a kiang ah chun, “Thiampute vaithum kam khat bêk ka nêkthei khâk leh, lungsiat tak in thiampute dinmun pakhat bêk ei luasak in,” hung ti ta’n au,’ ti’n a gen hi,” a hung ti tai.