1 KHANGTHU 19 - PATHIAN LEKHABU THIANGTHO (BSI)

Ammonte leh Aramte A Zaw’na

¹ Zia nung ah chun Ammonte Lengpa Nahash a thi ta’n, a chapa a thasâng in a pang in.

² David chun, “A pa kha ka chung ah a phat ziakin, Nahash chapa Hanun hile pha tak ah ka bawl ding ahi,” a tia. Tichun, a pa thi ziakah thamuan dingin David in palai a sawl ah. Ama thamuan ding ah David suakte chu Ammonte gam a tun phat un,

³ Ammon mite lak ah miliante chun Hanun kiang in, “David in nang thamuan ding ah mi a hun sawl hi, la pa a jabawl ziak uh hin la ngai em? A suakte hi gam entha ding leh, thu dawp ah bang gual ah gam hi kila ding ahi diam ti he ding ah hung hilo a hiu em?” a la tiu a,

⁴ tichun, Hanun in David suakte chu a man ah, a khamul uh metnâm piak in, a puanâk chual uh le a tawbak uh huai ham ham ah chetan piak in a sawl mang kit a;

⁵ amau chu a hung kit tau ah. A chanchin uh David a hil phat un, amau chu a zakcha ma ma a hiu ti a het phat in lengpa chun mi a sawl ah: “La khamul uh a sau kit masia Jeriko khua’n hung um tadiu in la, ziazaw chuleh hung bep un,” ti’n a gen tai.

⁶ Ammonte chun David huat lam tak ah thil a la bawl tau ti a kihet phat un, Hanun tawh Ammonte chun Mesopotamia, Aram-maakah leh Zobah ah mite sakol kângtalai leh sakol sepaite gawina dingin dangka thik talent sang khat a thot tau hi.

⁷ Maakah lengpa leh a sepaite chu sakol kângtalai sîng thum leh sang ni tawh a hung kuan tau in, Medeba khua kiang in a kikul tau ah, chuleh, Ammonte chu a khawpiu ah kipat kikokhawm in gâldo dingin a hung kuan tau hi.

⁸ David in zia chu a het phat in, Joab tawh a sepai hangsan zosia chu a sawl a,

⁹ Ammonte chu gâldo dingin khawpi kipat hung kuan in, khawpi kotkhak bul in a hung pang un; chuleh, leng dangte haw chu gamlak ah amau ngen in a pang tau hi.

¹⁰ Joab in a malam leh a nunglam ah mêlma’n a chântua a hiu ti a het phat in, Israelte lak ah mi bang jat a hem têldok in Aram mite do dingin a kiguanggal a;

¹¹ sepai dang cheng chu a suapipa Abishai malatna’n, Ammonte do dingin a guanggal a,

¹² a kiang un, “Aramte chu ka zaw lo leh ei hung panpiu inla; Ammonte chu la zaw lo ua leh kei un hung panpi ing kau.

¹³ Hangsan tak in pang unla, I mipiteu leh, I Pathian uh khawpite humbitna dingin theitawp sua in pang hitiu; Lalpa‘n a chung un a nop dan dan in bawl mai ta hen,” ti’n a gen tai.

¹⁴ Tichun, Joab tawh a kiang lam ah pang sepaite chu Aram mite do dingin a kuan tau a; tichun, a naw mang tau hi.

¹⁵ Ammonte chun Aram mite chu a taijak tau hi ti a mu phât un, amau gual ma’n Joab suapipa Abishai âng ah chun jamsia’n, khawpi sung in a tailut tau a. Ziazaw chun Joab le Jerusalem lam in a hung kit tai.

¹⁶ Himaleh, Aramte chun Israelte zo lo a hiu ti a kihet phat un, Euphrates luipi gâl lam in palaite a sawl ua, Hadadezer sepai hotu lianpen Shophakh malatna’n Aram mite a vako tau hi.

¹⁷ Zia thu chu David a hil phat un, Israel sepaite zosia a ko khawm a, Jordan lui a gâl kâi un, a mêlmateu kiang a hung tung tau a. David in a sepaite chu Aram mite do ding ah a guanggal zaw phatin, ama chu a hun do tau hi.

¹⁸ Aramte chu Israelte lau in a jamsia tau a; David in Aramte sakol kângtalai sepaite chu sang sagi leh keng sepai sîng li a that ah, sepai hotu lianpen Shophakh chule a that tai.

¹⁹ Hadadezer in amau chu Israelte’n a zo thiang kei tau ti a het phat in, David chu a kichampi ta’n; tichun, a thu nuai in a um tau a. Tichun, Aramte chun Ammonte chu a hung panpi kit nuam ta him him puau hi.