1 KHANGTHU 24 - PATHIAN LEKHABU THIANGTHO (BSI)

Thiampute Nasep Kigualtuakna

¹ Aron suan ah mite nasep thilbawl ding kigual tuak dan chu zia gual hi a hi. Aron chate chu: Nadab, Abihu, Eleazar leh Ithmar a hiu a;

² Nadab leh Abihu kha vang chapa neilo in, a pa sâng in a la thivak zaw tau a; ziaziakchun, Eleazar tawh Ithmar chu thiampu’n a pang tau hi.

³ Eleazar chate lak ah Zadok tawh, Ithmar chate lak ah Ahimelekh chu a kithuapi dingin a mawpuakna ding uh David in a guat tai.

⁴ Ithmar chate lak sâng in Eleazar chate lakah mala thei a tamzawk ziak un, Eleazar suante lak ah chun, a pu leh pateu suan dungzui in hon sawm leh guk in a bawl un, Ithmar suante chu hon giat in a bawl ui.

⁵ A leng ua kibang tak ah chan a kihop theina ding un âi a sân un; mun thiangtho ah hotu ding leh Pathian Insung ah hotu dingte chu Eleazar suante leh Ithmar suante lak ah kipat in a lakhawm ui.

⁶ Lengpa, hotute, thiampu Zadok, Abiathar chapa Ahimelekh, leh thiampute lak ah upate tawh Levi phung ah mite zosia ma-âng ah chun, Levi suan ah mi, Nathanel chapa Shemaiah lekhazikpa chun, a min uh chu a zikdok ah; Eleazar Inkuan ah mi pakhat tawh Ithmar Inkuan ah mi pakhat gêl a têldok tau hi.

⁷ Tichun, a âisân masak pen uh chu Jehoiarib chung in a kia’n, a pani’na chu Jedaiah chung in a kia’n;

⁸ a pathumna chu Harim chung in a kia’n, a pali’na chu Seorim chung in a kia’n;

⁹ a pangana chu Malkhijah chung in a kia’n, a pagukna chu Mijamin chung in a kia’n;

¹⁰ a pasagi’na chu Hakkoz chung in a kia’n, a pagiatna chu Abijah chung in a kia’n;

¹¹ a pakuana chu Jeshua chung in a kia’n, a sawmna chu Shekaniah chung in a kia’n;

¹² a sawm leh khatna chu Eliashib chung in a kia’n, a sawm leh ni’na chu Jakim chung in a kia’n;

¹³ a sawm leh thumna chu Huppah chung in a kia’n, a sawm leh li’na chu Jeshebeab chung in a kia’n;

¹⁴ a sawm leh nga’na chu Bilgah chung in a kia’n, a sawm leh gukna chu Immer chung in a kia’n;

¹⁵ a sawm leh sagi’na chu Hezir chung in a kia’n, a sawm leh giatna chu Happizzez chung in a kia’n;

¹⁶ a sawm leh kuana chu Pethahiah chung in a kia’n, a sawmni na chu Jehezkel chung in a kia’n;

¹⁷ a sawmni leh khatna chu Jakin chung in a kia’n, a sawmni leh ni’na chu Gamul chung in a kia’n;

¹⁸ a sawmni leh thumna chu Delaiah chung in a kia’n, a sawmni leh li’na chu Maaziah chung in a kia tai.

¹⁹ Zia hi, Israel Pathian in a puu Aron kiang ah thu a piak gual ah Lalpa In ah nasem thilbawl ah a lutna ding uh dan leh mual a guat piak uh chu ahi.

Levi Inkuan Piangte Chu

^20-21 Rehabiah chate lak ah a upa pen chu Isshiah ahi’n,

²² Izhar suante lak ah Isshiah cha chu Shelomoth ahi’n; Shelomoth chate lak ah Jahath ahi.

²³ Hebron chate lak ah a upa pen Jeriah, a bân ah Amariah, a pathumna Jahaziel, a pali’na Jekameam a hiu.

²⁴ Uzziel chate lak in Mikah; Mikah chate lak in Shamir ahi.

²⁵ Mikah suapipa chu Isshiah ahi’n; Isshiah chate lak ah Zekariah ahi.

²⁶ Merari chate chu: Mahli tawh Mushi a hiu ah, Jaaziah cha chu Beno ahi.

²⁷ Merari chate chu: Jaaziah chate lak ah Beno, Shoham, Zakkur leh Ibri a hiu.

²⁸ Mahli cha chu: Eleazar ahi; ama hin chapa a nei puai.

²⁹ Kish suan, Kish cha chu: Jerahmeel ahi.

³⁰ Mushi chate chu: Mahli, Eder leh Jerimoth a hiu a. Zia hi a pu leh pateu kisuan sawn dungzui ah Levi Inkuan ah mite chu a hiu hi.

³¹ Zia hi Lengpa David, Zadok, Ahimelekh tawh, thiampute leh Levi Inkuan ah a upa pen leh a chapang pente mit mu ah, Aron suan dungzui ah, a Inkuan a Inkuan un a âisân dan ua kia chu ahi.