1 KORINTH 1 - PATHIAN LEKHABU THIANGTHO (BSI)

Chibai Bûkna

¹ Paul, Pathian doigual ah Khrista Jesu sawlchâk hiding ah ko leh, I suapipau Sosthen chun,

² Korinth khua Pathian kochuam, Khrista Jesu ah sukthianthote, mi thiangtho hiding ah ko hite leh mun tin ah I Lalpau, eimau Lalpa leh amau Lalpa, Jesu Khrista min lam tapote kiang in:

³ I pau Pathian leh Lalpa Jesu Khrista ah kipat hepina leh thamuanna nangmau ah um zing ta hen.

⁴ Pathian hepina Jesu Khrista ah a hun piak ziakin, la chung thuu ah Pathian kiang in kipak thu ka gen zing hi.

⁵ Bangkim in ama ah hi’hausak la hitau a, thugen theina lam leh hetna lam zosia’n le,

⁶ Khrista chanchin ka hiatsakteu kha nangmau ngei ah sukdet a hita’n;

⁷ I Lalpa Jesu Khrista kilâkna ngak zing kawm in, thilpiak him him ah la tasam puau hi.

⁸ Ama chun I Lalpau Jesu Khrista ni phat leh demna bei ah a hun koitheina dingin, a tawp chan in hun hi’det ding ahi.

⁹ A chapa Jesu Khrista I Lalpau tawh kivopna ah hun kolutpa Pathian chu a muan um hi.

Kochuam ah Kikhenna

¹⁰ Tu’hin, unaute haw, la leng ua thu kibang gen ah, kikhen lo ah, lungthim leh ngaituana mun khat ah la kizopna ding un, Lalpa Jesu min in ka ni la hiu.

¹¹ Ka unaute haw, la chungchâng thuu ah la lak un kinialna a um hi ti Kloi Inkuante’n ei hil un.

¹² Zia ka ti na chu, “Kei Paul pawl,” “Kei Apollo pawl,” “Kei Kipha pawl ka hi,” ti leh, “Kei Khrista pawl ka hi,” tite la um ui.

¹³ Khrista chu a kikhen ah a hem? Paul chu nangmau â ding ah khetden in a um em? Ahiloleh, Paul min ah baptisma chang la um awm?

¹⁴ Krispa leh Gaias longal la lak ua kuama ka baptis lo ziak in, Pathian kiang in kipak thu ka gen hi.

¹⁵ Chutiloleh, keima min ah baptisma chang in kigen kha ding la hiu a.

¹⁶ Stephanas-te sunghawle chu ka baptis ah; ziate tilo chu kuama ka baptis lam ka hepuai.

¹⁷ Khrista chun baptis dingin ei sawl pua’n, Chanchinpha gen dingin ei sawl zaw ahi; pilna thu mang ah gen lo in: Achutiloleh, Khrista kros thilhitheina chu bangmalo chansak hi kha’n a.

Khrista, Pathian Thilhitheina leh Pilna

¹⁸ Kros thu chu mangthaite â dingin ngolhuai ahi’n; eihaw hukdam hi zingte â dingin vang Pathian thilhitheina ahi zawi.

¹⁹ “Mipil pilna chu hi’mangthai ing ka tin, lem hete lemhiatna chule paitha ding ka hi,” ti zik ahi ngal a.

²⁰ Aleh, mipil chu khoi ah um a hem? Lekha zikpa chu khoi ah um a hem? Zia khawvel ah mi nial hat chu khoi ah um a hem? Pathian in khawvel pilna hi thil ngolhuai a chansak ta hilo a hem?

²¹ Khawvel in pilna mang ah Pathian a het zaw tâk lo nung in, Pathian pilna chun ngolhuai tak ah thu kigente chu mang in, a gingte hukdam chu a kipakna lam tak ahi ngal a.

²² Judate’n tepte’na a phût un, Grikte’n pilna a hawl ui.

²³ Kei un vang Khrista khetden ah um thu chu ka gen ui; zia chu Judate â dingin kilikna ahi’n, Jentelte â dingin ngolna ahi.

²⁴ Himaleh, Judate hi’n, Grikte hileule, ko ah umte â ding in Khrista chu Pathian thilhitheina leh Pathian pilna ahi.

²⁵ Pathian ngolna pen le mihingte pilna sâng in a pilzaw’n, Pathian hat lona pen le mihingte hatna sâng in a hatzaw nalai hi.

²⁶ Unaute haw, a hun kona hi ngaitua tiam un: taksa lam ah mipil, mi thilhithei leh mi lopite ko a hilo dan uh hi.

²⁷ Himaleh, mi pilte chu a mualpho theina ding un, Pathian in khawvel thil ah ngolhuai chu a têl zaw ta’n; chuleh, khawvel ah thil zawngkhâlte chu Pathian in a têl ah, a hatte a mualpho theina ding un.

²⁸ Khawvel thil niam leh mu tawm umte, thil umsate chu bangmalo a chansak theina dingin, thil umlo te natiang Pathian in a têl a;

²⁹ Pathian ma’n kuama a kisuan theilona ding un.

³⁰ Nanghaw vang ama ziakin Khrista Jesu ah chun la um un; ama chu Pathian kiang ah kipat ei uh â ding ah pilna, dikna, sukthianthona leh tatna ah siam ahi.

³¹ Tichun, “A suang tapo in Lalpa chu suang tau hen,” ti zik gual ah khan.