1 SAMUEL 18 - PATHIAN LEKHABU THIANGTHO (BSI)

Jonathan In David Kiang ah Thu Tiam

¹ David in Saul kiang ah thu a gen zaw phatin, Jonathan in David chu a lungsiat ma ma ziang ta’n; tichun, ama a kilungsiat gual tuk in David chu a lungsia tai.

² Zia ni kipat chun Saul in a pa In lam ah chia kitsak nuam talo in, a um densak tai.

³ Jonathan in ama hinna tawh kibang hial ah David a lungsiat tâk ziak in, a kiang in thuthung a siam tai.

⁴ Jonathan in a puanâk âk lai a lîptha vak ah, a gâlvan chawi laite, a chemjam leh a thalpi tawh a kawnggâk tawh David a pia tai.

⁵ David chu Saul in a sawlna lam lam in a chia ah, a lawting pek ah; ziaziakchun, Saul in a sepaite chung ah hotu dingin a siam tai.

⁶ Philistin mipa that zo ah David In lam ah a hung kile’kit phat ah chun, Israelte khua zosia ah kipat numeite chu, lengpa Saul lamtua dingin, dakkhutbette, thilgitheite tawh lim tak in La sa kawm ah lâm in a hung pawtdok tau a.

⁷ Chun, numeite chun a lopna’n zia gual hin La a kidawngtua in a sau ah: “Saul in a sâng ah sâng in a that in, David in a sîng ah sîng in a that hi,” ti in.

⁸ Zia a thugen uh chu Saul in a kipakpi him him pua’n, a lung a na ma ma a. Ama chun, “David in a sîngtêl ah that ah, kei a sangtêl ah that bep in a gen un; lenggam ei hun chu’piak ding ahiloleh bang dang hita ding a hem?” a ti tai.

⁹ Zia ni’ kipat chun Saul in David chu îtsik tak in a en pan tai.

Saul in David A Tha Guatna

¹⁰ A jing ah kipat chun Pathian sawl thagau buak chun Saul a hun man pan kit ah; a Insung ah chun a lung a na zing ta mai a. Nisi’n leh a bawl dan ngai gual in David in thil githei a tum piak sek a. Saul inle a cheicha a chawi zing a;

¹¹ a lungthim in, “David hi bâng tawh khawden ing ka,” ti ah a ngaitua dungzui in a cheicha chun a khaw ta mai a. Zia gual ah chun nivei hial a bawl ta’n; himaleh, David chu a suakcha jel hi.

¹² Lalpa‘n Saul chu taisan in David chu a umpi tâk ziakin, Saul in David chu a huphul ma ma tai.

¹³ Chutichun, Saul in David chu a kiang ah pat chawndok in, sang khat chung ah thunei in a siam tai; tichun, David in sepaite mapui in, gâldo in a kuan un, a hung kile’kit jel sek ui.

¹⁴ Lalpa‘n a umpi ziakin David chu a kiheina lam taphot in a lawting pek a.

¹⁵ Saul in David chu a kiheina lam taphot ah lawting jel hi ti a het phat in, a huphul zaw deu deu a.

¹⁶ Himaleh, David chun Israel leh Juda sepai zosia puidok ah gual zo ah a hun pui tung kit jel sek ziakin, a puihuaite chun David chu a lungsiat deu deu tau hi.

David in Mikhal A kichenpina

¹⁷ Ziaphatchun, Saul in David kiang in, “Zia hin ka chanu upa zaw Merab a um hi; kei â ding ah hangsan tak ah la pan ah, Lalpa gâl la do ngachat phot leh, la ji dingin hun pia’ng ka, ti’n a gen a. Saul in a gêl dan chu, Keima’n that lo lengle Philistinte’n hun that tho tho na’n au,” a ti ziak ahi.

¹⁸ David in Saul kiang in, “Israelte lak ah kei kua ka hia, ka In sung mite le kua a hiu ah, ka pa Insung mite le kua a hiu ah a hem, lengpa mâkpa ka pan mai ding chu?” ti’n a dawnhu tai.

¹⁹ Himaleh, Saul in a chanu Merab chu David tawh kichensak ding a ti lai chun, Meholah Inkuan ah mi Adriel tawh a kichensak zawsa a la hi tai.

²⁰ Saul chanu Mikhal chun David chu a la ngai ma ma a. Zia chu Saul a hil phat un, Saul chule a kipak ma ma hi.

²¹ Saul in, “Philistinte khut ah a pûk theina ding ah thâng ahitheina dingin, ka chanu chu pe ngut ing ka,” ti’n a ngaitua a. Ziaziakchun, a niveina dingin, Saul in David kiang in, “Tu’hin ka mâkpa’ la pan ding ahi tai,” ti’n a gen a.

²² Saul in a suakte kiang ah thu a pia, “David kiang in, ‘ngai in, lengpa la chung in a lungkim ma ma in, a suakte zosia’n le a hun lungsiat ui; ziaziakchun, tu’hin chu a mâkpa la pan ding ahi tai,’ ti a guk in vagen un,” ti’n a sawl a.

²³ Tichun, Saul suakte chun zia thute chu David kiang in a gûkcha’n a vagen tau a. Chun, David in a kiang un, “Lengpa mâkpa hi ziang ding chu, kei tawhbang ah mizawng leh ngaisân umlo tak â ding hin thil namen lo ahi ti he lo la hiu em?” ti’n a dawnhu a.

²⁴ Saul suakte chun, “Zia gual hin David in a gen hi,” ti’n a vahil tau a.

²⁵ Ziaphatchun, Saul in, “David kiang ah zia gual hin vagen un, ‘Lengpa’n a chanu man dingin a mêlmate chung ah phuba a lâkna dingin, Philistinte zek vun za khat tilo ngâl bangma dang a ngek puai,’ vatiu in,” ti’n a sawl kit a. Saul in David chu Philistinte khut ngei in thi naleh a ti ziak ahi.

²⁶ A suakte’n zia thu chu David a vahil phat un, David chu lengpa mâkpa pan ding chu a kithalawp ma ma a. A huntiam sung a bei ma ngei in,

²⁷ David chu a sepaite tawh kipan ah kuandok ngâl in, Philistinte mi za khat a va that tau ah; tichun, lengpa mâkpa’ a pan theina ding ah poimaw, Philistinte zekvun za khat chu David in Lengpa kiang ah kim tak in a hun chawi a. Saul inle a chanu Mikhal chu a ji dingin a pia tai.

²⁸ Himaleh, David chu Lalpa‘n a umpi hi ti leh a chanu Mikhal in a ngai hi ti a het ziakin,

²⁹ Saul chun David chu a lau zaw sêm ah, tichun, zia hun ah kipat chun Saul chu David mêlma a hung hi tai.

³⁰ Chuleh, Philistin sepai hotute chu kido dingin a hung kuandok veu sek un; a hung kuandaw si’n ua leh Saul sepaite sâng in David a lawting zaw sek ah; ziaziakchun, a minthang ma ma tai.