1 SAMUEL 19 - PATHIAN LEKHABU THIANGTHO (BSI)

Jonathan In David A Dotpiakna

¹ Saul in a chapa Jonathan leh a sepaite zosia kiang in David thalup a guat dan a gendok ta’n. Himaleh, Saul chapa Jonathan in vang David chu a doisak ma ma ziang hi.

² Jonathan in David kiang in, “Ka pa Saul hin hun thalup gua zing ahi; ziaziakchun, jing’ jingkal hileh kiveng tak in um inla, khoi tak munthip a hem khat in vakisel in aw.

³ La kiselna kiang lam gamlak ah ka pa a hung phat leh, a kiang ah vading ing ka tin, thu hetdaw ka nei leh nang hun hil sawn ding ka hi,” a tia.

⁴ Jonathan in a pa Saul kiang in, David phatnate chu zia gual hin a a gen ah; “Lengpa chun a suak David chung in, thil phalo bangma bawl ki’hen: la chung ah bangma a hi’khial kha puai. Nang â ding ah thilpha tak bawl zing ahiziak in, Lengpa’n le David chung ah thil phalo la bawl lo ding ahi,” a tia;

⁵ ama hinna tiangle îtcha lo khop in, Philistin mipa chu a la that ta’n; ama ziakin Israelte â dingin, zaw’na lopi tak Lalpa‘n a la pia ta ahi. Zia chu nang inle la mu’n, la kipak ma ma hi; bang a tia, a ziak bei kei ah, mawna nei lo chung ah khut thâk gua, David tha la guat ziang a hem? ti’n a gen tai.

⁶ Saul inle Jonathan thugen chu a ngaisak ta’n; chuleh, Saul in, “Lalpa hinna sâl in thu ka tiam ahi, David chu that lo ding ka hi,” ti’n a kitiam a.

⁷ Tichun, Jonathan in David chu a ko ah, a kiang in zia thu chu a leng in a hil tai. Jonathan in David chu Saul kiang in a pui ah, a ma-âng ah a um gual ngai ah khan a um kit tai.

Saul Ah Kipat Mikhal in David Hukdok

⁸ Kido’na a hung um kit ah; David chu Philistinte do dingin a kuan a. David in a gâlteu chu nasa tak in a zo ah, a taijak ta mai ui.

⁹ Chuleh, Saul in a cheicha chawi kawm ah a In ah a chut hiat hiat lai in, David in thil githeite a kiang in a tum piak ah; zia lai tak ah chun, Lalpa‘n Thagau buak in Saul a hun matsak a.

¹⁰ Saul in David chu bâng tawh khawden ziang gua’n a khaw ah; himaleh, David chu a chawmdok man ah; tichun, a cheicha chu bâng ah chun a khawchang ziang tai. David chu zia jan ma ma ah chun taidok in a suakcha tai.

¹¹ Saul in zia jan chu David a In ah chânggu dingin mi a sawl ah; jingkal phat leh thalup ding a ti ahi. David ji Mikhal chun, “Tu’jan ah hin la kihukdaw lo leh vang jing leh thi ding la hi,” ti’n a vahilgu tai.

¹² Tichun, Mikhal in David chu tukvan ah kikhâi thâksak in a taimang ah a suakcha tai.

¹³ Mikhal in milim khat a lupna chung in a sial ah, a luchang ding kêlmul ah siam in, puan a khu’khum a.

¹⁴ Saul in David man ding ah a mi sawlte a hung phat un Mikhal in, “A damlo ahi,” a la tia.

¹⁵ Ziaphatchun, Saul in, a mi sawlte chu David chu va en him him dingin a sawl a. A kiang un, “A lupna pum in hun puau inla, keima’n that ing ka,” a tia.

¹⁶ A mi sawlte chu a valut phat un, lupna chung ah milim, a luchang kêlmul kisiam chu a vamu tau a.

¹⁷ Saul in Mikhal kiang in, “Bang ding ah zia gual ah hi ei thêm ah, ka mêlmapa chu sawl mang ah suachât sak la hi em?” a tia. Mikhal in Saul kiang ah chun, “Ama chun, ei chiasak in, bangatia hun that ding ka hem? ei tia ahi chu lam,” ti’n a dawnhu a.

Ramah Khua David in Samuel Va Bêl

¹⁸ David a tai mang ah, a suakcha ta’n; Ramah khua Samuel kiang a vatung ah, Saul in a chung ah a bawl dan zosia chu a hil a. Samuel tawh kiton in Naioth khua’n a vachêng tau hi.

¹⁹ Saul kiang in, “David chu Ramah lam ah Naioth in a um hi,” ti’n a hil un;

²⁰ ziaphatchun, Saul in David man dingin mi a sawl ah. Samuel makaina a kiang ah jawlnei um zosia chu Thagau ah a dim lai tak uh a vamu phât un, Pathian Thagau in Saul mi sawlte chule a hun man ta mai a.

²¹ Zia thu chu Saul a hil phat un, midang a sawl kit ah; amau chule Thagau a hung chang chiat tau a. Tichun, Saul in a thumveina dingin mi a sawl kit ah, amau chule Thagau a hung chang kit chiat tau a.

²² Ziaphatchun, ama chule Ramah lam ah chun a vachia ta’n. Seku mun ah Tuikul Lian a hung tun phatin, mite kiang in, “Samuel tawh David khoi tak ah um a hiu em?” ti’n a dong a. Kua a hem khat in, “Ramah lam ah Naioth ah a um ui,” ti’n a hil a.

²³ Ramah lam ah Naioth chu zuan in a chia ah; Pathian Thagau a chung in a hung tung ta. Ramah lam ah Naioth lam zuan ah a chia kawm in Thagau in a dim malam pek a.

²⁴ Ama’nle a puante chu liptha’n, Samuel ma-âng ah chun Thagau a chang ta’n. Zia ni leh a jan kit khawvak tiang in a ngawnchang in a lumden ziang tai. Ziaziakchun, “Saul le jawlnei lak ah pang hita lo a hem?” a la ti khawlaw hial uh ahi.