1 SAMUEL 1 - PATHIAN LEKHABU THIANGTHO (BSI)

Samuel Pianna leh Latna

¹ Ephraim tânggam ah Ramathaim khua’n Zuph mi pakhat a um ah; a min chu Elkanah ahi. Ama chu Ephraim phung ah Jeroham chapa, Zuph chapa Tohu chapa Elihu chapa ahi.

² Ama chun ji pani a nei ah; a ji pakhat min chu Hannah ahi’n, a khatnu min chu Peninnah ahi. Peninnah chun chate a nei ah, Hannah in vang cha a nei puai.

³ Zia Elkanah chu a khuau ah kipat in Shiloh khua chun, kum si’n leh sepai honte Lalpa kiang ah kithawi ah, ho dingin a vachia sek a. Zia tak ah chun Eli chate Hophni leh Phinehas chu Lalpa thiampu nasêm in a pang ui.

⁴ Elkanah in kithoina a lat ni chun, a ji Peninnah leh a chapate leh a chanute kiang in a chanvo ding uh a siam piak chiat a.

⁵ Lalpa‘n a sûl khâk piak maleh, a hepi ma ma ziakin a ji Hannah chu chanvo a lêni’n a pesek hi.

⁶ Ama chu Lalpa‘n cha a neisak lo ziak ah a lungngaina belap ding in, a lawinu chun nasa tak in a engho nalai sêt a.

⁷ Kum si’n ah Lalpa In ah a chia si’n ua leh, a lawinu chun a êng êng in a ho sek ah. Ziaziakchun, Hannah chu kap in, an le a ne nuam ngai puai.

⁸ A pawsal Elkanah chun a kiang in, “Hannah, Bang ding ah kap la hem? Bang ding ah an ne nuam lo la hem? Bang a hem la lungkham? Chapa sawmkhat sângah poimaw zaw hilo ka hem?” ti’n a gen a.

⁹ Shiloh khua an ne’, a dawn zaw phat un, Hannah a kipan ah, Lalpa kiang in a kipelut a. Zia hun ah chun thiampu Eli chu Lalpa Tempul lutna khuam bul ah kitung ahi.

¹⁰ Lungkham ma ma ahiziak in, Lalpa kiang in a pauchap ah, thasia tak mai in a kap tai.

¹¹ Zia gual hin thutiam a bawl ah: “Aw, sepai honte Lalpa, la suak genthei dan hi hun en inla, ei hezing in, la suak hi hemil kin; la suak hi chapa pakhat lei piak ahileh, a thi tiang ah nang â ding ah kikoi thiangtho dingin hun pia kit ding ka hi. Ama chun zu leh khamthei thil him him dawn pua’n tin, a luchang ah samchem him him mat hipua’nah,” ti in.

¹² Zia gual ah Lalpa kiangah a pauchap lai takah a muk phun chu Eli in a la en zing a.

¹³ Hannah chu thipbek in a pauchapah; a muk bep phun in, a aw chu a gidok puai. Ziaziakchun, Eli chun zukham hiding in a la gingcha.

¹⁴ Ziaphatchun, Eli in a kiang in, “Bang chan zukham ah um gua la hi em? La zu chu koimang ta’n,” ti’n a gen a.

¹⁵ Himaleh, Hannah in, “Ka hipuai ka Lalpa; numei lungkham talua ka hi; zu leh khamthei thil ka dawn pua’n, Lalpa kiangah ka lunggil sungah umte ka gendok a hizawi.

¹⁶ La suak hi numei chavai gual in ei ngai him him kin; ka lungthimah dimlêt, ka lunggimna leh ka buaina gendok ka hizaw hilam,” ti’n a dawnhu a.

¹⁷ Ziaphatchun, Eli in, “Thamuang tak in chia ta’n; Israelte Pathian in la dotna chu a hun lawtin tai,” ti’n a dawnhu a.

¹⁸ Hannah chun, “La suak hin la doisakna chu chang ta hen,” ti’n a dawnhuah. Ziaphatchun, a umna lam a zuan ah, a pawsal tawh ne leh dawn in a um tauah; a lungkhamna mêl le a bei tai.

¹⁹ Jingkal ma takah tho in Lalpa a ho tau ah; Ziazaw chun, Ramah khua a In lam uh zuan in a chia kit tau a. Elkannah in a ji Hannah chu a luppi ah; tichun, Lalpa‘n ama chu a hezing hi.

²⁰ A hun tak in Hannah in nau a hun vopah, chapa a hun hing tai. A nu chun, “Lalpa kiangah ka dotdaw ahi,” a ti ziakin a min in Samuel a sa tai.

²¹ Elkanah leh a Inkuante zosia chu Lalpa kiangah a kum si’n kithoinau lân ding leh a kitepnau pia ding in a chiauah.

²² Himaleh, Hannah in vang a pawsal kiang in, “Kei vang nausen hin a nawichep a hâi ah, Lalpa kiang ah um den dingah a chia thei masang in hung dâ mai ing ka; ziaphat chuleh, a dam sung sia Lalpa â ding ah kikoi thiangtho hi dingah hun pia ding ka hi,” a ti zaw tai.

²³ A pawsal Elkanah in a kiang in, “Pha lasak gual gual in bawl mai in; a nawichep hâi masia chu enkol inla, Lalpa‘n a gen gual chun bawl mai ta hen,” ti’n a dawnhu a. Tichun, a nu chun nausen chu a nawichep hâi masia a enkol tai.

²⁴ A nawichep hai phatin, nausen chu bawngchal pakhat, kum thumah upa tawh, changbuang ephah dim khat tawh uain thawl khat keng in a puito ta’n. Shilloh khua’ Lalpa In ah chun, naupang cha ahi lai in a pui tai.

²⁵ Ziaphatchun, bawngchal chu a that un, naupang chu Eli kiang in a pui tau a.

²⁶ Chuleh, a nu chun, “Aw he pu! Ka Lalpa hinna sâl in ka ti ahi; kei hi Aw Lalpa, zia tak ah la kiang ah hung ding ah Lalpa kiang ah pauchap kha ka hi.

²⁷ Zia naupang hi donah pauchap ka la hi’ngâlah; chuleh, Lalpa‘n a kiang ah ka dotna chu ei law tinsak ta ahi.

²⁸ Ziaziakchun, Lalpa kiang in ka lân hi; a dam sung sia Lalpa mat dingin ka pedok ta ahi,” a ti tai. Zia takah chun Lalpa â dingin a nusia tai.