1 LENGTE 7 - PATHIAN LEKHABU THIANGTHO (BSI)

Solomon Lal In leh In Dang Dangte

¹ Solomon in Leng Inpi ding khat a kisak in, kum sawm leh thum sung in a sa zo hi.

² Lebanon Gammâng In chu a dunglam tong za khat, a vailam tong sawmnga leh a sânlam tong sawmthum ah, sidar thing khuamte tian li chung ah lep a hi; khuamte chung ah chun sidar thing Inkam kinga ahi.

³ Khuamte chung ah chun jawlliang sawmli leh nga, tian sawm leh nga a kinga, Inchung chu sidar thing pêk a khû a.

⁴ Tian thum ah chun tukvan zawlte a um ah, tian thum ah chun a kimai ngat tua chiat ui.

⁵ Kotkhakte leh kotbiangte chun ning li a nei chiat un, tian thum ah chun a kimai ngat tua chiat ui.

⁶ Inthampi a khuam pani in a siam ah, a dung lam tong sawmnga leh a vailam tong sawmthum in a siam hi. A mai ah chun hulliap leh a khuamte a um ah; zia mai ah chun bûkcha pakhat a um hi.

⁷ Lalchutpha Inthampi a thutanna ding ah a siam chu, a tuang langkhat ah kipat langkhat tiang sidar thing pêk ngen in a bawl hi.

⁸ Inthampi nung ah huang dang pakhat ah, ama chênna dingin chule zia gual tho ah chun sak ahi. Solomon in a ji, Pharaoh chanu â dingin le, zia In tawhbang ma chu a sak piak hi.

⁹ Zia zosia hi a ma lam leh nung lam, In suangphûm ah kipat a chungvûm tiang leh, pawlam ah kipat huang lopi tiang ah suang manpha tak, a tê’na dungzui ah kitan, suang âtna ah ki-ât ah bawl ahi.

¹⁰ In suangphûm chu suang manpha tak, lian tak, tong sawm leh giat ngen ah bawl ahi.

¹¹ A chung ah chun suang manpha takte, a tê’na dungzui ah kitan leh sidar thing a um a.

¹² Huang lopi kîmvêl ah chun sidar thing tum thua khat zel ah suang kisui tian thum a kidâp ah; Lalpa In huang sungnung leh pindan zotna chule zia gual tho chu ahi.

Sum-eng Sektu Hiram Thilbawldawte

¹³ Tu’hin, Lengpa Solomon in Tura ah kipat Hiram a chial ah, a hung ta’n.

¹⁴ Ama chu Naphtali nam ah meithâi pakhat chapa ahi’n; a pa Tura mi chu sum-eng ah thilbawl thiam a la hia; ama chu, thiamna, pilna, hetna leh sum-eng ah thil bawldan thiamna’ dim ahi. Ama chu Lengpa Solomon kiang in a hung ah, a sep ding zosia chu a sêm pan tai.

¹⁵ Sum-eng khuam pani a sung ah. Pakhat chu tong sawm leh giat in a sâng ah, tong sawm leh ni ah sau khau pakhat in a kual kîmvêl ah; khuam dang chule zia chu tawh kibang ahi.

¹⁶ Khuamte chung ah tun dingin sum-eng bawk pani le a siam ah; bawk pakhat sândan chu tong nga a hia, bawk dang sândan chule tong nga ahi.

¹⁷ Khuamte chung ah bawkte chu pâk khivui leh thikkhau lên gual ah kizem in a tuam ah; bawk khat ah pasagi, bawk dang khat ah le pasagi ahi.

¹⁸ Theibufai khuamte chung ah bawkte khu ding, a kîmvêl ah gual ni in lenjem khat chung ah theibufai tawh a bawl ah; zia gual ma chun a bawk dang khat â dinginle a bawl hi.

¹⁹ Inthampi ah khuam kitiangte chung ah a bawkte chu, lili pâk ah jem hoi a hiu ah; tong li ah sâng a hiu.

²⁰ Khuam panite chung ah a bawkte chunle a chung in theibufai pâk limte a um ah, lenjem umna kiang ah bawk kual kituana chung in, theibufai chu za ni ni in a bawk dangte chung ah tian kîmvêl ahi.

²¹ Tempul ah khuamte a phu ah, simlam in khuam a phu ah, a min in Jakin a sak ah; mallam khuam a phu kit ah, a min in Boaz a sak hi.

²² A khuamte chung ah chun lili pâk limte a um ah, zia gual chun khuamte chu zawthian ahi tai.

²³ Chuleh, tuibêm le a siam ah; a kam langkhat ah kipat langkhat tiang chu tong sawm ahi; a bêm a hia, a sân lam chu tong nga leh, tong sawmthum ah lian ahi.

²⁴ A gei nuai deu ah chun milim a kitiang kîmvêl ah; zia milim pakhat chun tong sawm a lua hi; zia gual ah milim kitiangte chu tian ni a hiu ah, ziate chu a tuibêm chu tawh sakhat ah kisiam a hiu.

²⁵ Bawngchal sawm leh pani chung ah kitung ah tuibêm chu siam ahi; pathum in mallam pang a nga, pathum in simlam pang a nga kit ah, pathum in sualam a nga, pathum dang in tumlam a ngau hi. Tuibêm chu a chung ua tun a hia, bawngchalte chu kinungngat chiat ah kisiam in, a sunglam ah a nunglam uh um ahi.

²⁶ Zia chu khutpek tia ah sa a hia, a gei chu no gei gual ah lili pâk jem ah kichei ahi; zia tuibêm chun bath sang ni a dawl hi.

