1 SAMUEL 15 - PATHIAN LEKHABU THIANGTHO (BSI)

Saul in Amalekte Zo in A Lengpau A Hawi Hi

¹ Samuel in Saul kiang ah chun, “Lalpa‘n a mipi Israelte chung ah leng ah pang ding ah sathau hunnu’ dingin ei sawl ah; ziaziakchun, tu’hin Lalpa thugen hi a la ngai tiam in.

² Sepai honte Lalpa chun zia gual hin a gen hi: Aigupta gam ah kipat Israelte a hung pawt daw lai ua a la do ziak un, Amalekte chu gawt ding ka hi.

³ Tu’hin kipan inla, Amalekte chu vado inla, a nei zosiau vasusia sik sek in; a numei a pawsal, naupang leh nausen hitaleh, a bawngchalteu, a belamteu, a sangawngsauteu leh a sabiltungteu natiang uh hawi neilo in that gam in, a ti ahi,” ti’n a gen a.

⁴ Tichun, Saul in a sepaite chu a ko khawm ah, Telaim mun ah chun a kisim ua, keng sepai nuai ni leh Judah sepaite sîng khat a hiu a.

⁵ Saul chun Amalekte khawpi a zuan ah, phâicham ah chun a la châng ding a koi a.

⁶ Saul in Kent mite kiang ah chun, “Amalekte lak ah kipat in hung pawtdok un, achutiloleh, amau tawh hun that khawm mai ding ka hiu; Aigupta gam ah kipat Israelte a hung pawt daw lai ua khan, a chung un la pha ngâl un,” ti’n a ko ah. Tichun, Amalekte lak ah kipat chun Kent mite chu a hung pawtdok tau a.

⁷ Saul in Amalekte chu Havilah ah kipat Aigupta sualam ah um Shur tiang in a that gam tai.

⁸ Amalekte lengpa Agag chu a hingmat ah, midang zosia chu vang chemjam in a that suak tai.

⁹ Saul tawh a sepaite chun Agag tawh, belam leh bawng hon leh belam no lak ah a thau deu deu leh a pha diakte pum in, van pha diakte chu tawh a hawi un; a phalo lam deu deu leh a man tam lo zosia chu a susia dik dek tau hi.

Saul Leng A Hina’ Kipat Paithâkna

¹⁰ Samuel kiang in Lalpa‘n thu a hun gen a:

¹¹ “Leng ding ah Saul ka la guat hi ka kisik hi, ka thupiakte zui lo hial in ei kinungheisan ta’ngâl a,” a tia. Samuel chu lungna tak kawm in jankhua’n Lalpa chu a ko ta ahi.

¹² Saul tawh kimu dingin Samuel chu jingkal ma tak in a kipandok a. Chuleh, Samuel kiang in, “Saul chu Karmel lam in a chia in, zia tak ah chun ama hetzingna ding khat a siam zaw in, Gilgal lam in a chia suk tai,” ti a hil tau a.

¹³ Saul kiang ah Samuel a tun phatin Saul in a kiang in, “Lalpa‘n mal hun jawl ta hen; Lalpa thupiak gual in ka vabawl zo tai,” ti’n a gen a.

¹⁴ Himaleh, Samuel in, “Aleh, bangtidan ah belam hâm git leh bawng hon husa ka bil ah hung lut thei ahi tam?” ti’n a dong a.

¹⁵ Saul in, “Amalekte â a hun lâk uh ahi; Lalpa la Pathian kiang ah kithoina dingin, sepaite’n belam leh bawng hon lak ah a pha diakte a hun lâk uh ahi; a dang cheng chu vang ka hun that gam sik sek tau hi,” ti’n a dawnhu a.

¹⁶ Ziaphatchun, Samuel in Saul kiang in, “Thip ta’n! Tu’jan ah Lalpa‘n ka kiang ah a thugen hun hil ing ka,” a tia. Ama’nle, “Hun gen in,” a ti tai.

¹⁷ Tichun, Samuel in, nangma kingai dan ah neucha’n kikoi male chin, Israel nam pumpi luchang hilo la hem? Lalpa‘n Israelte chung ah leng hi ding ah sathau a hunnu’ la hi.

¹⁸ Amalekte hi vado inla, la tha gam sik sek masia la do ding a hi, a ti hen.

