1 SAMUEL 10 - PATHIAN LEKHABU THIANGTHO (BSI)

¹ Samuel chun sathau bûk khat a hun ladok ah, a luchung a sunkhum ah; a chawp ah a kiang in, “Lalpa‘n a mipi Israelte chung ah vaihawm dingin a hun têl ah sathau a hun nu’ hi. Lalpa mipite chung ah vaihawm inla; chuleh, a kîmvêl ua a mêlmateu khut ah kipat hin amau la hukdaw ding ahi. Tu’hin Lalpa‘n a gochante chung ah vaihawm ding ah a hun têl ahi ti la hettheina ding ah tepte’na chu zia hi ahi:

² Tu’ni ka kiang ah kipat la chia mang phat leh, Benjamin gam ah Zelzah mun ah Rakhel thân kiang in pawsal pani kituakpi in la tin; amau chun la kiang in, ‘La sabiltung hawl uh kha ka mudok tau in, la pa’n sabiltung chung ah a lungkhamna chu a bei ta’n; ka chapa hi bang ti a ta dia aw, ti’n a hun lungkham ma ma tai,’ hun ti ding a hiu.

³ Zia kipat chu chia kit in la tin, Tabor gamgi thingbul hung tung in la tin; Bethel ah Pathian kiang zuan ah chia pawsal pathum kituakpi in la tin; a lak ua pakhat in kelno pathum hun kai in tin, a lak ua pakhat chun vaithum tang thum pua’n tin, pakhat chun zuthawl khat hun paw ding ahi.

⁴ Ziate chun chibai hun bûk intin uh, a vaithum puak uh tang ni hun pia’n tin uh, nang inle la kilâk ding ahi.

⁵ Ziazaw chuleh, Philistinte kikulna Gibeath-elohim hung tung in la tin; zia khawpi chu la lut phat leh jawlnei hon khat, pekkhuangte, khuangneute, lilute leh tingtangte tum ah, thoimual ah kipat hung suk tawh kituak in la tin; amau chu thagau a la chang intin uh.

⁶ Ziaphat chuleh, Lalpa thagau in hun man intin, amau chu tawh thagau chang khawm ta’n la tin, mi danglam tak hung suak ta’n la.

⁷ Zia gual ah tepte’na chu la hun mu phat leh, Pathian in a hun umpi ziak in, bawl ding ah pha a sak taphot chu bawl mai in.

⁸ Chun, ka ma lam ah Gilgal ah a la chia suk in; chuleh, keile hâlmang thillat leh kichamna thillat lân dingin la kiang ah hung suk ding ka hi. La kiang ah ka hung ah, la bawl ding ka hun hil masia, ni sagi sung lei la ngâk ding ahi,” a tia.

Saul In Thu Genlawk

⁹ Samuel nusia ding ah Saul a kihei mang zaw phatin, Pathian in lungthim chuam pakhat a hun pia ta’n; chuleh, zia teptênate haw zosia chu a hung bukim tai.

¹⁰ Zia mun ah kipat chu Gibeah khua a hung tun phat un, jawlnei hon khat in a hun kituakpiu ah; tichun, Pathian thagau in a man ah, jawlnei dangte chu tawh thagau a chang khawm chiat tau a.

¹¹ Malai ah ama a la he’khate chun, jawlnei dangte tawh thu genlawk ah a pan chu a mu phât un, “Kish chapa hi bang chang a hita? Saul le jawlnei lak ah pang hita’n ah maw?” ti’n a kihotua sau sau ziang tau a.

¹² Zia khua chêng mi pakhat chun, “Jawlnei dangte hi kua chate a hiu em?” ti’n a hun dawnhu ah. Ziaphatchun, zia gual hin thuching a gen tau ah, “Saul le jawlneite lak ah pang ahi tai maw?” a ti sek un.

¹³ Thagau chang ah thu a gen zaw phatin, a In lam zuan in a chia tai.

