1 LENGTE 3 - PATHIAN LEKHABU THIANGTHO (BSI)

Solomon in Pilna Don

¹ Solomon in Aigupta Lengpa Pharaoh tawh kichênna kizopna a bawl ah, zia dungzui ah chun Pharaoh chanu a kichênpi a; Jerusalem kulbâng kîmvêl leh Lalpa In leh ama In a zaw masia chu David khawpi’n a umsak tai.

² Zia hun ah chun, Lalpa min ah In a kisak nai lo ziakin mipite chun thoimualte ah chun a kithawi sek ui.

³ Solomon chu thoimual ah gimtui hâl in, kithawi sek maleh, Lalpa a hepi ah, a pa David thuse’te chu a zui hi.

⁴ Lengpa chu Gibeon ah kithawi dingin a chia ah, zia tak chu thoimual lian ahi ngâl ah; zia tak ah mâichâm chung ah chun Solomon in hâlmang thillat sang khat a lân a.

⁵ Gibeon mun ah chun, Solomon kiang in jan ah a mang in Lalpa a hung kilâk ah; Pathian in a kiang in, “Bang a hem ka hun piak ding, don in,” a tia.

⁶ Solomon in, “Ka pa, la suak David ginumna tawh, a dik tatna tawh, thu tak ah la âng ah a um dungzui in lungsiatna lian tak la musak ah, tu’ni tiang ah hin, a lalchutpha chu ding chapa la pia’n, zia nunnemna lian tak chu la vop ahi.

⁷ Tu’hin, aw Lalpa, ka Pathian, ka pa David thasâng dingin la suak hi lengpa’n lei pansak ta’n; keima hi naupang cha ka hi’n, bang gual ah um ding a hem ti him him ka hepuai.

⁸ La suak hi mipi tam tak la doichuam, a tam dan uh simthei lo leh simsên lo lak ah um ahi’n.

⁹ Ziaziakchun, la suak hi la mipite chung ah a dik leh diklo ka khendan theina dingin, vaihawm thiamna ei pia’n. Achutiloleh, zia la mipi nasa tak hi kua’n vaihawm piak thei ding a hem?” a tia.

¹⁰ Zia chu Solomon in a dot ziakin Lalpa a kipak ta’n.

¹¹ Pathian in a kiang in, “La hinna ding a hem, nangma hausakna ding a hem leh la gâlte hinna le don lo in thudik khentheina ding la don zaw’n, zia thil hi la dot ziakin,

¹² la gen gual in ka bawl tai. Ahi, hetkhen theina lunggil leh pilna ka hun pia la hi; la masang in nang gual kuama a la um pua’n, la nung in le kuama nangma gual hung um diak ta pua’n a.

¹³ La dot lo thil dang, hausakna leh za umna le ka hun piak belap la hi; tichun, nangma tuk him him leng kuama a um kha puau hi.

¹⁴ La pa David in a bawl gual ah, ka thupiakte leh ka thuse’te jawm ding ah ka dante la zui chun, la dam sung nite le hun suksau piak ding ka hi,” a tia.

¹⁵ Solomon a hung thawdaw phatin, a mang lam a la hita’n. Jerusalem in a hung ah, Lalpa thuthung thingkuang âng ah chun a ding ah, hâlmang thilatte leh chamna thillatte a la’n ah, a suakte zosia â dingin luaithe’na a siam piak tai.

Vaihawmna Solomon Pilna

¹⁶ Zia nung ah chun, numei pani lengpa kiang ah chun a hung ua, amau chu nawchizuak a hiu ah; a ma-âng in a hung ding tau a.

¹⁷ Numei pakhat zawk chun, “Aw, ka lalpa, kei leh zia numeinu hi In khat ah um khawm ka hiu ah, ama tawh In khat ah ka um khawm lai un nau ka nei in;

¹⁸ nau ka nei nung ni thum ni chun, zia numei hinle nau a hun nei ah, a um khawm ka hiu in; kei uh teni tilo midang zia In ah chun a um puau a.

¹⁹ Jan kâl in a cha chu a del lum ta’n.

²⁰ Jankhang lai ah chun a thodok ah, la suaknu hi ka i-mut kâl in ka kiang ah kipat ka chapa chu a la’n, a âng in a sial ah; ama cha thisa chu kei kiang in a hung sial a.

²¹ Ka cha kaitua ding ah jingkal ah ka vak thaw phatin, a thisa a la hi ta’n. Himaleh, jingkal ah chun ka et leh, keima chapa kha a hita puai,” a tia.

²² Numei khat zawknu chun, “Ahi puai, nausen hing zaw hi kei chapa a hi’n, a thisa hi nang chapa ahi,” a tia. Zia gual chun lengpa âng in a kinial tau a.

²³ Ziaphatchun, lengpa chun, “Pakhat in a hing zaw hi kei chapa a hi’n, a thisa hi nang chapa ahi a ti’n; pakhat kit chun, ei puai, nausen thi zawk chu nang chapa ahi’n, a hing chu kei chapa a hizawi, a ti’n” ti in a gen a.

²⁴ Ziaphatchun, lengpa chun, “Chemjam hun la tiam un,” a tia. Lengpa âng ah chun chemjam a hun la tau a.

²⁵ Lengpa chun, “Nausen hing chu pani suau inla, khat kiang ah chun a kimkhat piau inla, a dang kiang ah chun a kimkhat chu piau in,” a tia.

²⁶ Ziaphatchun, nausen hing neinu chun, a cha chu a lainat ma ma ziakin, lengpa kiang in, “Aw, ka lalpa, nausen hing chu that him him kin la, amanu chu pia zaw mai ta’n,” a hun tia. Himaleh, khat zaw’nu chun, “Ahi, kei â le hi diak ki’hen la, ama â le hi diak ki’hen, kim khen mai in,” a hun tia.

²⁷ Ziaphatchun, lengpa chun a hun dawnhu ah, “Nausen hing chu that kiu inla, numei masa zaw’nu chu pia tau in. Amanu chu a nu tak tak chu ahi ngâl a,” a ti tai.

²⁸ Israel zosia chun lengpa thutan dan chu a la hiau ah, lengpa chu a ja zaw diak tau hi; thu dik tak ah tantheina ding ah Pathian pilna chu ama ah a um hi ti a mu tau hi.