1 SAMUEL 12 - PATHIAN LEKHABU THIANGTHO (BSI)

Samuel in Kithâkna Thu A Genna

¹ Samuel in Israel mipi zosia kiang ah chun, “Ka kiang ah la thugen zosiau kha ka ngaisak ziakin, la chung ua leng ah pang ding ka hun pia ahi.

² Ngai un, la lengpau chun ma a hun pui ta’n; kei ka hileh vang têksia samkâng ka hi tai; himaleh, ka chapate chun a hun umpi zing ui. Ka naupan lai ah kipat in tu’ni chan hi ka hun kaihuai la hiu hi.

³ Zia hin ka um hi; ka chung ah lungkim lo zosia’n Lalpa leh a sathaunu’ ma-âng ah hin gen un. Kua bawngchal ka lâkpiak a um em? A leh, kua sabiltung ka lâkpiak a um em? ahiloleh, kua dawha bawl in a nei ka lâkpiak la um awm? Kua ka hun êngbawl la um awm? Mit kithumsak in kua kiang ah golgûkna ka la ngai em? Zia gual chu a um chun hun gen un, hun dit kit sik sek ing ka,” a tia.

⁴ Mipite chun, “Lei dawhabawl pua’n, lei êngbawl pua’n, kuama â le la lâkpiak puai,” ti’n a dawnhu tau a.

⁵ Ama chun a kiang un, “Ka khut in bangma ka bawlkhial a um puai ti la he tau a, Lalpa chu ei hiatpitu hi hen, a sathaunu’ ngei hile tu’ni’n ei hiatpitu hita hen,” ti’n a gen nalai a. Mipite chunle, “Ahi, ama chu ei hiatpitu ahi,” a ti tau hi.

⁶ Samuel in mipite kiang ah chun, “Mosi leh Aron a la têldok ah, a pu leh pateu Aigupta gam ah kipat a la puidokpa Lalpa chu ei hiatpitu ahi.

⁷ Ziaziakchun, tu’hin la umna mun chiat un a la um zing un, nanghaw leh la pu leh pateu Lalpa‘n a la hukdaw dante hun hil in, Lalpa âng ah nanghaw hun sûtpi ding ka hi.

⁸ Jakob kha Aigupta gam ah a chên lai khan, Aiguptate chun a la êngbawl tau ah; Ziaphatchun, la pu leh pateu khan Lalpa a ko un; tichun, la pu leh pateu kha Aigupta gam ah kipat a puidok ah, zia gam ah chênsak dingin Mosi leh Aron kha a la sawl tai.

⁹ Himaleh, Lalpa a Pathian uh a hemil tau in; ziaphatchun, ama’n Hazor ah Lengpa Jabin sepai hotu Sisera khut ah te, Philistinte khut leh Moab lengpa khut ah te hin a la zuakdok ta’n; tichun, ziate chu a hun kidopi tau hi.

¹⁰ Ziaphatchun, Lalpa a hun ko un, zia gual hin a gen tau a: ‘Lalpa nungngat in Baalte leh Astarte ho san in ka la gilo tau hi; himaleh, tu’hin ei hukdok inla, nangma na bep sêm tâng kau,’ a tiu a.

¹¹ Tichun, Lalpa chun Jerubbaal tawh, Barak tawh, Jephthah tawh Samson a hun sawl ah, amau chun kiltin ah kipat in la gâlteu khut ah kipat in a hukdok tau a; tichun, gâl muang tak in la chêng tau ahi.

¹² Himaleh, Ammonte lengpa Nahash in hung do ding ahi ti la mu phât un, Lalpa la Pathian uh la chung ua lengpa um zing hi’napi’n, ‘Ahipuai, leng pakhat in ka chung un vaihawm hen,’ la tiu a.

¹³ Ngai un, la dot dungzui un, leng ding ah la têl uh chu zia hin a um hi; ngai un, la chung ua leng ah pang ding Lalpa‘n a hun pia ta ahi.

¹⁴ Lalpa chu lau ah, a na la sep ua, a thu ngai ah, Lalpa thupiakte chung ah la thukhel lo ua, nanghaw leh la chung ua leng vaihawmpa hin Lalpa la Pathian uh thu la zui phot uh chun, thilpha hi ding ahi;

¹⁵ ahi’n, Lalpa thu la ngai lo ua, Lalpa thupiakte la zui nop lo ua leh vang, Lalpa khut in nanghaw leh la lengpau chu hun do ding a hi.

¹⁶ Ziaziakchun, tu’hin a la um chiat unla, thil lopi tak Lalpa‘n a hun bawl dingte hi a la en un.

¹⁷ Tu’ni hi gehu bu-ât hun hilo a hem? La chung ua vaihawm ding leng la kidot ziang uh hi Lalpa mit mu ah thil huaisia tak ahi ti la het ua, la mutheina ding un, Lalpa chu ko ing ka tin, van-gi leh gawpi hun zuksak ding ahi,” a tia.

¹⁸ Tichun, Samuel in Lalpa a ko ta’n; chuleh, Lalpa‘n zia ni chun van-gi leh gawpi a hun zuksak ah; tichun, mipite chun Lalpa leh Samuel chu a lau ma ma tau hi.

¹⁹ Mipi zosia chun Samuel kiang in, “Thi lo ah ka umtheina ding un, la suakte â ding hin Lalpa la Pathian kiang ah ei pauchap piak in; ka gitlonau belapna dingin, ka chung ua vaihawm ding leng ka la don nalai sêt un,” a tiu a.

²⁰ Samuel in mipite kiang ah chun, “Lau kiu in; zia gual khop ah chun a la bawlkhial ta maleu chinle, Lalpa nusia kiu inla, la lungthim zosiau in Lalpa na sêm tau in;

²¹ thil mantheilo, phatchuamna bei leh nanghaw hun hukdok theilote hi, a phatchuamna bei ahiziak in zui kiu in.

²² A ziak chu, Lalpa‘n amin lopi tak ziak ah chun a mipite pâmpai ziang lo ding ahi, a ziak chu, Lalpa‘n a lung lam hi ding in a mipite hi a siam ahi.

²³ Kei ka hileh chu, nanghaw â ding ah pauchap haisan in Lalpa chung ah gitlo bawl pua’ng ka tin; chuleh, lampi dik leh pha chu hun hil zing ding ka hi.

²⁴ Lalpa chu lau him him phot mai unla, la lunggil zosiau in ama na chu sêm phot mai un; nang uh â ding ah bang gual ah thil lopi hun bawl piak a hem ti ngaitua zing zaw tau in.

²⁵ Himaleh, nunsia tak ah la um zing ua leh vang, nanghaw hi la lengpau pum in hun phiat mang mai ding ahi,” ti’n a hil tai.