1 LENGTE 21 - PATHIAN LEKHABU THIANGTHO (BSI)

Naboth Grep Huan Thu

¹ Zia nung ah chun zia gual hin a hung um a: Jezreel mi Naboth chun Jezreel ah, Israel Lengpa Ahab lal In kiang ah grep huan pakhat a nei a.

² Ahab in Naboth kiang in, “La grep huan hi ka In kiang cha’ um a hiziak in, thâi huan ah ka bawl dingin ei pia’n; zia thasâng dingin grep huan phazaw pakhat hun pena’ng ka; ahiloleh, nang in pha la sak chun, a man tawh kigûn sum hun pia’ng ka,” a tia.

³ Himaleh, Naboth in Ahab kiang in, “Ka pu leh pate go ei nutsiau hi nang ka hun piak ding chu Lalpa‘n a phal puai,” a tia.

⁴ Jezreel mi Naboth in, “Ka pu leh pate go ei nutsia hi hun pe pua’ng ka,” a ti ziak chun, Lengpa Ahab chu lungawi lo tak leh ngui tak in In lam in a chia tai.

⁵ A ji Jezebel chu a kiang in a hung ah, “An ne lo ding khop ah bangziak ah chuti lungngai la hem?” ti’n a dong a.

⁶ Amanu kiang ah chun, “Jezreel mi Naboth kiang in, ‘La grep huan hi sum in ei chawksak in; ahiloleh, la nopzawk leh, grep huan dang a thasâng in hun pia’ng ka,’ ti’n ka don ah; himaleh, ama’n, ‘Ka grep huan nang hun pepua’ng ka,’ ti’n ei dawnhu hi,” a tia.

⁷ A ji Jezebel in a kiang in, “Tu’hin Israelte chung ah hotu la hi pua a hem? Thodok in an ne’n la, kipak tak in um in; Jezreel mi Naboth grep huan chu hun pia ding ka hi,” a tia.

⁸ Ahab min in lekhathot a zik ah, a suai a nam ah; Naboth tawh khawpi chêng upate leh miliante kiang in lekhathotte chu a thot tai.

⁹ Lekhathot ah chun, “Anngawl thu puang unla, Naboth chu a kikhawmte lak ah hotu’n chutsak un;

¹⁰ milepchia pani a âng zawn in chutsak unla, amau chun zia gual hin a mawna thu gendawsak un, ‘nang in Pathian leh Lengpa la gensia ahi,’ ti sak unla. Ziazaw chuleh, puidok unla, suang in seplum un,” ti in a zik a.

¹¹ A khawpi chêng pawsalte, upate leh miliante chun Jezebel in a kiang ua thu a thot gual in a bawl tau a;

¹² anngawl thu a puang tau a; chuleh, Naboth chu a kikhawmte ma-âng in a kichutsak tau a.

¹³ Mi lepchia pani chu a hung ua, a âng zawn in a kichuu ah; chuleh, mipite âng ah chun mi lepchiate chun ama mawsak in thu a hun gen tau a: “Naboth in Pathian leh Lengpa gensia ahi,” a tiu a. Tichun, ama chu khawpi pawlam in a puidok ua, suang in a seplum tau hi.

¹⁴ Ziazaw chun Jezebel kiang in, “Naboth chu suang ah se a hita’n, a thi tai,” ti’n thu a vahilsak tau a.

¹⁵ Jezebel in Naboth chu suang ah se a hita’n, a thi tai ti a het phat in, Ahab kiang in, “Jezreel mi Naboth grep huan, ama’n sum ah a hun chawksak nop lo kha vakichan ta’n; Naboth chu a hing ta pua’n, a thi tai,” a tia.

¹⁶ Ahab in Naboth a thi tai ti a het phat in, a kipan ah, Jezreel mi Naboth grep huan vakichan dingin a chia suk tai.

Pathian Vaihawmna Elijah in Gen lang

¹⁷ Ziaphatchun, Tishbi mi Elijah kiang in Lalpa‘n thu a hun gen a:

¹⁸ Samaria ah vaihawm, Israelte Lengpa Ahab lamtua dingin vachia suk in; ama chu tu’hin Naboth grep huan ah, zia chu kichan ding ah um ahi.

¹⁹ A kiang ah zia gual hin la gen ding ahi: “Lalpa‘n zia gual hin a gen hi: La that ta’n; chuleh, la kichan a hita maw?” ti’n. A kiang in, “Lalpa‘n zia gual hin a gen hi: Uichate’n Naboth thisan a la liakna mun ua khan, nangma thisan le uichate’n liak ding a hiu,” ti in.

²⁰ Ahab in Elijah kiang in, “Lei mudok tai maw, aw ka mêlmapa?” a tia. Ama chun a dawnhu a, “Ka hun mudok tai! Lalpa mit mu ah thil phalo bawl ding ah la kizokdaw tâk ziakin,

²¹ la chung ah siatna hun tut ding ka hi; hun val zo ing ka tin, chuleh Israel gam ah Ahab mi pawsal zosia, suak hi’n mi zalen hileule hi’mangthai ding ka hi;

²² chuleh, keima lei choklungna, Israel le la sukgitlo tâk ziakin, la Inkuante chu Nebat chapa Jeroboam Inkuan gual leh Ahijah chapa Baasha Inkuan gual ah bawl ding ka hi.

²³ Chuleh, Jezebel chungchâng Lalpa‘n zia gual hin a gen hi: ‘Jezreel in a huapna sung ngei in uichate’n Jezebel hun ne ding a hiu,’ ti in.

²⁴ Ahab mite, khawpi sung ah thi zosia chu uichate’n ne’n tin uh; chuleh, ama mi, khawpi pawlam ah thi taphot chu chung ah leng vachate’n ne ding a hiu,” ti in.

²⁵ (Ahi ngei hi, Ahab gual ah a ji Jezebel in a nunmu, Lalpa mit mu ah thil phalo bawl ding ah kizuakdok hi kuama a um kha nai puai.

²⁶ Lalpa‘n Israelte masang ah a la nawdawsa Amor mite’n a la bawl gual un, ama’n milimte nung a zui ah, polche tak in thil a la bawl ta ahi.)

²⁷ Ahab in zia thute chu a het phat in, a puante chu a botthêk ah, saidip puan a sil ah; an a ngawl ah, saidip puan chung in a lum ah, dâ mêl pu tak kawm in a vâk vêl vêl tai.

²⁸ Ziaphatchun, Tishbi mi Elijah kiang in Lalpa‘n thu a hun gen a:

²⁹ “Ka ma-âng ah Ahab a kingainiam tak dan saw la mu em? Ka ma-âng ah a kingainiam tâk ziakin, ama dam sung sia’n siatna chu hun tung sak lo ding ka hi; himaleh, a chapa dam sung in a Inkuan ah siatna tunsak ding ka hi,” a tii, ti’n a gen tai.