¹⁴ Saul paneu in ama leh a suak tangval kiang ah chun, “Khoilam ah vachia la hiu em?” ti’n a dong a. Ama’nle, “Sabiltung hawl ah chia ka hiu; ka mu zaw lo phat un Samuel kiang in ka vachiau hi,” ti’n a dawnhu a.

¹⁵ Saul’ paneu chun, “Samuel in la kiang ah bang a gen em ei hil in,” a tia.

¹⁶ Saul inle a paneu kiang ah chun, “Ama’n sabiltungte kha a mu kit tau hi ti ei hil hi,” ti’n a dawnhu a. Himaleh, Leng ah guat ah a umna thu Samuel in a gente chu vang bangma a hil puai.

Saul Chu Leng Hi Ding ah Puanlatna

¹⁷ Samuel in mipite chu Mizpah khua Lalpa kiang in a ko khawm a;

¹⁸ a kiang un: “Israelte Pathian, Lalpa chun zia gual hin a gen hi: Israelte hi Aigupta gam ah kipat ka la puidok in, Aigupta mite leh amau a la tawden lenggam zosiate khut ah kipat in ka la hukdok in.

¹⁹ Himaleh, tu’ni hin la Pathian uh, la haksatnau leh la buainau zosia lak ah kipat hukdokpa lei dawi puau ah, nanghaw’n a kiang in, ‘Ahipuai, ka chung ua vaihawm ding leng pakhat ei pia’n,’ la tiu in. Zaziakchun, tu’hin la nam leh phung dungzui un Lalpa kiang ah hung kipechiat un a tii,” ti’n a gen a.

²⁰ Ziaphatchun, Samuel in Israel nam zosia chu a puinai ah; chuleh, phunsân in Benjamin phung chu a teldok tai.

²¹ Benjamin phung chu a Inkuan dungzui un a pui nai ah; chuleh, phunsân in Matri te Inkuan chu a teldok chuam ah. A tawp in Matri Inkuante chu a mi mal mal un a hun puinai chuam kit ah; phunsân in a lak ua Kish chapa Saul chu a têldok kit a. Himaleh, ama chu a hawl phat un a mu zo ta puau hi.

²² Tichun, Lalpa a dong kit ua, “Ama chu zia hi hung pang lo a hem?” ti in; chuleh, Lalpa‘n, “En un, van lak ah kisel ahi,” ti’n a hun dawnhu a.

²³ Ziaphatchun, a vatai ua, ama chu a vapuidok tau a. Mipi lak a hung lut phatin, a lak un a liangko tiang dawkdok zo ah sâng a la hi’n.

²⁴ Samuel in mipi zosia kiang ah chun, “Lalpa‘n a têl chu la mu’nau em? Mipite lak ah hin ama tawhbang kuama dang umlo ahi,” ti’n a gen a. Chuleh, mipite chun, “Lengpa chu damsawt hen,” ti’n a kiko tau a.

²⁵ Samuel in mipite kiang ah chun, lengpa mawpuakna leh thuneinate chu a hil ah; ziate chu lekhabu’n a zik lut ah, zia chu Lalpa âng ah chun a koitup tai. Ziaphatchun, Samuel in mipite chu a In lam chiat un a sawl kit tai.

²⁶ Saul chule Gibeah khua a In lam zuan in a chia kit ta’n, sepai hangsan khenkhat, Pathian in a lungthim a sukkhakte chun a zui tau a.

²⁷ Himaleh, michavai khenkhatte chun, “Zia mi phiangsan hin bang ei ti humbit ding a hem?” a tiu a. Ama chu a musit bêk ziak un thilpiak bangmale a pia puau a. Himaleh, ama chun a limsak puai. Zia lai ah chun Nahash, Ammonte lengpa chun Gadte leh Reubente chu a la sugenthei ma ma ah. A changlam mitteu a kheldaw piak ah, Israelte hukdaw ah a um ding uh a phal puai. Jordan luigâl ah Israel mi, Ammon lengpa Nahash in a mit uh a kheldaw piak lo pakhatle a um ta puau a. Himaleh, Ammonte khut ah kipat suakcha, pawsal sang sagi zet chu Jabesh-gilead a hung tung tau hi.