1 KORINTH 7 - PATHIAN LEKHABU THIANGTHO (BSI)

Kichênna leh Kinolna thu

¹ La thil hun zikteu kha ahileh, pawsal chun numei sukkhak lo a phai.

² Ahi’n la, thanhuainate a um sek ziakin pawsal in ji kinei chuam hen la, numei inle pawsal kinei chiat uh hen.

³ Pawsal chun a ji kiang in a chan ding pia hen; zia gual ma chun, numei inle a pawsal chan ding pia hen.

⁴ Ji chun a taksa chung in thu a nei pua’n, a pawsal in thu a nei zawi; zia gual ma chun pawsal inle ama taksa chung in thu a nei pua’n, a ji’n thu a nei zaw ahi.

⁵ Pauchap ding ah la kipiak theina ding un leh, la kivop kit theina ding un, sawt lo cha sung ding ah pha lasak gêl uh a hilo ngal leh, kuama kikâk in um kiu in; chutilochun, kisûm zo lo in Setan in hun thêm kha’n a.

⁶ Ahi’n, zia hi thupiak gual in ka gen pua’n, khawksak ziakin ka gen zaw ahi.

⁷ Mi zosia keima gual in um chiat leu ka nuam in. Ahi’n la, mitin in Pathian kiang ah kipat thilpiak chuam chuam a mu chiat ui; pakhat in a chuam, pakhat in a chuam ma’n a muu hi.

⁸ Tu’hin kicheng nailote leh meithâite chu keima gual hin um mai leu ka ti ahi.

⁹ Himaleh, a kisûm zaw lo ua leh chu kicheng mai uh hen. Huk sâng in kichen a pha zawi.

¹⁰ A kichengsate kiang in zia thu hi ka pia ahi: keima thu hilo in, Lalpa thupiak ahi zawi: ji chun a pawsal khen ki’hen la;

¹¹ (a khen ngal leh pawsal nei kit ki’hen; ahiloleh, a pawsal ma tawh kicham kit uh hen) pawsal inle a ji nol ki’hen.

¹² A dangte kiang in: Lalpa hilo in keima’n thu ka gen ahi Suapi kua’nle ginglo mi ji’n nei taleh, ama chu lungdam tak ah a kiang ah a um nop phot chun nol ki’hen.

¹³ Chun, numei in ginglo mi pawsal a nei chun, a pawsal a kiang ah um ah, chêng khawm a nop phot nâk chun nol ki’hen.

¹⁴ Pawsal ginglo mi chu a ji vang in hi’thiantho in a um in, ginglo mi a ji chu a pawsal ziakin hi’thiantho in a um hi. Chutilochun, la chateu chu buak in au; ahi’n la, a thiangtho zing nau hi.

¹⁵ Ahi’n, a ginglo zawk chun a khen leh vang kikhen den mai uh hen; zia gual thil ah chun suapipa a hem suapinu a hem chu kânin a um puai. Pathian in kicham dingin ei ko ahi.

¹⁶ Aw ji, la pawsal la hukhin leh hukhin lo ding la hia a hem? Aw pawsal, la ji la hukhin leh hukhin lo ding la hia a hem?

Pathian Kona Gual ah Um

¹⁷ Banghitaleh, Lalpa‘n mi zosia a pui dan gual leh, Pathian in a kona gual chiat in um tau hen. Zia gual ah chun kochuam pawl zosia kiang in dan thu ka thung tai.

¹⁸ Zektansa ah ko la um awm? Zektanlo gual in hung um gaw diak kiu hen. Zektanlo ah ko la um awm? Zektan ding gaw diak ki’hen.

¹⁹ Zektan hi bangma ahipua’n, zektanlo le bangma ahi diak puai; Pathian thupiakte zop hi a poimaw zaw ahi.

²⁰ Ziaziakchun, mi ko ah a um lai tak ah ahi’na gual in um den mai hen.

²¹ Suak hilai ah ko la hi em? Zia chu khawksa kin. Zia gual ah um chu lemchâng sa mai in.

²² Suak hikawm ah Lalpa‘n a ko chu, Lalpa ah mi zalen a hizing tho a; mi a zalen lai ah Khrista suak hi ding ah ko ah a um gual chu ahi.

²³ Man piak ah chawksa la hitau hi; mihing suak in lut kit ta kiu in.

²⁴ Suapite haw, ko ah la um lai tak ua la dinmun ua khan Pathian ah chun um zing tau in.

Kichenpi Neilote leh Meithâite

²⁵ Tu’hin, nungak thiangthote chungchâng in Lalpa thupiak him ka nei puai; ahi’n, muan um ding ah Lalpa‘n hepina ei piak ziakin ka ngaidan gen ing ka.

²⁶ Tu’lai haksatnate hi ngaitua zing kawm in, la hi’na dan dan un um mai un, ka ti ahi.

²⁷ Ji ah kân la hi em? Kithapna ding hawl kin. Ji neilo ah zalen la hi em? Ji hawl kin.

²⁸ Himaleh, ji la nei chun la hi’khial puai, nungak thiangtho in le pawsal a nei chun a hi’khial diak puai. Ahi’n la, zia gual mite chun taksa khawsakna ah buaina hau in au; ken vang thoksak lo ding ka nuam hi.

²⁹ Suapite haw, hun a chom tai ka ti’na ahi; tu’kipat in ji neite chun a neilo gual in um uh hen la,

³⁰ lusûnte chu lusûn lo gual in, kipakte chu kipak lo gual in leh, thil chawte le a neilo gual in,

³¹ khawvel ah kiveina neite’nle a neilo gual in um tau hen. Zia khawvel umzia hi a mangthai zing ahi.

³² Lungkhamnate la neilo uh ka dawi piak la hiu. Ji neilopa chun Lalpa kipakna ding ngaitua in Lalpa thilte chu a ngaisak sek in,

³³ ji neipa vang chun a ji kipakna ding ngaitua in khawvel thil a ngaisak sek in,

³⁴ thil pani a kop hi. Pawsal neilo leh nungak thiangtho chun taksa leh thagau ah thiangtho tak ah a umtheina ding un, Lalpa thilte a ngaituau sek ui; pawsal neinu chun vang a pawsal kipakna ding ngaitua in, khawvel thilte a ngaitua zaw sek hi.

³⁵ Zia hi la phatchuamna ding ua ka gen ahi; la chunggikna ding ua ka gen ahipua’n, bangma’n dâl lo ah Lalpa â ding ah la kipumpiak theina ding ua ka gen ahi zawi.

³⁶ Kua’nle ji ding ah a khâmsa chung ah hi’dik lo ah a kihiat ah, ama taksa utna le hat ahi ah, ahilotheilo ahi chun, a phasak gual tak in kichenpi mai hen; zia chu gitlo ahi puai. Kicheng mai uh hen.

³⁷ Ahi’n la, kuale a lungthim tak ah a dindet zaw ah, mamaw talua a hilo ah, ama utna a thuzaw thei nâk ah, a nungak chu thiangtho tak ah umsak zing ding a lunggil ah a tup chun, a hi’pha ahi.

³⁸ Zia gual ah chun, kuale a nungak kitiampisa kichenpi chun a hi’pha’n; kicheng lo ah um thei pa chun a hi’pha zaw diak hi.

³⁹ Ji chu a pawsal dam sung sia kân ahi tai. A pawsal a thi chun vang Lalpa bep ah chun midang tawh kicheng thei ta’n a.

⁴⁰ Keima phasak dan in vang, a um um in um den zaw leh ama â dingin kipak um zaw’n a. Keile Pathian Thagau nei hi’n ka kihiai.