1 LENGTE 12 - PATHIAN LEKHABU THIANGTHO (BSI)

Mallam ah Namte Kichuamse’na

¹ Israelte zosia’n Rehoboam chu leng ah siam dingin, Shekhem ah a hung tâk ziak un, Rehoboam chule Shekhem ah a vachia tai.

² Nebat chapa Jeroboam in zia chu a het phat in (ama chu Lengpa Solomon kiang ah kipat a jamna Aigupta gam ah um nalai ahi’n;) Jeroboam chu Aigupta gam ah kipat a hung kile’kit a.

³ A va kosak phat un, Jeroboam leh Israel kipung khawmte chu Rehoboam kiang in a hung ua, a kiang in,

⁴ “La pa’n ka puak uh a sugik ta luai. Ziaziakchun, tu’hin la pa na ka sep piak uh haksate hi tawh ka puakgik ei puaksak hi sujang in; chutileh, la na sêm ing kau,” a tiu a.

⁵ Ama chun a kiang un, “Ni thum sung a la kikangdok tadiu inla, zia tak chuleh ka kiang ah hung kit un,” a tia. Tichun, mipi chu a chia mang tau hi.

⁶ A pa Solomon dam lai ah a nasêm sek a sâng ah upa zawte chu Rehoboam in a dong ah, a kiang un, “Zia mipi hi bangti’n dawnhu leng lei tiu em?” ti’n a dong a.

⁷ Amau chun a kiang in, “Tu’hin zia mipite suak ah la pan ah, a nau la sep ah, amau la dawnhu phat leh, thupha cha cha la gen chun, kumkhua’n amau chu la suak hi mai ding a hiu,” ti’n a dawnhu tau a.

⁸ Himaleh, a sâng ah upazawte thuhilna chu ngaisak lo in, a khangualpi, ama nasêm lai tangvalte chu a dong a.

⁹ A kiang un, “Ka kiang ah, ‘La pa’n puakgik ei puaksak hi sujang in,’ ti’ ah hung gen, zia mipite hi bangti’n dawnhu leng lei tiu em?” ti’n a dong a.

¹⁰ A la khangualpi tangvalte chun a kiang in, “Zia mipi, la kiang ah, ‘La pa’n ka puak uh a sugik ta luai; himaleh, nang in lei sukjang piak ding ahi,’ hung tite kiang ah chun, zia gual hin gen in, ‘Ka pa kawng sâng in ka khutme a kho zawi.

¹¹ Tu’hin, ka pa khan puakgik a hun koikhum ah; ke’n la puakgik uh belap ding ka hi. Ka pa khan molkang in a hun thunun hi; himaleh, ke’n ainuvet in hun thunun ding ka hi,’ ti’n,” a tiu in.

¹² Tichun, lengpa chun, “Ni thum zaw leh ka kiang ah hung kit un,” a la ti gual ngei in, Jeroboam tawh mipi zosia chu a ni thum ni chun Rehoboam kiang in a hung kit tau a.

¹³ Lengpa chun a sâng ah upazawte thuhilna chu limsak talo in, mipite chu khau tak in a la dawnhu tai.

¹⁴ Tangvalte thuhil dungzui in, a kiang un, “Ka pa khan la puakgik uh a sugik in; himaleh, keima’n la puakgik uh belap ding ka hi; ka pa khan molkang in a hun thunun ah; keima’n vang, ainuvet in hun thunun ding ka hi,” ti’n a gen tai.

¹⁵ Tichun, Nebat chapa Jeroboam kiang ah, Shilon mi jawlnei Ahijah kiang ah Lalpa‘n thu a la gen a guitun theina ding ah; Lalpa ah kipat thil hung um ahiziak in, lengpa chun mipite lungtup chu a ngaisak ta puai.

¹⁶ Israelte zosia chun lengpa’n amau a ngaisak puai ti a het phat un, mipite chun lengpa kiang in, “David ah pat bang chan I nei ua a hem? Jesse chapa ah gochan bangma I nei puau hi. Aw Israelte haw, la puanbûk lam un chia kit tau in! Aw David, la Inkuan ki-etphat mai in,” ti’n a dawnhu tau a. Tichun, Israelte chu a puanbûk lam chiat un a kihemdok zo tau hi.

