1 PETER 1 - PATHIAN LEKHABU THIANGTHO (BSI)

Chibai Bûkna

¹ Jesu Khrista nungzui Peter in, Pontas, Galatia, Kappadokia, Asia leh Bithunia gam ah kithejakte,

² thu mang ding leh, Jesu Khrista thisan thêkhum ding ah Thagau in a sukthian, Pa Pathian hetlawk gual ah têlte kiang ah, la chung un hepina leh chamna um ta hen.

Kinepna Hing

³ I Lalpa Jesu Khrista Pathian leh, Pa chu pâk in um ta hen! Ama chun a hepina lopi tak in, mithi lak ah kipat Jesu Khrista thawkitna jal in, kinepna hing mu dingin hinna thak ei pia’n.

⁴ Gochan setheilo, buak kâilo, chuai theilo, van ah nang uh â ding ah khêk ah um chu mu ding leh;

⁵ hukdamna hun nunung ah hung kilang ding ah guat zawsa chu mu dingin, ginna ziak ah Pathian thilhitheina ah vên la hiu hi.

⁶ Tu’hin, thepna chitin ziakin lungkham tadi maleu chinle, zia chun nasa tak in la kipak uh ahi.

⁷ Sana, mei ah patep nung ah le mangthai thei sekte sâng ah man phazaw, la ginnau chu Jesu Khrista hung kilâk phat leh, pâkna leh choihoina leh lopina a hung hi’theina dingin.

⁸ Ama chu mu lo maleu chun la hepiu a. Tu’hin mu lo maleu chun la ging ua, kipakna gen theilo khop ah lopi’n la kipak uh ahi.

⁹ La gin jal ua thagau hukdamna chu chang ding la hi tangal un.

¹⁰ Zia hukdamna, hepina la kiang ua hung tung ding a la genlawk jawlneite khan a la sui in, gun tak in a la hawl tau hi.

¹¹ Khrista Thagau amau ah um chun, Khrista thokna ding leh, zia zaw ah lopina hung um dingte chu a la hiatsak lawk lai ua khan, a ni leh hun ding hetdaw a la guau a.

¹² Amau â ding hilo in, nang uh â ding ah sêmgim a hiu ti hiatsak a hiu hi. Zia thute chu van ah kipat sawl Thagau Thiangtho jal ah chanchinpha hun hilte’n a hun hil tau hi; zia thilte chu vansawlchâkte’n le a het nop uh ahi.

Thiangtho Ding ah Kona

¹³ Ziaziakchun, nasem dingin la lungthim uh kisazo unla, kisawizoi un; Jesu Khrista kilâk phat leh hepina hung tung ding chu lungthuai lo in kineppi zing un.

¹⁴ Cha thumangte gual in, la hetlo lai ua la nopnateu ah um talo in;

¹⁵ a hun kopa chu a thiantho gual in, nang uh le la tawidan zosiau in thiangtho tau in.

¹⁶ “Keima ka thiantho gual in, nanghaw le la thiantho diu ahi,” ti ah zik ahi ngal a.

¹⁷ Doichuam neilo ah, mitin a nasep dungzui ua vaihawm piakpa chu, Pa gual ah la ko ua leh, la umnau ah la châm sung ua hin laudan thiam in um un.

¹⁸ La pu leh pateu hun piaksawn, umdan phachuamlote ah kipat thil sethei, dangka leh sana ah tat la hi puau a,

¹⁹ belamno dem kâilo leh buak kâilo gual ah, Khrista thisan lûl ah tat la hiu, ti la he ngal un.

²⁰ Ama chu leilung siam masang ah guatlawk hisa, hun nunung lam ah nang uh ziak ah hilat ahi tai.

²¹ Ama jal in, mithi lak ah kipat kaithopa leh a lopina petu Pathian gingte chu la hitau ah; la ginnau leh kinepnau chu Pathian ah kinga ahi.

²² Thutak mat ziak ah la hinnau la sukthiantho tâk ziak un, kihepituana dik tak la nei thei tau a; lunggil tak in kihepitua chiat tau in.

²³ Mangthai ziang thei ding chi sethei lak ah hilo in, Pathian Thu hing zing leh um zing dungzui ah piangthak la hitau a:

²⁴ “Mitin hi hampa gual bep a hiu a, a lopinau zosia le hampa pakcha gual bep ahi. Hampa chu a vuai ah, pakcha chu a pul mai sek hi;

²⁵ himaleh, Lalpa thu ahileh vang, kumtuang in a um zing hi,” ti zik gual ah khan. Zia thu chu la kiang ua chanchinpha hung kigen kha ahi.