1 LENGTE 8 - PATHIAN LEKHABU THIANGTHO (BSI)

Tempul Latna

¹ Ziaphatchun, Solomon in Israel upate leh phung tin ah luchangte zosia leh, Israel phung upa Inkuante lak ah hotute chu, David khawpi Zion ah kipat Lalpa thuthung thingkuang vala to dingin, Jerusalem ah Lengpa Solomon ma-âng in a ko khawm a.

² Ethanim tha ah kût hun ah chun, (zia chu a tha sagi’na ahi’n,) Israel mipi zosia chu Lengpa Solomon âng ah a hung kikhawm tau a.

³ Israel upate zosia chu a hung tau ah; thiampute’n thuthung thingkuang chu a hung jawn ua.

⁴ Tichun, Lalpa thuthung thingkuang, kikhopna puanbûk leh puanbûk sung ah ûm leh bêl thiangtho zosia chu a hun la to ua; thiampute leh Levite chun a hun paw to tau a.

⁵ Lengpa Solomon tawh Israel mipi hung khawm, a ma-âng ah hung kikhawmte chu thuthung thingkuang ma-âng in ama kiang ah a um un, a kithawinau belamte leh bawngchalte chu patep sên lo leh simsên lo hial ah tam ahi’n.

⁶ Ziaphatchun, thiampute chun Lalpa thuthung thingkuang chu a umna ding, In sung ah mun thiang sungnung, mun thiangtho pen, cherubte thajakna nuai ah chun a hun koi tau a.

⁷ Cherubte chun a tha’teu chu thuthung thingkuang umna mun chung in a jak ua; tichun, cherubte chun thuthung thingkuang leh a jawlte chu a khû tau hi.

⁸ A jawlte chu a sau bêk ziakin a jawl mongte chu, mun thiang sungnung mai ah mun thiangtho ah kipat chun a muthei hi; ahi’n la, pawlam in a kimuthei puai; ziate chu tu’ni tiang in zia tak ah chun a um zing tau hi.

⁹ Thuthung thingkuang sung ah chun, Aigupta gam ah kipat a hung pawt daw lai ua, Lalpa‘n Israel chate tawh thuthung a la siamna mun, Horeb ah Mosi’n suangpêk pani a la koite tilo kha bangma a um ta puai.

¹⁰ Thiampute mun thiangtho ah kipat a hung pawt daw phat un, Lalpa In chu sûmpi’n a khûdim tai.

¹¹ Lalpa In chu Lalpa lopina’n a lua dim tâk ziakin, thiampute chu sûmpi ziak ah chun nasem in a ding thei ta puau hi;

¹² Ziaphatchun, Solomon in zia gual hin a hun gen a: “Lalpa‘n, thimna sâ tak ah a chên ding thu a la gen in.

¹³ Keima’n la In ding sang tak in ka sak piak ta’n, kumtuang ah la chênna ding mun chu ahi,” ti in.

Solomon Thugen

¹⁴ Ziaphatchun, lengpa chu a kihei ah, Israel a hung khawm zosia chu a maljawl ah, Israel hung khawmte zosia chu a ding zing ua.

¹⁵ Zia gual hin a gen a: “Ka pa David kiang ah a kam ngei ah a la thutep zosia a khut ngei ah suguitungpa, Lalpa, Israelte Pathian chu maljawl in um ta hen!

¹⁶ Ama chun ‘Ka mipi Israelte Aigupta gam ah kipat ka puidaw ni kipat in, ka In sakna ding leh ka min umna dingin, Israel namte lak ah khawpi khat chale ka la têl chuam puai; ahi’n la, ka mi Israelte chung ah um dingin David ka la têl in,’ a la ti’n.

¹⁷ Ka pa David in Israelte Pathian, Lalpa min umna ding ah In sak ding chu a la lungtup a.

¹⁸ Himaleh, Lalpa‘n ka pa David kiang in a la gen ah, ‘Ka min umna ding ah In sak ding la lunggel hi la bawl hoi hi;

¹⁹ himaleh, In chu la sak lo ding ahi; la khalbe ah piang ding, la chapa chun ka min umna ding ah In chu hun sa ding ahi,’ a ti’n.

²⁰ Tu’hin, Lalpa‘n a thutiam chu a supiting tai; ka pa David thasâng in ka dingdok ta’n; Lalpa thutep gual in Israel lalchutpha chung in ka kichu ta’n, Israelte Pathian, Lalpa min umna ding ah In chu ka sa zo ta’ngâl a.

²¹ Zia tak ah hin, Lalpa‘n I pu leh pateu kha Aigupta gam ah kipat a puidaw lai ah, a kiang ua a siam thuthung kikoina thingkuang umna ding mun chu ka bawl piak tai,” a tia.

Tempul Latna Solomon Pauchapna

²² Ziaphatchun, Solomon in Israel pung khawm zosiate mu ah chun mâichâm âng in a dingdok ah, van lam in a khut a jakdok a.

