1 PETER 3 - PATHIAN LEKHABU THIANGTHO (BSI)

Pawsal leh Jite

¹ Zia gual ma chun, nang uh jite haw, la pawsalteu thu thu’n um un; tichun, khenkhat in Pathian thu ginglo maleu, thugen hilo in, la tawidan un zo thei in lau.

² Lau dan thiam ah la tawidan uh chu hun mu ding a hiu.

³ La kicheinau chu pawlam kicheina: samphekte, sana khite, sil leh chênte hilo in,

⁴ lungthim sunglam ah mihing kisêlgu, lungthim thunuaigolna leh nunnemna, puansil setheilo ah kicheina hizaw hen; zia chu Pathian mit mu in a lûl ma ma hi.

⁵ Zia gual chun malai numei thiangtho Pathian gingte kha le, a pawsalteu thunuai ah um in a kichei zaw sek ui.

⁶ Sarah khan Abraham chu, Lalpa, ti’n a thu a mang hi. Thilpha hi ah, thep lau ah la umlo ua leh Sarah chate hi’n lau.

⁷ Pawsalte haw, zia gual ma chun, numei chu bêl kêk vak zaw leh, hepina hinna gochanpite a hiu hezing kawm in chawihoi un; tichun, la pauchapnateu dâl in umlo ding ahi.

Thildik Bawl Ziak ah Thokna

⁸ A tawp pen in, la leng un lungthim munkhat nei in, kilainattua leh suapite kihepina leh thunuaigolna nei in um un.

⁹ Thil phalo chu thil phalo in leh, hosiatna chu hosiatna’n thuk kiu in, zia sâng ah chun, maljawl zawu in; zia gual ah chu maljawlna chang ding ah ko la hingal un.

¹⁰ “Hinna dawi leh ni phate mu nuam chun, thil phalo lak in a lei vêngpha hen la, a mûk le thepna thu gen lo dingin vêngpha ta hen.

¹¹ Gitlona kiheisan in thilpha bawl hen; chamna hawl in del pek hen.

¹² Lalpa mit chu midikte chung in a chu sek in, a nakhang le a pauchapna lam un a daw sek hi; ahi’n la, Lalpa mêl chu thil hi’khialte chu, a do sek hi,” ti ahi ngal a.

¹³ Thilpha hi ah phatchuam la ngai ua leh kua’n la poikhoi ding a hiu em?

¹⁴ Ahi’n la, dikna ziak ah la thok ua leh a hampha la hiu. Amau chu kicha kiu inla, lauthawng diak kiu in,

¹⁵ la lunggil un Khrista chu Lal in koi un. Nangmau ah um kinepna chu min a hung dot ua leh, dawnhu thei ngal dingin, thunuaigol leh ja tak kawm in kisazo zing un.

¹⁶ Nunnem leh ja um tak ah um in, sia leh pha hetna chîm tak nei unla, nang uh hun gensete’n Khrista ah la umdan uh phat ziakin mualpho in au.

¹⁷ Thil phalo hiziak ah thok sâng in, Pathian phasak lam ahi chun, thilpha hiziak ah thok chu a pha zawi.

¹⁸ Pathian kiang ah ei pui theina dingin, Khrista chun gitlo ziakin kumtuang dai dingin a thuak ta’n; midik chun midik lo thasâng in a thuak ahi. Taksa ah thalup in a um ta’n, thagau ah suk-hin in a um tai.

¹⁹ Zia chun suangkul ah um thagaute kiang in thu a vagen a,

²⁰ amau chun malai ah Noah dam lai ah Long tuk sungsia, Pathian dawtheina a ngak lai khan thu a mang puau ah, zia Long ah chun mi tawmcha, mi pagiat, tui ah kipat hukhin in a um uh ahi.

²¹ Zia kibatpi baptisma chun, taksa buakna sukthianna bep hilo in, Pathian lam ah sia leh pha hetna sukthianna hizaw in, Jesu Khrista thawkitna ziakin tu’hin a hun hukhing tai.

²² Ama chu van ah chia in Pathian changlam ah a um a; vansawlchâkte, thuneinate leh thil hi’theinate chu ama thu thu ah umsak ahi tai.