1 PETER 2 - PATHIAN LEKHABU THIANGTHO (BSI)

Suang Hingte leh Nam Thiangtho

¹ Chutichun, êngsiatna zosia, gûkkhelna zosia, lepchiana zosia, ênna zosia leh gensiatna zosia haisan un.

² Hukdamna la khanlet theina ding un, nausen piang limte gual in, thagau lam nawitui thiang chu ducha zing un;

³ Lalpa phatna chu la tep tangal un.

⁴ Ama chu suanghing, mihingte doilo himaleh, Pathian têl leh man tam chu ahi;

⁵ nang uh le suang hingte gual in, thagau lam In ah lepto la hiu ah, Jesu Khrista ziakin Pathian kipakna lam, thagau lam kithoina lân ding ah thiampu thiangthote la hung hitheina ding un.

⁶ Ziaziakchun, Pathian Lekhathu ah chun, “Ngai un, Zion ah a kil ah suang poimaw pen, têldaw leh man tam ka lem tai; ama gingtute chu mualpho pua’n au,” ti a um hi.

⁷ Ziaziakchun, nanghaw a gingte â ding ah chun man tam ahi, a ginglote â dingin vang: “Insate suang doilo chu, a kil ah suang phachuam pen a hung hi tai,” ti ahi ngal a.

⁸ Chuleh, “Zia suang chu a kipalnau leh, a kipûknau suangpi a hung suak tai”. Thu chu a matlo ziak un, a kipalpâi tau hi; zia gual ding mawng ah chu guat a la hi tangal a.

⁹ Himaleh, thim ah kipat hun kodok ah, a vâk lopi tak ah hun kolut pa thilbawl lamdangte chu la tâklat theina ding un, nanghaw vang chi têldaw, lal thiampute, nam thiangtho, Pathian mite ngei chu la hitau hi:

¹⁰ “Malai khan nam la hi puau ah, tu’hin vang Pathian namte la hitau hi; malai khan jangaina la mu puau ah, tu’hin vang jangaina la mu tau hi”.

Pathian Suakte Hindan

¹¹ Doitakte haw, mikhual leh malzin la hiziak un, thagau dosek taksa nopnate chu haisan dingin ka hun ni la hiu.

¹² Jentelte lak in mêlpha tak in um un; chutichun, hi’khelna nei gual in hun gensia maleu, kanthâkna ni phat leh la thilbawl phat uh a mu ziak un, Pathian chawihoi in au.

¹³ Lalpa min in mihing kivai hawmnate chun kitulut un, vaihawmtu lianpen Lengpa kiang ah hihen la,

¹⁴ thil hi’khialte gawt ding leh thil hi’phate pâkcha ding ah guat sawn gam vaipawte kiang hitaleh.

¹⁵ Thilpha bawl ah mingolte hetlona sukdai chu Pathian doilam ahi ngal a.

¹⁶ Pathian suakte gual in, zalen tak in um un; himaleh, la zalennau chu diklo bawlna lemchâng in mang kiu in.

¹⁷ Mi zosia ja unla, gingtu suapite chu hepi un. Pathian lau unla, Lengpa chu ja tau in.

Khrista Thokna Etton Ding

¹⁸ Suakte haw, ja dan thiam kawm in la puteu thu thu’n um un, mipha leh nunnemte nuai bep hilo in, mi nunsiate nuai ah le.

¹⁹ Min Pathian hetna ziakin thok khawlaw in, lungkhamna thuak leh, zia chu Pathian pâkchâk lam ahi ngal a.

²⁰ La gitlo ziak ua la thok uh chun, thuak hat tak in um maleu chun, pâkchâkna bang a hem la law ding uh? Ahi’n la, la bawl phat ziak ua la thok ua, thuak-hat tak ah la um ua leh, zia chu Pathian kipakna lam ahi.

²¹ Khrista’n a hun thok piak ziakin, zia gual hiding ah chun ko la hiu; a kengnung la zui ding ua a hun nutsia piak la hiu hi.

²² “Ama chun thil a hi’khial him him pua’n, a kam ah le juauthepna a um puai”.

²³ Mi hosiat ah a um lai in a hosia thuk pua’n, a thok lai in a vau thuk diak puai; dik tak ah vaihawmpa kiang ah chun a kipe zaw ahi.

²⁴ Gitlona thi’san ah, dikna ah I hin zawk theina ding un, ama ngei chun kros ah khan a taksa ah chun I gitlonateu a paw tai. Ama beliamte ziak ah sukdam in la um tau ahi.

²⁵ Belam gual in la vâkmang tau ah, tu’hin vang la thagau uh chingpa leh vengpa kiang ah chun la kile’kit tau hi.