1 PETER 4 - PATHIAN LEKHABU THIANGTHO (BSI)

Pathian Doisakna Sepkol hi’na

¹ Chutichun, Khrista chun taksa ah a thok ziakin, nanghaw le zia gual lungthim ah chun kivan un; (taksa’ thuak ta chun gitlo a haisan tangal a.)

² Tichun, tu’nung ah taksa ah um lai sia, mihing nopna lam ah um talo in, Pathian doilam in a um ta ahi.

³ Jentelte doigual hinna: Hûkna, taksa nopna, zukhamna, zumun limna leh ki’dak um tak ah milim honate, tu’ma lam ah te kha hun ta hen.

⁴ Ziate ah amau nopsak bawl gual ah la bawl tâklo uh hi mak a sau ah, a hun gensia sek uh ahi.

⁵ Amau chun mihing leh mithite vaihawm piak ding ah kisazosa kiang ah chun kipuang in au.

⁶ Ziaziak hin ahi, tu’ ah thisate kiang ah chanchinpha a la gen uh, taksa ah um mihingte gual ah vaihawm in a um ua, thagau ah vang Pathian gual ah a hintheina ding un.

⁷ Himaleh, thil zosia tawpna chu a nai tai, ziaziakchun, la pauchap theina ding un lungthim dik tak pu’n chingthei un.

⁸ Bangcheng sâng in, phatchuamngai tak in kihepi tua chiat unla; hepina’n gitlo tam tak a khû sek ngal a.

⁹ Phunchiak lo in kizintun tuau inla;

¹⁰ mitin in thilpiak la chan dungzui chiat un, Pathian hepina zosia vop phate gual in, ziate ah chun na kisep piak tua chiat un.

¹¹ Kua’n le thu a gen chun, Pathian thute gual in gen hen; kua’n le na a sep chun, Pathian in hatna a piak gual jel in sêm hen; tichun, Jesu Khrista ziakin Pathian chu bangkim ah chawihoi in um thei in a. Lopina leh vaihawmna chu kumtuang in ama â ahi ngal a.

Khristian Hi’na Ziak ah Thokna Vangphat Um

¹² Doitakte haw, la lak ua patepna nasa tak, nangmau patepna ding ah hung tung chu, thil lamdang la chung ua tung gual in maksa kiu in.

¹³ Khrista thokna ah thokpite la hi dungzui un kipak zaw un; chutichun, a lopina a hung kilâk phât leh nang uh le lim tak in kipak thei in lau.

¹⁴ Khrista min ziak ah vau la hiu leh mi hampha la hiu; lopina leh Pathian Thagau chu la chung un a um tai.

¹⁵ Himaleh, la lak un kua’n le tualtha ziak a hem, gukchâk ziak a hem, thil hi’khial ziak a hem, midangte thil hisiat piak ziak a hem in thuak ki’hen.

¹⁶ Ahi’n la, Khristian ahiziak in thuak taleh, zakcha ki’hen; zia min ziak ah chun Pathian chawihoi hen.

¹⁷ Vaihawmna chu Pathian Inkuan ah pat a hun ta ngal a; eimau ah pat masak ahi chun, Pathian chanchinpha awilote tawpna chu bang gual a hita diam?

¹⁸ Chuleh, “Midik nangawnle hukdam hâm hâm ahi chun, Pathian ngaisaklote leh migilote chu, bang a suak ta diam uh?”

¹⁹ Ziaziakchun, Pathian phasak dungzui ah thuakte chun thilpha bawl in, a Siampa ginum tak kiang ah chun kivopsak tau hen.