1 KHANGTHU 29 - PATHIAN LEKHABU THIANGTHO (BSI)

Tempul Sakna Ding ah Thawlawm Thilpiakte

¹ Lengpa David chun mipi kikhawmte zosia kiangah chun, “Pathian in a têlchuam ka chapa Solomon hi a naupan tawh a hetna le a tawm nalai in, a nasep ding hi a lopi ma ma ngal in; a tempul sak ding hi mihingte chênna ding mai mai hilo in, Lalpa Pathian â ding ahi ngal in,

² tichun, ka hi’thei tawp sua in ka Pathian Insakna van ding chu ka la guanggal ta’n; sanate chu sana ah pang dingin, dangka thikte chu dangka thik ah pang dingin, sum-engte chule sum-eng ah pang ding, thikte chule thik ah pang dingin, thingte chule thing ah pang dingin leh a zechuam chuam ah cheina ding onik leh suang mantam chi chuam chuamte, suang mantam jat chuam chuamte leh marbul tam tak, kiningting tak ah mat dingin ka lakhawm zo tai.

³ Zia bep chule hilo in, zia In thiangtho sakna ding ah ka la bawl cheng bân ah hin, ka Pathian In sak ding ka lung lut ma ma ziak in, keima nei leh lamte lak ah a pha cha cha, sana leh dangka thikte zosia chule ka Pathian Insakna ding ah hin ka pedok sik sek ta ahi;

⁴ Ophir sana talent sang thum, In bâng zutkhumna ding dangka kisuthiang talent sangsagi tawh,

⁵ mi khutthiamte’n sana ah thil a siamna ding un sana dangka thikah a thil siamna ding uh dangka thikte le a kidai hi. Lalpa â dingah kilân thiangtho ah, tu’ni hun ah thawlawm pianuam la um nalai awm?” ti’n a gen tai.

⁶ Ziaphatchun, a phung tin ua upate chun ngamtawk thilpiak a hun pechiat tau in, zia gual ma chun phung tin ah luchangte leh sang têl chung ah hotute, za têl chung ah hotute leh lengpa nasepna ah milian leh lalte zosia chunle a hun pechiat tau hi.

⁷ Pathian Insakna ding ah chun sana talent sangnga tawh daric sîngkhat, dangka thik talent sîng khat tawh, sum-eng talent sîng khat leh sâng giat tawh, thik talent nuai khat zet a hun pekhawm tau.

⁸ A lak ua suang mantam nei taphot chunle Lalpa Insakna thawlawm ding in, Gershon mi Jehiel khutah chun a hun pelut chiat tau a;

⁹ ziaphatchun, zia mite chun kiphal tak ah a piak ziak uh leh, Lalpa a ding ah lung kigual takah a piak ziak un mipite chu a kipak ma mau ah; Lengpa David chule a kipak ma ma ziang hi.

David in Pathian A Choihoina

¹⁰ Ziaphatchun, David chun mipi kikhawm zosia ma-âng ah chun Lalpa a chawihoi ta’n; David in zia gual hin a gen a: “Aw Lalpa, ka suantu bul uh Israel Pathian, nangma chu kumtuang tiang in ka chawihoi hi.

¹¹ Aw Lalpa, letna leh thilhitheina, lopi’na, zaw’na leh lalna zosia chu nang â ahi; van ah thil um zosia leh lei ah thil um zosia hile nang â a hiu; aw Lalpa, leng gam zosia nang â a hiu ah, thil zosia chung ah sâng pen ah choisa’n la hi.

¹² Hausakna leh ja’umna nangma ah kipat ahi’n, bangkim chung in vai la hawm hi. La khut ah thilhitheina leh hatna a um in; la khut in mi zosia letna leh hatna la pia thei hi.

¹³ Tu’hin, ka Pathian uh, la kiang ah kipak thu gen in, la min lopi tak chu ka chawihoi uh ahi,” a tia.

¹⁴ Himaleh, kei hi kua ka hia, ka mipite hile bang a hiu ah, zia gual tuk ah kiphalna tawh thilpiak hun pia ziang thei ka hiu em? Bangkim hi nangma ah kipat hung pawt ngen ahi’n, nang â ma ma chu ka hun piak kit uh a hizawi.

