1 LENGTE 4 - PATHIAN LEKHABU THIANGTHO (BSI)

Solomon Vaihawmna Miliante

¹ Lengpa Solomon chu Israelte zosia chung ah leng a hita’n;

² ziate hi a milian neite chu a hiu hi: Zadok chapa Azariah chu thiampu ahi’n;

³ Shisha chapate Elihoreph leh Ahijah chu lekhazik in a pang un; Ahilud chapa Jehoshaphat chu chanchin tepte in a pang hi.

⁴ Jehoiada chapa Benaiah chu sepaite hotu ahi’n; Zadok leh Abiathar chu thiampu a hiu a;

⁵ Nathan chapa Azariah chu hotute chung ah vaihawm ahi’n; Nathan chapa Zabud chu thiampu leh lengpa gualpha ahi;

⁶ Ahishar chu leng In enkol in a pang ah; chuleh, Abda chapa Adoniram chu nasêm ah kigoite chung ah hotu ahi.

⁷ Solomon in hotu sawm leh pani, Israelte zosia chung in a nei ah; amau chun lengpa leh a Insung mite nêk leh châk a ngaitua piak ua; mi tin in kum khat ah tha khat sung chiat a piak khawm ding uh ahi.

⁸ Amau chu ziate hi a hiu: Ephraim tânggam ah Ben-hur;

⁹ Makaz, Shaalbim, Beth-shemesh leh Elon-beth-hanan khua’ Ben-deker;

¹⁰ Aruboth ah Ben-hesed (Sokoh leh Hepher gamkai zosia chu ama â ahi’n;)

¹¹ Naphath-dor zosia ah Ben-abinadab (ama hin Solomon chanu Taphath chu ji’n a nei ah;)

¹² Taanakh, Megiddo leh Beth-shean zosia, zia chu, Jezreel nuai ah Zarethan a um ahi’n, chuleh, Beth-shean ah kipat Abel-meholah, Jokmeam tiang ah chun Ahihud chapa Baana;

¹³ Ramoth-gilead ah Ben-geber (ama chun Manasseh chapa Jair khawneute a chang ah, Gilead ah um chu; Argob le ama â ahi’n; zia chu Bashan ah um ahi’n, sum-eng dawnggawl leh kulbâng nei khawpi lian sawmguk tawh ama â ahi’n;)

¹⁴ Mahanaim ah Iddo chapa Ahinadab;

¹⁵ Naphtali ah Ahimaaz (ama’n Solomon chanu Bashemath chu ji’n a nei ah;)

¹⁶ Asher leh Bealoth ah Hushai chapa Baana;

¹⁷ Issakhar ah Paruah chapa Jehoshaphat;

¹⁸ Benjamin ah Ela chapa Shimei;

¹⁹ Bashan Lengpa Og leh Amorte Lengpa Sihon gam, Gilead gam ah Uri chapa Geber ahi’n. Chun, Judai gam in hotu pakhat bep a um hi.

Solomon Vaihawmna Thupi Dan

²⁰ Judah leh Israelte chu tuipi pang ah piaunêl tawhbang ah tam a hiu a; amau chun a neu ah, a dawn ua, a lim ma ma ziang un.

²¹ Solomon in Euphrates ah kipat Philistinte gam zosia, Aigupta gamgi tiang ah lenggamte zosia chung in vai a hawm ah; amau chun Sia’ a hun chawi ua, Solomon dam sung sia’n a na a sep piak tau hi.

²² Solomon ni khat nêk leh châk chu changbuang Kor te’na sawmthum leh bu Kor te’na sawmguk,

²³ bawngchal thau sawmkhat, gan hon lak ah kipat bawngchal sawmni leh belam za khat ahi’n; zia tilo ah chun sakhi te, sangai te, sakhichal te leh akcha vâkthaute le a hiu.

²⁴ Ama’n Euphrates tumlam gamte zosia, Tiphsah ah kipat Gaza, Euphrates lui ah kipat tumlam kâi ah lengte zosia chung in thu a nei ah; chuleh, a kîmvêl in muanna a um hi.

²⁵ Judah leh Israel chu Solomon dam sung sia’n, Dan ah kipat Beer-sheba tiang in bit tak in a um un; mi tin amau grep buk leh theipi kung nuaite chiat in a um un.

²⁶ Solomon in a sakol kângtalaite â dingin sakol bûk sîng li dim a nei ah, sakol chungchuang mi sang sawm leh ni tawh.

²⁷ Zia ah hotute chun Lengpa Solomon a ding leh Lengpa Solomon dawkan ah hungte zosia nêk leh châk ding chu, mi tin in ama channa tha chiat in a ngaitua piak ua; bangmacha a tâksap sak puau hi.

²⁸ Chuleh, sakolte leh sa taihatte nêk dingin, bupawl leh barli bu mi tin in amau mawpuakna piak ahi dungzui chiat un, a ti’na mun in a hun paw lut chiat sek ui.

Solomon Pilna Minthanna

²⁹ Pathian in Solomon chu pilna lopi tak, hetkhen theinale tuipi pang ah piaunêl gual ah tam leh lian hetna a pia’n,

³⁰ tichun, Solomon pilna chun sua lam mite zosia pilna tawh Aigupta zosia pilna a khûp a.

³¹ Ama chu mi dang zosia sâng in a pil zaw’n, Ezrah mi Ethan leh Mahol chapate Heman, Kalkol leh Darda sâng in a pilzaw’n; a kîmvêl ah gam zosia ah chun a min a thang suak hi.

³² Ama’n thupil sang thum a la gen a; chuleh, a La te cheng chule, sang khat leh panga a ting hi.

³³ Ama’n thingte, Lebanon ah sidar thing bâng ah kekdok leh husop tiangpha’n a gen a; ganchate, vachate, a bok ah vâk te leh sangate thule a gen thei hi.

³⁴ Gam zosia kipat mite chu, Solomon pilna ngaitha dingin a hung ua; lei ah lengte lak ah a pilna thu a la he’kha zosia a hung sek ui.