1 KORINTH 8 - PATHIAN LEKHABU THIANGTHO (BSI)

Milim Hona Thillat

¹ Tu’hin, milim hona thillat khoi thu ah chun: “Hetna I nei chiat ui,” ti I hiau hi. Hetna’n mi a uansak sek a; himaleh, hepina’n mi a tung ding zaw sek hi.

² Kua’nle thil ka hia’i a kiti chun, a het ding tak chu henai lo ahi.

³ Min Pathian a hepi chun ama ngei chu het in a um zaw ahi.

⁴ Milim hona kithoina thillat nêk thu ah chun, “Khawvel milimte hi bangma ahi puai,” ti leh, “Pathian pakhat beplo ngal chu a dang a um puai,” ti I hechiat ui.

⁵ Van ah a hem, lei ah a hem Pathian min pu um maleu, zia gual pathiante leh lalte tam tak chu a um him un;

⁶ eimau â dingin vang Pathian pakhat bep a um ah, ama chu thil zosia siampa leh eimau le ama ah I umnau Pa chu ahi’n; ama jal ah thil zosia siam ah um leh, ama ziak ah I hinnau, Lalpa Jesu Khrista pakhat bep chu a um hi.

⁷ Himaleh, zia hetna chu mi zosia’n a nei puau hi. Khenkhat milim hosa him a hiziak un, milim ho ah kithoina gual in a ne sek nalai un; tichun, a sia leh pha hetnau hat lo chu a hi’buak sek ui.

⁸ An hin Pathian ei naisak pua’n tin. Nelo lehinle I siatpi pua’n, ne lehinle I phatpi diak puai.

⁹ Himaleh, zia la zalennau chu mi hatlote â ding ah pûkna a hung hi’ lona ding in chingthei un.

¹⁰ Nangma hetna nei, mi sia leh pha hetna nei tawmte’n milim hona Insung ah la nêk hung mu taleu, ama sia leh pha hetna jawngkhal chu milim hona sa ne ding ah tîlhang hi talo ding la hem?

¹¹ Tichun, la hetna ziak ah chun, ama â ding ah Khrista thi ta, la suapi chu la manthaisak tai.

¹² La suapiteu chung ah thil la hi’khial ua, a sia leh pha hetnau hat lo chu la sukliam uh chun, Khrista chung ah thil hi’khial la hiu hi.

¹³ Ziaziakchun, nêk leh châk ziak ah pûk a hiu chun, pakhat pûkna ding ka hi sâng in, sa nelo in um zaw mai ing ka.