1 KORINTH 9 - PATHIAN LEKHABU THIANGTHO (BSI)

Sawlchâk Thuneina

¹ Zalen hilo ka hem? Sawlchâk hilo ka hem? I Lalpa Jesu mu hi talo ka hem? Nanghaw chu Lalpa a ka sep ga hilo la hiu em?

² Midangte â dingin sawlchâk hilo lengle, nang uh â ding bêk in ka hi; Lalpa ah sawlchâk ka hi’na tepte’na chu nangmau hi la hiu hi.

³ Ei ze-ette ka dawnhuna chu zia hi ahi:

⁴ Ne leh dawn dingin thu ka nei puau ah a hem?

⁵ Sawlchâk dangte, Lalpa suapite leh Kipha gual in ji gingtu pui vêl vêl dingin thu ka nei pua a hem?

⁶ Ahiloleh, keimau kivâkna ding ah khut ah nasem lo dingin, kei leh Barnaba’n thu ka neilo diak ua a hem?

⁷ Kua’n ama kivâk in gâl a kap ngai em? Kua’n a ga nelo in grep huan a bawl ngai em? Ahiloleh, kua’n gan nawitui nelo in gan-gual a ching ngai em?

⁸ Zia thute hi mihing thuneina ka gen a hem? Dan thu’n le zia ngei chu a gen hilo a hem?

⁹ Mosi dan lekhabu ah chun, “Bawngchal in bu a chil lai in a mûk kân kin,” ti zik ahi. Pathian in bawngchal â ding bep a ngaitua a hem?

¹⁰ Eimau â ding ah gen hilo a hem? Hi e, eimau â ding ah zik a hi; lou kaipa chun kinepna nei in kai ding ahi, buvawpa chunle chan nei ding kinem in a vaw ding ahi.

¹¹ Thagau lam thilpha la kiang ua ka tû tak ua leh, la taksa lam thilteu chu ki-ât mai leng uh, zia chu tam talua ding a hem?

¹² Midang in bawn la chung ua thu a nei ua leh, kei un nei zaw diak lo ding ka hiu em? Ahi’n la, zia thuneina chu ka mang puau hi; Khrista Chanchinpha ka dâl lona ding un bangkim ka thuak ham ham zawu hi.

¹³ Tempul nasemte’n tempul ah thil a nêk leh, mâichâm nasemte’n mâichâm thillatte ah chanvo a nei ui ti helo la hiu em?

¹⁴ Zia gual ma chun, Lalpa‘n Chanchinpha gente chu Chanchinpha ah nêk mu di’n a guat ahi.

¹⁵ Ahi’n la, zia thuneinate chu pakhat chale ka mang puai; ka chung ah zia gual chu la bawlna ding ua ka hun zik ahi pua’n; ka kisuanpi ei lâkpiak sâng un thi zaw mai ing ka!

¹⁶ Chanchinpha hi gen maleng zia chu ka kisaktheipi ding ahi puai, bawl makmaw ka chung in a kinga tangal a. Chanchinpha ka gen lo chun ka chung a gik hi!

¹⁷ Zia chu keima thu ah ka hi chun, kipakman ka nei hi; himaleh, keima thu ahiloleh chu sawl ah um hiding ka hi.

¹⁸ Ka kipakman chu bang a hem leh? A man bei ah Chanchinpha ka gen ah, Chanchinpha ah ka thuneina ka mat theina chu ahi.

¹⁹ Kuama suak hilo maleng, a tam zaw ka lâk lut theina dingin, mi zosia suak in ka kisiam tai.

²⁰ Judate ka lâk lut theina dingin, Judate lak in Juda mi gual in ka um a. Dan nuai ah umte ka lâk lut theina dingin, Dan nuai ah umte lak in (Dan nuai ah um hilo maleng,) Dan nuai ah um gual in ka um sek hi.

²¹ Dan neilote ka lâk lut theina dingin, (Pathian dan awi lo diak lo in, Khrista dan zawm zing ngal in) dan neilote lak in, dan neilo gual in ka um sek hi.

²² A jawngkhalte ka lâk lut theina dingin, a jawngkhalte kiang in jawngkhal gual in ka um sek hi. Bangti a hem ah khenkhat bêk ka hukdaw theina dingin, mi zosia kiang in bangkim ka hi tai.

²³ Chanchinpha ziakin zia zosia chu ka hisek ah, a maljawlnate ka chan sam theina ding in.

²⁴ Kitaitekte chun a leng un tai maleu, pakhat bep in kipakman a mu sek hi ti helo la hiu em? La mutheina ding un tai un.

²⁵ Gualsiak kidemna ah pang mi chu bangkim in a kithunun sek un; amau chun lallukhuk sethei mu dingin a bawl un, eihaw’n vang a setheilo mu dingin I pang uh ahi.

²⁶ Chutichun, tup mumal neilo ah tai ka hipua’n, beingawn mai mai phu gual inle ka bawl diak puai;

²⁷ himaleh, midangte kiang ah ka tângkopi nung ah paithâk ah ka um lona ding in, ka taksa hi sawizoi in ka thunun sek ahi.