¹⁷ Himaleh, Judai gam ah khawneu ah chêng, Israel mite chung in Rehoboam in vai a hawm tai.

¹⁸ Lengpa Rehoboam in nasêm ah a goite chung ah hotu, Adoram a vasawl phatin, Israelte zosia’n suang in a la seplum tau a. Ziaphat ah chun Lengpa Rehoboam chu kin tak in a sakol ah chuang in, Jerusalem lam in a jam mang tai.

¹⁹ Tichun, tu’ni tiang hin Israelte chu David Inkuan do in a hel den tau hi.

Leng Inkuan Khatna: Jeroboam in Israelte Chung ah Vaihawm

²⁰ Israelte zosia’n Jeroboam a hung kile’kit tai ti a het phat un, a kikhopnau ah a vakosak un; chuleh, Israelte zosia chung ah leng in a siam tau hi. Judah nam tilo ngal mi pakhat cha’nle David Inkuan a zui ta puau hi.

²¹ Rehoboam chu Jerusalem khua a tun phatin, Judah Inkuan zosia tawh Benjamin nam lak ah sepai têlchuam nuai khat leh sîng giat a ko khawm ah, Israel Inkuan do ah, lenggam chu Solomon chapa Rehoboam kiang ah la lut kit dingin a kai khawm tai.

²² Himaleh, Pathian mi Shemaiah kiang in Pathian in thu a hun gen a:

²³ Solomon chapa Judai gam ah Lengpa Rehoboam kiang leh, Judah leh Benjamin Inkuan zosia leh mipi um nalaite kiang in zia gual hin vagen in:

²⁴ “Lalpa‘n zia gual hin a gen hi: Kuan to kiu in; chuleh, la chanau Israel mite chu la do lo diu ahi. Mi zosia a In lam chiat ah chia tau in; zia thil hi kei ah kipat a hi’ngal a,” ti in. Tichun, Lalpa thu chu a ngaisak ua, Lalpa thu dungzui in In lam ah a chia kit tau hi.

Jeroboam Sana Bawngno Lim

²⁵ Ziaphatchun, Jeroboam in Ephraim tânggam ah Shekhem khua a sat ah; zia khua chun a chêngden tai; zia kipat chun a pawtdok ah, Penuel khua a sat kit a;

²⁶ chuleh, Jeroboam in, “Lenggam hi David Inkuan lam ah lut kit ziang thei ahi’n.

²⁷ Zia mipite hi Jerusalem ah Lalpa In ah kithoinate lân ding ah a chia to zing ua chun, a lungthim uh a hotupau, Judai gam ah Lengpa Rehoboam lam in kihei kit intin; kei ei that in, Judai gam ah Lengpa Rehoboam kiang ah kile’kit ziang kha’n au,” ti’n a ngaitua a.

²⁸ Tichun, lengpa chun, midangte lemguatpina dungzui in, sana bawngno lim pani a siam a. Mipite kiang ah chun, “Jerusalem ah la chiatonau kha a sawt tho tai. Aw Israel, la Pathianteu, Aigupta gam ah kipat hun puidokte chu ziate hi a hiu,” a tia.

²⁹ Pakhat Bethel in a tungah, khatzaw chu Dan ah a koi tai.

³⁰ Zia thil chu a gitlona bulpi a hung hita’n, mipite chu Bethel ah um zaw ho ding leh khatzaw ho dingin, Dan lam tiang in a chia tau hi.

³¹ Ama chun thoimualte ah chun Inte a sa’n, Levi mi hilo mi vantang lak ah kipat in thiampu dingte a koi tai.

³² Judai gam ah Kût um tawh kituak in, Jeroboam in a thagiatna ni sawm leh ngani chun Kût pakhat a guatah; tichun, mâichâm ah chun kithoinate a lân tai; ama bawngno siamte kiang ah chun kithoinate chu a lân ah, Bethel ah chunle zia gual ah chun a bawl tai.

³³ Ama ma chun a guat kawm, tha giatna ni sawm leh nga ni chun Bethel ah a mâichâm siam ah chun a vachia to ah; Israel mite â dingin kût pakhat a guat piak ah; tichun, mâichâm ah chun gimtui lân dingin a chia to tai.