1 KORINTH 6 - PATHIAN LEKHABU THIANGTHO (BSI)

Gingtute Lak ah Kihêkna

¹ La lak ua Kua’nle midang chung ah thubuai nei leu chun, mithiangthote kiang ah tut lo in mi diklote kivai hawmna tut ngam ding la hiu em?

² Aleh, mithiangthote’n khawvel hi vaihawm piak ding a hiu ti helo la hiu em? Chutia, khawvel le vaihawm piak ding la hiu chun, thil neuchate ah vaihawm theilo la hiu em?

³ Thu mai mai te gentâk lo ah, vansawlchâkte natiang vaihawm piak ding I hiu ti helo la hiu em?

⁴ Tichun, thu mai mai te ngaitua ding la nei ua leh, bangatia kochuam ah hi’na neilote chu ngaituasak sek la hiu em?

⁵ La jachakna ding ua ka gen ahi. Gingtute kikâl ah thu tanchai thei mipil pakhat bêk umlo la hiu em?

⁶ Himaleh, suapi pakhat in a suapi chu vaihawmna ma’ tut in, ginglote kiang hinalai lo a hem?

⁷ A dik takin, la kihêktua sek uh hi nang uh â dingin gual zaw lona ahi. Bangatia a hem bawlsiatna la thok zawk mai lo uh? Bangatia, zuauthepna chu thuak zaw mai lo la hiu em?

⁸ Ahi, nangmau ngei in la suapiu chung ah le la hi’dik puau ah, zuau in la thêm sek uh ahi; gingtu la kiti nalai sêt un.

⁹ Aleh, midiklote chun Pathian gam lua pua’n au, ti la hepuau ah a hem? Thep zaw in um kiu in! Mi thanghuaite, milim ho-te, ângkawmte, mihukte,

¹⁰ guchate, huaihapte, zukhamte, mi vau mangte leh mi suamte chun Pathian gam lua pua’n au.

¹¹ Nanghaw lak ah khenkhat zia gual mi chu la hisek un. Himaleh, Lalpa Jesu Khrista min leh, I Pathian Thagau ah chun silthian la hitau ah, hi’thiantho leh thiam chang la hitau hi.

Taksa leh Thagau ah Pathian Choihoi Ding

¹² Kei â dingin bangkim bawl a thiang hi, ahi’n la, bangkim chu a phachuam puai. Kei â dingin thil bangkim bawl phal ahi, ahi’n la, bang ma suak dingin ka kiphal puai.

¹³ “An chu gilpi â ding ahi’n, gilpi chu an â ding ahi”; ahi’n, Pathian in hi’mangthai gêl gêl in a. Taksa hi tatsualna ding a hipua’n, Lalpa â ding ahi zawi; Lalpa chule taksa â ding ahi.

¹⁴ Chun, Pathian in Lalpa chu a kaitho ah, eihawle a thilhitheina’n ei kaitho in a.

¹⁵ La taksau hi Khrista bâkte ahi ti helo la hiu em? Khrista taksa bâk pakhat chu ladok ah, nawchizuak bâk ah siam ding ka hem? Hinaisai ki’hen!

¹⁶ Nawchizuak pakhat tawh kizom chu taksa ah le pumkhat ahi tau ti helo la hiu em? “Mi pani chu pumkhat hita’n au,” ti ahi ngal a.

¹⁷ Ahi’n, kuale Lalpa tawh kizom chu ama tawh thagau pakhat ah hing khawm a hiu.

¹⁸ Thanhuaina hi haisan un. Gitlona dang hi taksa pawlam thil ahi’n, mi thanghuai chun vang a taksa chung ngei ah gitlo bawl ahi.

¹⁹ Aleh, la taksau chu la sung ua um, Pathian kiang ah kipat la muu Thagau Thiangtho chênna In ahi ti leh, nangmau â la hita puau hi ti helo la hiu em?.

²⁰ Man piak ah chawksa la hitau hi; ziaziakchun, la taksau ah chun Pathian chawihoi tau in.