¹⁹ Bang ding ah Lalpa thugen chu zui lo la hi em? Bang ding ah Lalpa mit mu ah thil diklo tak bawl ding ah gâllâkte chu baw he hu ziang la hi em? ti’n a gen a.

²⁰ Saul in Samuel kiang ah chun, “Lalpa thu ka mang ah, Lalpa‘n ka bawl ding ah ei sawlna’n ka chia ah, Amalekte lengpa Agag le ka hun hing mat ah; chuleh, Amalekte chu ka that gam sik sek chu lam.

²¹ Himaleh, sepaite’n gâllâk lak ah kipat in belam leh bawng hon lak ah a pha diakte chu Gilgal ah Lalpa la Pathian kiang ah kithoina dingin a hun lau hi,” ti’n a dawnhu a.

²² Ziaphatchun Samuel in: “Lalpa‘n a thu mat sâng ah, hâlmang thilpiak leh kithoina kipakpi zaw a hem? Ahi’pen chu, kithoina sâng in thumat a phazaw’n, a thu ngaisak chu belamchal thau tak, piak sâng ah le phazaw ma ma ahi.

²³ Helna hi âisânna sual sâng in a nêp zaw pua’n, lochalna hi bawlsualna leh, milim ho’na tawh kibang ahi. Lalpa thu la pâm pai ziakin, ama’nle la leng hi’na kipat, a hun paitha tai tin,” a gen hi.

²⁴ Samuel kiang ah Saul in, “Mipite ka lau ziak ah a thuu ka la mat tâk ziakin, Lalpa thupiak leh la thugen ka la botsia kha ta’n, ka la gilo ta ahi.

²⁵ Ziaziakchun, tu’hin ka gitlona ei ngaidam inla, Lalpa chu ka biak theina dingin ei chiapi kit in,” ti’n a don a.

²⁶ Samuel in Saul kiang ah chun, “Nang in Lalpa thugen la limsak lo ziak ah, Israelte chung ah leng ah la panna Lalpa‘n a hun paithâk tâk ziakin, Lalpa kiang lam ah hungpi kit talo ding ka hi,” ti’n a gen a.

²⁷ Samuel in a nutsia guat phatin, Saul in a puanâk chual mong chu a tûkchak ziakin a kai ek tai.

²⁸ Samuel in a kiang ah chun, “Tu’ni ma ma hin Lalpa‘n Israel lenggam chu a botthêk ta’n, nang sâng ah phazaw, la Invêngte lak ah midang khat kiang in a pedok tai.

²⁹ Zia bep chule hilo in, Israelte lopina Pathian chu, a thu kile’kit pua’n tin, a lungle hei diak pua’n ah; ama chu a lungthim theng vet vut mihing gual ahi paw’ngâl in,” ti’n a gen tai.

³⁰ Ziaphatchun, Saul in, “Ka la gilo tai; himaleh, ka mipite leh upate ma-âng ah hin ja’ngai inla, Lalpa la Pathian ka biak theina dingin ei chiapi kit in,” ti’n a gen a.

³¹ Tichun, Samuel chule Saul lam ah chun a kile’kit ah; chuleh, Saul in Lalpa chu a ho tai.

³² Ziaphatchun, Samuel in Saul kiang in, “Amalekte lengpa Agag kha zia tak ah hin hun puidok in,” a tia. Agag chu lau ah kithing kawm kawm in a hung a. Agag chun, “Thi ziang ding chu tizat a umna lawm lawm e!” a tia.

³³ Himaleh, Samuel in a kiang in, “La chemjam in numei tam tak, cha bei ah a koi gual in, la nu le numei lak ah cha bei in um hen,” ti’n a gen a. Samuel chun, Agag chu Gilgal ah, Lalpa ma-âng ah chun, a sat tel tai.

³⁴ Ziaphatchun, Samuel chu Ramah lam in a chia ta’n; chuleh, Saul chu vang Saul khawpi, Gibeah ah a In lam in a chia tai.

³⁵ Samuel in Saul chu a thi ni tilo in a mu kha kit ta pua’n; himaleh, Saul chu Samuel in a sûn ma ma hi. Chun, Israelte chung ah leng hiding ah Saul a la siam ziakin Lalpa chu a kisik ma ma tai.