1 SAMUEL 16 - PATHIAN LEKHABU THIANGTHO (BSI)

Leng Hi Ding Ah David Sathau Nu’na

¹ Samuel kiang ah Lalpa chun, “Saul hi Israelte leng a hi’na kipat ka paithâk ziak ah bang chan lungngai ah um ding la hi em? La sathau bûk ah sathau sungdim in la kipan in; Beth-lehem khua Jesse kiang ah hun sawl ing ka tin, a chapate lak ah kei â ding ah leng ah pang ding ka mudok ta’ngâl in,” a hun ti tai.

² Samuel in, “Bang ti chia thei ding ka hem? Saul in a la he leh ei that mai ding ahi,” ti’n a dawnhu a. Chun, Lalpa‘n a kiang in, “Bawnglâ pakhat kai inla, ‘Lalpa kiang ah kithawi ding ah chia ka hi,’ ti’n la,

³ zia kithoina chu pang dingin Jesse ko inla; chuleh, la bawl ding hun hil ing ka; a min ka hun hil pen pen chu kei â dingin sathau la nu’ ding ahi,” a tia.

⁴ Lalpa thupiak gual in Samuel inle a bawl ah, Beth-lehem a hung tung ah. Khawpi sung ah upate chu lau ah kithing kawm kawm in a kiang in a hung un, “Thamuanna thu ah hung la hi em?” a la tiu a.

⁵ Ama chun, “Thamuanna thu hi e; Lalpa kiang ah kithoina lân ding ah hung ka hi; kisuthiangtho unla, kithoina mun lam ah chia in kiton hitiu,” a tia. Tichun Jesse leh a chapa chu kisuthiangtho dingin a chial tai.

⁶ A hung tun phat un, Eliab chu a en ah, “Lalpa âng ah hung ding hi Lalpa‘n a têldaw pen chu hi ngei in ah,” ti’n a ngaitua a.

⁷ Himaleh, Samuel kiang ah Lalpa‘n, “A mêl latdan a hem leh a din sândan in en kin la, zia gual mi chu ka paithâk ahi, Lalpa chun mihingte et dan in a en puai; mihingte chun a paw lam mêl latdan a en sek un, Lalpa‘n vang lunggil lam a en sek hi,” a tia.

⁸ Ziaphatchun, Jesse in Abinadab a ko ah, Samuel kiang in a pui ah. Ama chun, “Zia hile Lalpa‘n a têldaw chu ahi puai,” a ti kit a.

⁹ Ziaphatchun, Jesse in Shammah chu a kiang in a sawl ah. Ama chun, “Zia hile Lalpa‘n a têldaw chu ahi puai,” a la ti kit a.

¹⁰ Jesse in a chapa pasagite chu Samuel kiang in a sawl chiat ah, Samuel in Jesse kiang ah chun, “Ziate lak ah khat cha hile Lalpa‘n a têl a um puai,” a tia.

¹¹ Jesse kiang ah Samuel in, “La chapate zia hin a um kim awm?” ti’n a dong ah. Ama chun Samuel kiang in, “A naupang pen chu a um nalai ah; himaleh, ama chu belamching ah pang ahi,” ti’n a dawnhu a. Jesse kiang ah chun Samuel in, “Ama chu ko inla, hun pui in; ama zia tak hi a hung tun masang sia kithoina chu lân theilo ding I hiu,” ti’n a gen a.

¹² Tichun, a kosak ah, a hun puilût ua leh; ama chu dam mêlpu tak, mit chîm tak leh mêlpha tak ahi. Lalpa‘n Samuel kiang in, “Zia pen hi ahi; kipan inla, sathaunu’ in,” ti’n a hun hil a.

¹³ Ziaphatchun, Samuel in sathau bûk sakî chu a hun la, a suapite mit mu ah chun sathau a nu’ tai; zia ni kipat chun Lalpa thagau a chung in a hung um ziang tai. Tichun, Samuel le a kipandok ah Ramah lam in a chia kit tai.

David in Saul â Ding Ah Tingtang A Sai piak

¹⁴ Tu’hin Lalpa thagau in Saul a pawt dawsan ta’n; tichun, Lalpa‘n thagau buak hun sawl in Saul chu a gawt tai.

¹⁵ A suakte chun Saul kiang in, “Ngai in, tu’hin Pathian hun sawl thagau buak in a hun gawt la hita ahi.

¹⁶ Ka lengpau hin la nasêmte hi tingtang sai thiam hawl dingin mi sawl inla; Pathian ah kipat thagau buak in a hung sukbuai phat leh tingtang hun tum piak sek leh nuamsa deu ding la hi,” a tiu a.

¹⁷ Tichun, Saul in a suakte kiang ah chun, “Zia gual ah thiam tak ah sâi thei chu ei hun hawl daw piak unla, ka kiang ah hun pui un,” ti’n a gen a.

¹⁸ Tangvalte lak ah pakhat in a hun dawnhu ah, “Beth-lehem khua mi khat thilgi tum thiam, mi hangsan leh gâlhat, thugen thiam leh ngaituana kitup tak nei khat ka mu’n; Lalpa umpi mi le ahi,” ti’n a dawnhu a.

¹⁹ Tichun, Saul chun Jesse kiang in palai a sawl ngâl ah, a kiang in, “La chapa David, belamching ah pang kha ei hun sawl piak tiam in,” a tia.

²⁰ Jesse inle a chapa David chun lengpa Saul kiang ah a puak piak dingin, sabiltung khat ah vaithum tawh, zuthawl khat tawh kelno pakhat a thot a.

²¹ Tichun, David chu Saul kiang a hung tun phatin, a nasêm in a pang tai. Saul in a lungsiat ma ma ah, a gâlvan pua’n a pansak tai.

²² Saul chun Jesse kiang in, “David hi ka nasêm in pang den ta hen; ama hi ka mit tunna lam tak mi ahi ngâl in,” a vatisak a.

²³ Bangtik hun ah le Pathian hun sawl thagau buak in Saul a hun lua phat leh, David in a tingtang a pan vak ah, a sai ngâl mai sek ah; ziaphat chuleh, Saul a um a nop deu sek ah, thagau buak chunle a nusia sek hi.