²³ Zia gual hin a gen a: “Aw Lalpa, Israel Pathian, nang tawh bang Pathian chung lam van ah ahiloleh nuai lam lei ah a um puai, lunggil zosia tawh la ma ah um, la suakte â dingin thuthung leh hepina det tak la vop zing hi;

²⁴ la suak, ka pa David kiang ah la gen gual ngei ah la vop thuthung chu; la kam ah la tep chu tu’ni’n la khut in la supiting tai.

²⁵ Ziaziakchun, aw Lalpa, Israelte Pathian, la suak, ka pa David kiang ah, ‘La chate a chit thei ua, ka ma ah la um gual ah a um ua leh, Israelte lalchutpha kichu ding mi ka ma-âng ah tasam lo ding la hi,’ ti ah la thutiam kha guitun in.

²⁶ Ziaziakchun, aw Israelte Pathian, la thugen, la suak, ka pa David kiang ah la thutiam chu namdet in um ta hen,” a tia.

²⁷ Himaleh, Pathian chu leichung ah hin chêng tak tak ding la hem? Van leh van sang pen inle a hun dawl pua’n, zia ka In sak diak diak hin hun dawl pua’n a!

²⁸ La suak pauchapna leh a dotna hi ngaitha’n; Aw Lalpa ka Pathian, tu’ni la suak in la kiang ah a pauchapna leh a kâna hi ngaitha’n;

²⁹ “Zia tak ah chun ka min um ding ahi,” ti ah la genna mun, zia In lam hi sûn leh jan in en zing inla; la suak in zia mun lam nga’ a pauchapna chu ngaitha’n.

³⁰ La suak hi tawh la mi Israelte’n zia mun lam nga a pauchap tak ua leh a dotnau chu van ah la chênna kipat in ngaitha sek inla, ngaidam in.

³¹ Mi kua a hem in a Invêng chung ah a hikhel ziakin, kihaksialna thutiam a chung ah tung ta hen la, zia In ah la mâichâm âng ah a hung kitep phat leh,

³² van ah la ngaitha’n la, mawna nei chu thiamlo chansak ah, a umdan gual ah ama luchung ah chuksak ding leh, midik chu a diktat dungzui ah dit ah thiamchan dingin, la suakte chung ah thu tan in.

³³ La chung ah a gitlo ziak un la mi Israelte a gâlteu in a nuaisia phat ua, la kiang lam a hun zot kit ua, la min a ko ua, zia In ah hin la kiang ah a pauchap ua a dot phat ua leh,

³⁴ van ah la ngaitha’n la, la mi Israelte gitlona ngaidam inla, a pu leh pateu kiang ah la piak gam ah pui kit in.

³⁵ La chung ah a gitlo ziak ua van a kikhâk ah, gua a zuk lo phat leh, zia mun lam hi nga’ a pauchap ua, la min a suau ah, amau la gawt genthei ziak ah a gitlonau ah kipat a kihei kit phat ua leh,

³⁶ van ah la ngaitha’n la, la suakte leh la mi Israelte ngaidam inla, a zui ding ua lampi pha hil in; chuleh, a golua ding ua la mipi la piak, la gam ah gua hun pia’n.

³⁷ Gam ah kial a tun ah, natna a lên ah, gamte a keu ah, thingtâm a tun ah, khaute, khaubepite leh lungte a pun ah; a khawpiteu lak ah khat a mêlmateu in a ûm ua, bang natna hi’n, bang gual damlona um talehle;

³⁸ mimal kua tawhbang hi’n, la mipi Israelte zosia hitaleule, mi tin amau lungthim chiat ah thokna ziak ah a khutteu zia In lam ah a hun jak ua, a dot ua leh, a pauchapnau bang hiziang lehle;

³⁹ la chênna vân ah ngaitha’n la ngaidam in, mi tin a lungthim uh la het gual in dit in; mi tin a umdan tawh kigûn chiat in thuk in; nang bep in mihing lungthim la he ngâl a;

⁴⁰ tichun, ka pu leh pateu la piakna gam ah hin, a hin sungsiau ah nang a hun lau theina ding un.

⁴¹ Zia gual ma chun, la mi Israelte lak ah hilo, gam dang mi nangma min ziak ah gamla tak ah kipat a hung phat ua leh,

⁴² la min lopi dan, la khut thahât dan leh la khut thâk daw dante hi hun he ngei ding ahi ngâl un; gam dang mi a hung ah, zia mun lam nga’ a hung pauchap phat leh,

⁴³ la chênna van ah ngaitha’n la, gam dang mite chunle a hun konau gual in bawl piak in; chutichun, la mi Israelte gual ah hin, lei ah mipite zosia’n la min a hun het ua, a hung lau theina ding un leh, zia ka In sak ah hin la min kiko ahi ti a hettheina ding un.

⁴⁴ La mite a mêlmateu do ding ah kuandok in, bang lampi’n sawl talechin le, la min umna ding ah ka sak In leh, la têlchuam khawpi lam nga Lalpa kiang ah a pauchap uh chun,

⁴⁵ a pauchapnau leh dotnau chu van ah la ngaitha’n la, a dotnau gual un umsak in.

