1 LENGTE 19 - PATHIAN LEKHABU THIANGTHO (BSI)

Jezebel Lau ah Elijah A Jammangna

¹ Ahab in Elijah thilbawl zosia leh, jawlneite zosia chemjam ah a tha dan chu Jezebel a hil ta’n.

² Ziaphatchun, Jezebel in thupawtu pakhat Elijah kiang in a sawl a, “Jing ah tu’hun phat hileh amau hinna gual ah la hinna ka bawl lo ngei ngei leh, pathiante chun kei ei chuti bawl in, a khawk zaw’n le ei bawl uh hen,” ti’n a vagensak a.

³ Ziaphatchun, a lau ah; a kipan ah a hinna dingin a jam mang ah, Judai gam ah Beer-sheba lam in a hung ah; zia tak ah chun a suakpa a nusia tai.

⁴ Himaleh, ama chu gamthip sung ah nikhat lamzawt tiang a chia ah, munphi thingbul in a kichu tai. A thi’na dingin a don ah: “A hun tawk tai; tu’hin, aw Lalpa, ka hinna lamang ta’n, ka pu leh pate sâng in ka phazaw diak paw’ngal in,” ti in.

⁵ Ziazaw chun, munphi thingbul ah chun a lum ah a ipmu tai. Tha khat in vansawlchâk in a hun khoi ah, a kiang in, “Tho inla, ne’n,” a tia.

⁶ A vak et leh a luchang zawnah chun suang âm ah kikang vaithum tawh, tui thawl khat a um ah. A ne, a dawn ah, a lum kit tai.

⁷ A niveina’n Lalpa vansawlchâk a hung kit ah; a hung khoi ah, “Tho inla, ne’n, achutiloleh la zinna ding hi tung zo lo ding la hi,” a tia.

⁸ A tho ah, a ne’ a dawn tai; zia a an nêk in a hatsakna jal ah chun, ni sawmli leh jan sawmli, Pathian tâng Horeb tiang in a chia tai.

⁹ Zia mun ah chun kawlhawm pakhat in a lut ah a giak tai. Ziaphatchun, a kiang in Lalpa‘n thu a hun gen a, “Elijah, zia tak ah hi bang bawl la hem?” a hun tia.

¹⁰ Ama chun a dawnhu a, “Lalpa, sepai honte Pathian â dingin phatchuam ka la ngai ma ma in; Israel chate’n la thuthung a nusia tau ah, la mâichâmte a suchim ua, la jawlneite le chemjam in a that tau hi. Kei bep hi ka um ta’n; chuleh, ka hinna hi lakmang dingin a hawl nalai ui,” a tia.

Elijah in Horeb tâng ah Pathian A Kituakpina

¹¹ A kiang in, “Pawtdok inla, tâng chung ah sawn Lalpa âng ah vading in, Lalpa‘n hun hawtheng ding ahi,” a tia. Zia chun hui hât tak in a hung hang a, Lalpa âng ah chun tângte chu a mût kêk ah, suangpite chule a mût phel tai; himaleh, hui ah chun Lalpa a um puai; chun, hui hân zaw ah chun lîn a hung lîng ah; himaleh, linlîng ah chunle Lalpa a um puai;

¹² chuleh, linlîn nung in meikuang a hung um ah; himaleh, meikuangah chun Lalpa a um diak pua; chuleh, meikuang nung ah chun aw ngâtcha a hung um a.

¹³ Elijah chun zia aw chu a het phat in, a puanâk chual mong in a mai a tuam ah, a pawtdok ah kawlhawm kot ah chun a vading tai. Ziaphat chun, a kiang in aw chun, “Elijah, zia hi bang bawl la hem?” ti’n a hun hoah.

¹⁴ Ama chun a dawnhu a, “Lalpa, sepai honte Pathian â dingin phatchuam ka la ngai ma ma in; Israel chate’n la thuthung nusia in, la mâichâmte a suchim un, la jawlneite le chemjam in a that tau hi. Kei bep ka um ta’n; chuleh, kei hinna le lakmang dingin a hawl nalai ui,” ti’n a dawnhu a.

¹⁵ Ziaphat chun, Lalpa‘n a kiang in, “Chia in, la hungna Damaska gamthip lam ah kile’kit in; la tun phat leh, Hazael chu Aram ah leng ah pang dingin sathaunu’ in.

¹⁶ Chuleh, Nimshi chapa Jehu chu Israelte chung ah leng dingin sathau la nu’ ding ahi; chuleh, Abel-maholah ah um Shaphat chapa Elisha chu la thasâng ah jawlnei hi dingin sathau la nu’ ding ahi.

¹⁷ Hazael chemjam ah kipat suakcha taphot chu Jehu in that intin; Jehu chemjam ah suakcha taphot chu Elisha in that ding ahi.

¹⁸ Ahi’n la, Israelte lak ah, Baal âng ah khiangkho kha nai lo leh, ama chawp kha nai lo sang sagi khekcha nalai ka hi,” a tia.

Elisha in Elijah Nung A Zuina

¹⁹ Tichun, zia kipat chun a kipandok ah, Shaphat chapa Elisha loukai lai chu a vamu ta’n. A ma-âng in bawngchal ngawngkol kitua sawm leh khat a um un; ama chun a sawm leh ni’na chun lou a kai ah. Elijah chun a kiang a vahaw ah, a puanâkchual chu a se’khum tai.

²⁰ Bawngchalte chu nusia in, Elijah a delzui ah, a kiang in, “Ka pa tawh ka nu ei vachawpsak phot in, ziazaw chuleh hun zui ing ka,” a tia. Ziaphatchun, Elijah chun a kiang in, “Chia kit mai in; bang ka hun lawah a hem?” a tia.

²¹ A nungzui lai a kile’kit ah, bawngchal ngawngkol pawlaite chu a la, a that tai; bawngchalte van matchâk haw ah chun a sau a huan ah; tichun, mipite chu a pia, a ne tau a. Ziazaw chun, a kipan ah Elijah nung a zui ta’n, a suak in a pang tai.