¹⁵ Ka pu leh pateu haw zosia gual tho ah khan nangma mit mu in, khualzin leh mite bêlah khawsa bep gual ka hi’ngal un; lei chung ah ka damsung niteu hile lim gual mai ahi’n, kinepna ding him him a um puai.

¹⁶ Aw Lalpa ka Pathian uh, la min thiangtho â ding ah In ka hun sakna ding ua zia ka thil hun choikhawm zosiau hi, nangma khutsuak ngen ma ma a hin, nang â sik sek a hiu.

¹⁷ Ka Pathian, nang in lungthim lam la enchian sek in, dikna la kipakpi hi ti ka hia’i. Ka lungthim dik tak ah zia thil zosia hi kiphal takah ka hun piak ahi; chuleh, tu’hin, la mipite hinle kipak tak leh kiphal tak ah a hun piak uh ahi ti ka mui.

¹⁸ Aw Lalpa, ka suantubul uh Abraham, Isak leh Jakob Pathian, la mipite hin zia gual lungthim hi a put zing theina ding un, a lunggil uh hi hi’det piak in.

¹⁹ Chun, ka chapa Solomon hi la thupiakte, la thil hiatsakte leh la dante zawm ah, zia gual ah chu um thei ding leh ka la kiguanggal dungzui ah zia In chu sa dingin, lungthim pha bukim putsak ta’n, ti’n a gen tai.

²⁰ Ziaphatchun, David chun mipi kikhawm te kiang ah chun, “Lalpa la Pathian uh chu chawihoi chiat tau in,” a tia. Tichun, mipi kikhawm zosia chun Lalpa, a suantu bulteu Pathian chu chawihoi in, Lalpa leh lengpa ma-âng ah khiangkho leh bokkhup in chibai a bûk tau hi.

²¹ A jing ah chun Lalpa kiangah kithoina ding leh, Lalpa kiangah hâlmang thillat dingin bawngchal sang khat tawh, belamchal sang khat tawh, belamno sang khat tawh, dawnthei thillatte tawh, Israelte zosia â ding in a hun la’n a;

²² tichun, zia ni chun nasa takah kipak kawm in, Lalpa kiang ah chun ne leh dawn in a um tau hi. David chapa Solomon chu leng dingin a siam kit ua; ama chu Lalpa â ding ah milian hiding leh, Zadok chule thiampu hiding in, sathau a nu’ tau hi.

Solomon in A Pa David Lalchutpha A Lua’na

²³ Ziaphatchun, Solomon chun a pa David leng hi’na chu lua in, Lalpa lalchutpha chun a kichu ta’n; a hung lamzang pek ah, Israel zosia’n a thu a mang chiat tau hi.

²⁴ Mi lian leh lal zosia tawh, sepai galhangsante zosia tawh, Lengpa David chapate zosia chunle Lengpa Solomon kiang ah ginumna thutiam chu a bawl chiat tau hi.

²⁵ Lalpa‘n Solomon chu Israelte zosia mit mu in nasa tak in a chawisâng ah; chuleh, Israel lakah ama masang ah leng zosia’n a la chan khak ngai lo uh ja’umna sâng tak chu a pia tai.

David Vaihawmna Lakchom

²⁶ Tichun, Jesse chapa David chun Israelte zosia chung in vai a la hawm ta’n.

²⁷ Israelte chung ah a vaihawm sung chu kum sawmli ahi: Hebron ah kum sagi vai a hawm ah, Jerusalem ah kum sawmthum leh thum vai a hawm hi.

²⁸ Ama chu kumting tak leh ni le ting tak in, hausa tak leh ja’um tak in a thi ta’n; a chapa Solomon chun a tha a sâng to tai.

²⁹ Tu’hin, Lengpa David nasep dan haw zosia chu, a bul ah kipat a tawp tiang in thiamgau Samuel lekhabu leh jawlnei Nathan lekhabu leh, thiamgau Gad lekhabu ah te chun ziklut chiat ahi’n;

³⁰ a vaihawm dan zosia leh, a gâlhat dante, ama leh Israelte leh khawvel lenggam zosia chung ah thil a la tung zosia chule zik lut chiat ahi.