⁴⁶ Kuama gitlona bawl lo a um paw’ngâl ah; nangma kãl ah a gitlo ua, a chung ua la lungnat ah, mêlma pakhat khut ah la piakdaw ah, gamla hi’n nai lehle, a mêlmateu in a gam ua sal ah pui mang a hiu a,

⁴⁷ sal ah puiman ahi’na gam ua a hung kihiatdawu ah, a kisik ua, sal ah puite gam ah la kiang ah a hun dot ua, “Ka gilo tau hi; ka hikhial tau ah, gilo tak in thil ka la bawl tau hi,” a hun tiu a;

⁴⁸ sal ah puite, a mêlmateu gam ah a lungthim zosiau ah a kisik ua, a gam uh, a pu leh pateu la piakna gam, la khawpi têlchuam leh la min umna ding ah ka sak la In lam hi nga’ la kiang ah a hung pauchap ua chun;

⁴⁹ ziaphat chuleh, la chênna, van ah a pauchapnau leh dotnau la ngaitha’n la, a dot gual un umsak inla;

⁵⁰ nangma kãl ah gilo ta la mite ngaidam inla, nangma kãl ah a sukkhialnau zosia tawh; chun, sal ah puite mit mu in lainatna pia’n; amau in a chung ua lainatna a neitheina ding un.

⁵¹ Amau chu, la mite leh la gochante, Aigupta gam ah kipat leh thik-hâlna mei lak ah kipat la puidawsa ahi ngâl un.

⁵² La suakpa dotna leh la mi Israelte dotna lam ah hin la mit te’n la, nangma a hun ko phat si’n ua leh ngaitha sek in.

⁵³ Aw Lalpa Pathian, ka pu leh pateu Aigupta ah kipat la puidaw lai ah, Mosi mangcha’ la thutep gual in, amau chu la gochan ding ah lei ah mipite zosia lak ah la koichuam sate ahi ngâl un, a tia.

Solomon in Mipi A maljawlna

⁵⁴ Solomon in Lalpa kiang ah zia pauchapna leh dotna hi a lat zaw phatin, Lalpa mâichâm âng ah khupdin ah a khut van lam ah a jakna mun ah kipat chun a hung thodok a;

⁵⁵ aw ngai tak in, a dinsa’n Israel kikhawmte zosia chu a maljawl tai:

⁵⁶ A thutep dungzui ah a mi Israelte kiang ah chawldamna pia ta, Lalpa chu pâk in um hen; a suak Mosi mangcha’ thutiam pha a la gen zosia lak ah thumal pakhat chale a thawn puai.

⁵⁷ I pu leh pateu kiang ah a la um gual in, Lalpa I Pathian uh chu I kiang un um hen; ei nusia in ei kiheimangsan ki’hen la,

⁵⁸ I pu leh pateu kiang ah a thupiaksate, a thupiakte, a dan bawlte, a thugelte leh a lampite zosia zui dingin, I lungthimteu ama lam ah ngatsak ta hen.

⁵⁹ Lalpa âng ah ka dotna thute hi, Lalpa I Pathian kiang ah sun leh jan in um zing hen la; a suakpa thu leh a mi Israelte’n nisi’n a mamaw dungzui ua a dotnau gual in ama’n umsak ta hen;

⁶⁰ lei ah mipite zosia’n Lalpa chu Pathian ahi’n, a dang a um puai, ti a hun hettheina ding un.

⁶¹ Ziaziakchun, tu’ni gual hin, a thugelte zui ding leh, a thupiakte mang dingin Lalpa I Pathian kiang ah la pum un kilândok tau in, ti in.

Solomon in Kithoinate a Latna

⁶² Lengpa tawh a kiangah Israelte zosia’n Lalpa âng ah kithoina a lân tau a.

⁶³ Solomon in chamna kithoina Lalpa kiang ah bawngchal sîng ni leh sang ni tawh, belam nuai khat leh sîng ni a lân a. Tichun, lengpa leh Israel mipite zosia’n Lalpa In chu a lân thiangtho tau hi.

⁶⁴ Zia ni chun, lengpa chun Lalpa In mai ah huang lailung chu a lân thiangtho tai; ama’n zia tak ah chun hâlmang thillatte, an thillatte leh chamna thillat sathaute chu a lân ta; Lalpa âng ah um sum-eng mâichâm in hâlmang thillatte, an thillatte leh chamna thillatte sathaute chu a dawl lo ziakin ahi.

⁶⁵ Tichun, zia hun ah chun Solomon leh Israelte kikhawm a kiang ah um zosiate chu, Lebo-hamath ah kipat leh Aigupta lui tiang ah kipat mipi hungte chu tawh, Lalpa I Pathian uh âng in kût ni sagi sung a mang tau a.

⁶⁶ A ni giat ni chun mipi chu a pêl sak tai; lengpa chu maljawlna a piau ah, Lalpa‘n a suak David leh a mipi Israelte chung ah phatna a latsak zosiate ziak ah kipak leh lungthim tai tak in a puanbûk lam chiat un a chia kit tau hi.