1 SAMUEL 13 - PATHIAN LEKHABU THIANGTHO (BSI)

Danlo Tak ah Saul Kithoina

¹ Saul chu kum sawmthum ah upa ahi in vai a hawm pan ah; chuleh, Israelte chung in kum sawmli leh ni vai a hawm hi.

² Saul in Israelte lak ah mi sang thum a têldok ah; ziate lak ah sang ni chu Saul tawh Mikmash leh Bethel tânggam in a um khawm un, sangkhat chu Jonathan tawh Benjamin gam ah Gilead ah a um un; mipi dang sia chu a puanbûk lam chiat un a sawl kit tai.

³ Jonathan in Geba mun ah Philistin gâlvêngte a vazo ah; zia thu chu Philistinte’n a la he tau a. Chuleh, Saul in, “Hebrai mi zosia’n a la hiau in,” ti’n gam pumpi ah chun pengkul a mutsak a.

⁴ Saul in Philistin gâlveng sepaite chu a zo tai, ti leh, Israelte chu Philistinte â ding ah muda um tak a hitau ti a het phat un, mipi zosia chu Gilgal ah Saul panpi dingin a kodok tau hi.

⁵ Philistinte chu Israelte do dingin a kikokhawm un; sakol kângtalai sîng thum, sakol sepai sang guk tawh, tuisuagiat pang ah piaunêl gual ah tam sepai hon a hung khawm tau a; a hung kuan to ua Mikmash mun, Bethaven ah chun a hung kikul tau hi.

⁶ Israelte chu a pang zo talo a hiu ti a kihiat phat un, mipite chu kawlhawm ah te, kawhawm ah te, suangpi lak ah te, thân kuak ah te leh tuikul ah te chun a kisêl mang zo tau a.

⁷ Hebraite lak ah khenkhatte chu Jordan lui gâlkâi in, Gad leh Gilead gam in a jam mang zo tau a. Saul chu Gilgal in a um zing nalai ah, mipite chun lau ah kithing kawm kawm in a zui tau hi.

⁸ Samuel in hun a tiam piak dungzui in, Saul in ni sagi sung a la ngâk ah; himaleh, zia hun sung ah chun Samuel chu Gilgal a hung tung naipua’n, a mipite chun Saul chu a kilepsan pan tau a.

⁹ Ziaphatchun Saul in, “Hâlmang thillat ding tawh, kichamna thillat ding kha ka kiang ah hun la tiam un,” a tia. Tichun, hâlmang thillat chu a la bawl tai.

¹⁰ Hâlmang thillat a bawlzaw phatin Samuel a hung tung ah, a lamtua dingin Saul a chia in, chibai a bûk a.

¹¹ Samuel in a kiang in, “Bang a la bawl la hi tam?” ti’n a dong a. Saul inle, “Mipite’n ei jamsan tau ah, nang la la hun tiam sung in la hung tung ta pua’n; chuleh, Philistinte lah Mikmash in a hung khawm ta’ngâl un.

¹² ‘Lalpa doisakna ka dot masang in Philistinte chu Gilgal do ding in hung ziang kha’n au,’ ka ti ziakin, keima’n hâlmang thillat ding chu ka la bawl mai a hita hi,” ti’n a dawnhu a.

¹³ Samuel in Saul kiang ah chun, “Ngolhuai tak ah thil a la bawl la hita hilam; Lalpa la Pathian thupiak chu la zui ta puai. Chuti hilo leh vang, Lalpa‘n Israelte chung ah leng la hi’na hi kumkhua’n hun hi’det piak ding ahi’n;

¹⁴ tu’hin vang, la lenggam in dai sawt pua’n ah; Lalpa‘n ama lung gual pu midang khat a hawldok ta’n; Lalpa‘n la zui ding ah thu a hun piakte la zui tâk lo ziakin, a mipite chung ah vaihawm dingin ama chu a guat ta ahi,” ti’n a dawnhu tai.

¹⁵ Chuleh, Samuel in Gilgal nusia in a chia mang tai. Mipi a um nalai cheng chu Saul sepai in a pang tau ah; Gilgal ah kipat in Benjamin gam ah Gibeah lam a zuan tau hi. Saul in a kiang ah pang sepaite chu a sim ah, za guk vel a hiu a.

Gal Do Ding ah Kisakna

¹⁶ Saul leh, a chapa Jonathan tawh a sepaiteu chu Benjamin gam ah Geba khua’n a kikul tau a; Philistinte chu vang Mikmash in a kikul ui.

¹⁷ Galgûk bawlte chu Philistin sepaite lak ah kipat in pawl thum kisua in a kuandok un; pawl khatte chun Shual gam ah Ophrah lam a zuan un;

¹⁸ pawl khatte chun Beth-horon lam a zuan un; chuleh, a pawl thumnate chun gamthip lam daw ah Zeboim phâijawl kimuna lam chu a zuan ui.

¹⁹ Zia lai ah chun Israelte gam pumpi sung ah thîksêk a um nai puau hi; Philistinte chun, “Hebraite hin chemjam, ahiloleh cheichate a kisiam lo hial diu ahi,” a tiu a;

²⁰ tichun, Israelte’n a tuthawu, a tudâl, a heichau, a kawiteu leh a thîk matchâk zosiau sêk hiam dingin Philistinte kiang in a chia zing uh a ngai a.

²¹ Tuthaw leh tudâl tât hiam man dingin shekel khat se’thum sua ah a se’ni leh, heicha leh bawng mol siam man in shekel khat se’thum sua ah a se’khat a pesek ui.

²² Tichun, kido phat leh, Saul leh Jonathan lam ah pang, sepaite lak ah chun chemjam leh chei mu ding a um puai; himaleh, Saul leh a chapa Jonathan in vang a kinei ui.

²³ Tu’hin, Philistin gâlvêngte chu Mikmash chiangkot lam in a va kuandok tau hi.