1 LENGTE 5 - PATHIAN LEKHABU THIANGTHO (BSI)

Tempul Bawl Ding ah Kisakna leh A Matchâkte

¹ Ziaphatchun, Tura Lengpa Hiram in Solomon chu, a pa thasâng ah leng hiding in sathau a nu’ tau hi ti a het phat in, a kiang in a suakte a sawl ah; Hiram chu David tawh lawipha a la hiu a.

² Solomon in Hiram kiang in zia gual hin thu a thot a:

³ “Ka pa David in, a kîmvêl ah a mêlmate Lalpa‘n a kengpêk nuai ah a koi tiang in a la kidopi ziakin; Lalpa a Pathian min ding ah In a la sak piak thei talo ahi dan la he hen.

⁴ Tu’hin ahileh vang Lalpa ka Pathian in kiltin in muanna ei pia ta’n; kilanpi leh vangsiatna tung le a um diak pua’n.

⁵ Tu’hin, Lalpa ka Pathian min ah In pakhat sak ka tup in, Lalpa‘n ka pa David kiang ah, ‘La chapa, nangma lalchutpha’ la thasâng ah ka chutsak dingpa chun, ka min umna dingin sa ding ahi,’ a la ti gual khan.

⁶ Ziaziakchun, Lebanon ah sidarthingte chu ei sât piak dingin la suakte thu a la pia’n la. La suakte chu ka suakte’n hun seppi intin uh; chuleh, la suakte law ding la ti zat zat hun pia ding ka hi; Sidon mite gual tuk ah thingtum bawlthei ka lak un a um puai ti la he ngal ah,” ti in.

⁷ Hiram in Solomon thugente chu a het phat in nasa tak in a kipak ta’n, “Zia mipi nasa tak mai chung ah vaihawm ding, David kiang ah chapa pil tak pepa Lalpa chu pâk in um hen,” ti’n a gen a.

⁸ Hiram in Solomon kiang in thu a thot ah, “Ka kiang ah la thu hun thot chu ka la he ta’n, sidar thing leh châk thing chungchâng in la poimaw zosia hun pia ding ka hi.

⁹ Lebanon ah kipat in ka suakte’n tuipi tiang hun thak suk intiu in; la mun tepna tiang in tuipi chung ah hung tawl tungsak ing ka tin. Zia kipat chun la kilâk thei ziang dingin hun phelsua piak ing ka. Chuleh, nang in ka Inkuanpite nêk ding pia’n ka poimaw lei piak ding ahi,” ti in.

¹⁰ Tichun, Hiram chun sidar thing leh châk thingte Solomon in a poimaw zosia chu a pia tai.

¹¹ Solomon inle Hiram Inkuante nêk dingin gehu bu te’na Kor sâng sawmni leh, sathau thiang tê’na Kor sawmni a pia tai. Zia chu a kum a kum in Solomon in Hiram kiang in a pia tai.

¹² Tichun, Lalpa‘n a thutep piak gual ngei in Solomon chu pilna a pia’n. Hiram tawh Solomon kikâl in kichamna a um hi; amau teni chun kizopna thuthung le a bawl tau hi.

¹³ Lengpa Solomon in, Israel zosia ah kipat in nasêm ah goi ding mi a lakhawm in; mi sâng sawmthum a zendok hi.

¹⁴ Amau chu Lebanon ah a sawl a; tha khat ah mi sang sawm zel in a kithâksak ah; amau chu Lebanon ah tha khat a um zaw phat ua leh In ah tha ni a um zel ua; nasêm ah a goite enkol dingin Adoniram a pang hi.

¹⁵ Solomon in nasêm mi sîng sagi tawh, tânggam ah suangsêkte sîng giat le a nei hi;

¹⁶ ziate lak ah chun, Solomon nasêmte enthate, nasepna lamkâi ah mawpua leh nasêmte chung ah vaipawte sang thum leh zathumte pang lo a hiu.

¹⁷ Lengpa thupiak dungzui in suang lian leh manpha tak takte chu a hun sêkdok ua; In suangphûm ah dap ziang thei dingin sek tuak diam sa’n a hun paw tung sek ui.

¹⁸ Tichun, Solomon Insa leh Hiram Insate leh Gibli mite chun suangte a sek un, Insakna ding ah thingtumte a guanggal tau hi.