1 LENGTE 6 - PATHIAN LEKHABU THIANGTHO (BSI)

Solomon in Tempul A Sakna

¹ Israelte Aigupta ah kipat a hung pawt nung ua kipat a kum za li leh sawmgiatna, Solomon lal kum li’na Ziv tha ah chun, zia chu tha ni’na ahi’n, Lalpa In sak chu a pan ta’n.

² Lalpa â ding ah Lengpa Solomon Insak chu, a dunglam tong sawmguk, a vailam tong sawmni leh a sânlam tong sawmthum ahi.

³ In mai ah hulliap chu a dunglam tong sawmni ahi’n; a In vailam cheng a huap ah, In ah kipat a mai lam tong sawm tiang huap ahi.

⁴ In ah tukvante chu a gu neucha’n a bawl a.

⁵ Chuleh, In bângte leh munthiang kîmvêl ah chun pindante a bawl ah; a kîmvêl ah pindan lian a umsak a;

⁶ a sawng niam pen chu a vailam tong nga, a laita pen chu a vailam tong guk, a pathumna pen chu a vailam tong sagi ahi; Inkamte chu In bâng ah kithun lo dingin In bâng ah kipat pawlam ah do dingin a bawkdok a siam hi.

⁷ In chu suang a kilâkna mun ah sêkzaw sate ngen ah sak a hia; In sak a hi sungsia’n sek leh heicha, ahilo leh, thik matchâkte git him him het ahi puai.

⁸ Insawng laita kot chu In sim lam kâi ah um ahi’n; Insawng laita tiang chu kalbi kikual ah kikal to in, Insawng laita’ kipat chu a pathumna kizuan sek ahi.

⁹ Tichun, In chu a sa’n, a zo tai; Inchung chu sidar thing Insun leh thingpêkte chun a khû a.

¹⁰ Pindante chu In pang kîmvêl in a bawl ah, a sawngte chu tong nga chiat ah sâng ahi; In chu tawh sidar thingzawlte ah kaimat ahi.

¹¹ Tu’hin, Solomon kiang ah Lalpa‘n thu a hun gen a,

¹² “Zia la In sak chungchâng ah hin, ka thuguatte la zui ah, ka dan bawlte la zop ah, ka thupiakte la mat ah la zui chun, la pa David kiang ah ka thutepte nang ah sudet ding ka hi.

¹³ Israel chate lak ah chêng ing ka tin, ka mipi Israelte chu nusia lo ding ka hi,” ti in.

¹⁴ Tichun, Solomon in In chu a sa zo tai.

¹⁵ In bângte sunglam in sidar thingpêkte a dâp ah; In tuang ah kipat In sung tiang in a sunglam ah chun thingpêk a dâp ah; chuleh, Intuang ah chun châk thingpêk a daw hi.

¹⁶ In nunglam kâi ah a sunglam tong sawmni chu châk thingpêkte’n a tuang leh a bâng a bawl ah; munthiang sungnung, mun thiangtho pen ding chu ahi.

¹⁷ Munthiang sungnung mai jawn ah Inpi chu tong sawmli ah sau ahi.

¹⁸ In sung lam ah sidar thingte ah chun ûm leh pakcha palte lim khuak kuak a um ah; a leng in sidar thing ngen ahi’n, suang him him mu ahi puai.

¹⁹ In sungpi lamkâi in munthiang sungnung chu a siam ah, zia chu Pathian thuthung thingkuang koina ding ahi.

²⁰ Munthiang sunglam kâi chu tong sawmni ah sau, tong sawmni ah lian, tong sawmni ah sâng ahi; sana thiang tui a kiluan khum hi. Mâichâm chu le sidar thing ah tuam ahi.

²¹ In sung lam chu Solomon in sana thiang tui a luan khum ah; chun, munthiang sungnung mai ah chun sana thikkhau a kai ah, sana tui a luan khum a.

²² Zia ban ah chun, In pumpi chu a phat bukim theina dingin, In chu a pumpi’n sana tui a luan khum ah; munthiang sung ah mâichâm pumpi chu le sana tui a luan khum hi.

Tempul Sung ah Vante

²³ Munthiang sungnung ah chun, tong sawm gêl ah sâng cherub pani Oliv thing ngen ah kisiam a um hi.

²⁴ Cherub pakhat tha chu tong nga ah sau a hi’n, cherub pakhat zawk tha chule tong nga ah sau ahi; pakhat thamong ah kipat a dang thamong chan chu tong sawm ahi.

²⁵ Cherub pakhat zaw chule tong sawm a hia; cherubte gêl chu a letdan leh a mêl put uh kibang ahi.

²⁶ Cherub pakhat sândan chu tong sawm a hia, a pakhat dang chule zia zat ma chu ahi.

²⁷ Cherubte chu In sungnung lam pen ah a koi ah; cherubte chun a tha’teu a zâk gêl ua; pakhat zawk tha langkhat chun bâng langkhat a si’n, a dang tha langkhat chun bâng langkhat a si kit hi; a tha lailung lam zawk gêl uh chu a kisukha tua ui.

²⁸ Cherubte chule sana tui a kiluan khum hi.

²⁹ In bâng kîmvêl ah chun pindan sunglam leh pawlam in cherubte, tûm thing leh pakcha palte lim a kikhuak thaw a.

³⁰ Pindan sungnung leh pawnung Intuang chu sana tui a kiluan khum a.

³¹ Munthiang sungnung lutna kotkhak chu Oliv thing in a bawl ah; kot luchung leh kotbiangte chu ning nga nei a hiu.

³² Oliv thing kotkhak panite chung ah chun cherubte, tûm thingte leh pakchapal limte a kikhuak thaw ah; ziate chu sana tui a luan khum ah, cherubte leh tûm thingte chule sana tui a luan khum hi.

³³ Zia gual ma chun, Inpi lutna kotbiangte chule Oliv thing in a kibawl ah; ning li nei chiat a hiu,

³⁴ kotkhak panite chu châk thing a hia; kotkhak langkhat ah pek nite chu kithep thei, a langkhat ah pek nite chule kithep thei a hiu.

³⁵ Cherubte, tûmthingte leh pakchapal limte a kikhuak ah, a kikhuak kuakte chung chu sana tui kituak tak ah nu’ in a kiluankhum hi.

³⁶ In huang sungnung chu sidar thing tum, tian khat zel ah suang sêk zawsa pathum kitiang in a kibawl hi.

³⁷ Kum li’na, Ziv tha in Lalpa In dingin suangphûm chu phu a la hi’n.

³⁸ A kum sawm leh khatna, Bul tha ah chun, (zia chu a tha giatna ahi’n,) In chu a tasam zosia leh, a no a nel ah tup gual tak ah zawthian ahi tai. A sakna’n kum sagi sung a lut hi.