²⁷ A kingakna keng sawmkhatte chu sum-eng in a bawl ah; a keng pakhat sau dan chu tong li a hia, tong li ah lian, tong thum ah sâng ahi.

²⁸ A kingakna kengte chu zia gual hin bawl ahi: a chokuak ua, a kuakte gei dung ah a jawl palite chu a kikâl ah um ahi.

²⁹ A kuak chung ah a zawlte chung ah chun, sakeibakneite, bawngchalte leh cherubte lim a um ah. A jawlte chung ah chun a tun sawnna a um ah. Sakeibakneite leh bawngchalte nuai ah chun a jemna neucha cha a um hi.

³⁰ A kingakna tin ah chun sum-eng kângtalai keng kipei pali leh sum-eng jawl khat chiat a um ah; a ning pali chun a dawpna le a um chiat hi. Kisilna kuang nuai ah chun a dawpna kisunthawte a um kit ah; a pang zosia chu a kijem chiat ahi.

³¹ A kamhawm leh a kual sung chu tong khat tâ a hia; ahi’n la, a kamhawm leh a kual sau dan chu tong khat leh a kimkhat vel ahi. Chuleh, a kamhawm chung inle chawkuak tawh kikheu kuak, a bêm hilo, killi nei a um hi.

³² A chawkuak nuai ah chun kângtalai kengpei pali a um ah; kângtalai keng peite jawlte chu a ngakna tawh kimat ahi; kângtalai kengpei sândan chu tong khat leh a kim ahi.

³³ Kângtalai keng peite kibawl dan chu, sakol kângtalai kengpei kibawl dan gual ahi; a jawlte, a bêlvalte, a sutkalna leh a lai bawkte, a leng ah a kisunthaw ngen ahi.

³⁴ A kingakna kil li ah chun, a dawpna ding pali a um ah, a dawpnate chu a kingakna tawh sakhat ahi.

³⁵ A kingakna mong chung in tong kimkhat ah sâng belvalkual a um ah; a kingakna tawh a jawlte leh a kichokuakte chu tawh kithakhat ahi.

³⁶ A jawl pêk chung leh a kichaw kuaknate chung ah chun, cherubte, sakeibakneite leh a jem mawite chu kivêlsak in, tûm thingte a dawl thei dan dung zui chiat ah kheu kuak ah bawl ahi.

³⁷ Zia tawhbang ma chun a kingaknate chule sawmkhat a bawl ah; a leng ua chu sêk dan kibang, a mêl kibang chiat leh letdan kibang chiat a hiu.

³⁸ Chuleh, sum-eng kisilna kuang le sawmkhat a bawl ah; kisilna kuang pakhat chun tui bath sawmli chiat a dawl hi; kisilna kuangte chu tong li chiat ah lian a hiu; a kingakna sawmkhat chung jel in kisilna kuang chu pakhat jel a um hi.

³⁹ In simlam pang ah chun a ngakna panga a koi ah; panga dang ma chu a In sîk mallam pang ah chun a koi kit ah; chun, tuibêm chu In kilning sim sualam in a koi hi.

⁴⁰ Hiram in kisilna kuangte, vutluaknate, maiphiatna kuangte chu a bawl ah; Hiram chun Lalpa In â ding ah Lengpa Solomon in a bawlsak zosia chu a zo tai.

⁴¹ Khuam pani leh a lêk ah um, bêl gual ah a bawk panite, khuam pani lêk ah bêl gual ah bawk panite tuamna ding lên tawhbang leh;

⁴² lenjem pani ah theibufai za li te, lenjem pakhat â ding ah theibufai gual nite; chuleh, khuamte chung ah um, bawk pani um khû’na dingte;

⁴³ chuleh, a kingakna sawmte leh kingaknate chung ah kisilna kuang sawmte;

⁴⁴ tuibêm pakhat leh tuibêm nuai ah bawngchal sawm leh panite;

⁴⁵ ûm leh belte, vutluate, maiphiat kuangte, ûm leh bêl zosia, Lalpa In â ding ah Lengpa Solomon in Hiram a bawlsakte chu, sum-eng ngen ah kisiam a hiu.

⁴⁶ Jordan phâi ah Sukkoth leh Zarethan kikâl ah bêllei mun ah lengpa’n a sunsak ahi.

⁴⁷ A tam tâkluat ziakin ûm leh bêl zosia chu, Solomon in te’lo in a nusia ah; sum-eng tam dan chu te’sên ding gual ahi puai.

⁴⁸ Solomon in Lalpa In ah matchâk ding, ûm leh bêl zosia chu a bawl ah, sana mâichâm leh a chung ah etsakna vaithum umna sana dawkante le a bawl suak tai.

⁴⁹ Sana thiang thaumei koina dingin mallam pang ah panga, simlam pang ah panga, mun thiangtho sungnung mai lam ah pakchate, thaumeite leh sana châichete chu tawh,

⁵⁰ kuangdalte, thaumei phita chênate, maiphiatna kuangte, thikhaikhawte, sana thiang kopzate, mun thiangpen leh In sungnung kotkhakte â ding leh, Tempul mêlchikna In kotkhakte â dingle a bawl hi.

⁵¹ Tichun, Lengpa Solomon in Lalpa In bawlna a nasep zosia chu a zo thiang tai. Solomon in a pa David in a la lat thiansa thil zosia chu a la lut ah; dangka, sana leh a ûm leh bêlte chu Lalpa In ah gote lak in a koikhawm tai.