1 KORINTH 2 - PATHIAN LEKHABU THIANGTHO (BSI)

Khrista Kikhetden Puanjakna

¹ Suapite haw, la kiang ua ka hung lai ah khan, Pathian thugûk taklang in, thugen lopi tak a hem pilna sâng tak a hem tawh ka hung puai.

² Jesu Khrista leh ama ngei khetden ah um thu beplo chu la kiang un bangma het ka gaw puai.

³ La lak un jawngkhal tak leh lau leh kithing kawm in ka um hi.

⁴ Ka thugente kha le mihing pilna leh jawlthiamna panglo in, Thagau leh a thilhitheina mang in ka gen zaw ahi kha;

⁵ tichun, la ginnau chu mihing pilna kinga lo ah, Pathian thilhitheina a kingak zawk theina dingin.

Pathian Pilna Chu

⁶ Ahi’n la, pitingte kiang in pilna thu ka gen un; himaleh, zia pilna chu khawvel pilna thu, zia khawvel lalte pilna, bangmalo suak kit sekte hi ahi diak puai.

⁷ Himaleh, Pathian pilna chu thugûk, pilna kisêlgu gual in ka gen un, zia chu Pathian in khawvel um ma ah I lopina ding ua a la namdet tâk chu ahi.

⁸ Zia chu khawvel lalte kuama’n a hepuau hi; a la he hileu chu lopina Lalpa chu a la khênden lo ding a hiu in.

⁹ “Mit ah mu khâk lo, bil ah le het khâk lo, mihing lunggil ah lut ngailo, Pathian in ama hepi taphotte â ding ah, a guat tapo chu,” ti zik gual khan.

¹⁰ Zia chu Pathian in a Thagau ah chun I kiang un a tâklang tai; Thagau chun bangkim a hawldok sek ah; ahi, Pathian thugil takte le.

¹¹ Mihing lungthim chu mihing lunggil sung ah thagau ma ma lo chun kua a hem hethei ding? Zia gual ma chun, Pathian thilte chu Pathian Thagau panpi lo chun kuama’n a hethei puau hi.

¹² Thagau I chan uh hi khawvel ah kipat a hipua’n, Pathian ah kipat Thagau chu ahi zawi; tichun, Pathian ah kipat a thawn ah piak ah um, zia thilte ngei chu I hethei uh ahi.

¹³ Mihing pilna dan ah zilsakna thu hilo in, Thagau Thiangtho zilsakna dan zawk in, thagau thilte chu Thagau mite kiang in I gen zawu ahi.

¹⁴ Himaleh, hindang lo mite chun, Pathian Thagau thilpiakte chu a chang puau in, amau â ding chun ngolhuai ahiziak in; chuleh, thagau lam thil hetkhenna neilo ahiziak un, zia thilte chu a hethei puau hi.

¹⁵ Thagau mi chun bangkim a hekhen thei un, amau chu kuama’n a hechian thei puau hi.

¹⁶ “Kua a hem Lalpa lunggil hethei ah, ama thu hil thei ding?” Eihaw’n vang Khrista lunggil I puu hi.