1 SAMUEL 11 - PATHIAN LEKHABU THIANGTHO (BSI)

Saul in Ammonte A Zaw’na

¹ Tha khat vêl nung in, Ammon lengpa Nahash a kuan to ah Jabesh-gilead vado in a zo ta’n; tichun, Jabesh ah pawsal zosia chun Nahash kiang in, “I kikâl un kilemna thuthung siam inla, nangma lam ah pang ing kau,” a tiu a.

² Himaleh, Ammon mi Nahash chun a kiang un, “La changlam mit chiat uh kheldok ing ka tin, Israelte hi sumualpho dik dek phot ing ka; zia zaw chuleh, nanghaw tawh I kikâl un kichamna thuthung siam bep ing ka,” ti’n a dawnhu a.

³ Jabesh ah upate chun a kiang in, “Israel gam zosia ah thangko ka sawl sung uh ni sagi sung ei hu’ngai phot in. Chutia, ei hukdok ding ka mu lo uh leh kipelut ziang ing kau,” ti’n a dawnhu tau a.

⁴ Tichun, a thangko sawlteu chu Saul chênna Gibeah khua a hung tun phat un, mipite kiang in a hiatsak tau ah; mipite zosia chu ngai tak in a kap chiat tau a.

⁵ Zia lai tak ah chun, lou lam ah kipat in Saul chu a bawngchalte hun masom in a hung tung ah, a kiang un, “Bang thu a hem mipi a chuti ka’jak ziang uh?” ti’n a dong a. Tichun, Jabesh ah kipat thangkote thupuak chu a hil tau a.

⁶ Saul in zia thu chu a het phat in, Pathian thagau chu hat tak in a chung in a hung tung ah, a lungna ma ma ziang ta’n.

⁷ Bawngchal tuak khat a that vak ah, thangkote sawl in a sa chu Israel gam zosia’n a hawm jak ah, a kiang un, “Kuale Saul tawh Samuel zui nuam lo taphot chu a bawngchal uh zia gual hin kibawl piak ding ahi!” ti’n a gen a. Ziaphatchun, mipite chun Lalpa launa a hun nei tau a; kithu gual tak in a hung kuandok tau a.

⁸ Bezer mun ah a hun ko khawm phat un, Israel mipite chu nuai thum a hiu ah, Judah mipite chu sîngnga a hiu hi.

⁹ Thangko hungte kiang ah chun, “Jabesh-gilead ah chêngte kiang in zia gual hin a la gen un: ‘Jing leh sûn nisat lai tak leh hukdaw ah hung um ding la hiu,’ a la tiu in,” ti’n a gen a. Thangkote chu a hung tun ua, Jabesh ah chêngte kiang ah zia thu chu a gen phat un, a kipak ma mau a.

¹⁰ Tichun, Jabesh khua mite chun Nahash kiang in, “Jing leh la kiang ua hung kipelut ding ka hitau ah, la nop nop uh ei law mai tau in,” ti’n a gen ua.

¹¹ A jing ah chun, Saul in a mipite chu pawl thum in a khen a. Jingkal phalvak ah chun a mêlmateu giamun a zuan un; Ammonte chu sun nisat hun tiang in a that pek tau a; tichun, a suakcha sunte chule a kithejak suak tau ah; pani ziang le a pang khawm ding a um ta puau hi.

¹² Mipite chun Samuel kiang in, “Zia Saul phiangsan hin ka chung un vaihawm ding a hem, tite kha kuate a hiu em? Ei hun pedok un, that sik sek ding ka hiu,” a tiu a.

¹³ Himaleh, Saul in, “That kiu in, tu’ni hin Lalpa chun Israelte ei hukdaw tâk ziakin, tu’ni hin kuama that kiu in,” ti’n a gen a.

¹⁴ Samuel in mipite kiang ah chun, “Hung un, Gilgal ah chia hitiu in, zia tak ah chun leng hi’na siamthak hitiu,” a tia.

¹⁵ Tichun, a leng un Gilgal ah chun a chiau ah; chuleh, Gilgal ah chun Saul chu a lengpau hi dingin Lalpa âng ah chun a bawl tau a. Zia tak ah chun Lalpa kiang ah kichamna thillat a lân ua, Israel mipi zosia tawh Saul chu a kipak ma ma tau hi.