1 KHANGTHU 15 - PATHIAN LEKHABU THIANGTHO (BSI)

Jerusalem ah Thuthung Thingkuang Lâklutna

¹ David khawpi chun David in a In dingte a sa ta’n, Pathian thuthunna thingkuang umna dingle a siam ah, puanbûk a jak piak a.

² Lalpa‘n Levite Inkuan chu bangtik lai ah le ama nasem dingah a la guat chuam ahiziak in, Pathian thuthung thingkuang chule David in thu a pia tai.

³ David in Israelte zosia chu Jerusalem khua hung khawm ah, a umna ding mun a siamna chu Lalpa thuthunna thingkuang paw lut dingin mi a ko khawm a,

⁴ ziaphatchun, David in Aron suante leh Levite zosia chu a ko khawm hi.

⁵ Kohath chate lak ah mi za khat leh sawmni chung ah hotu ding un Uriel;

⁶ Merari chate lak ah mi za ni leh sawmni, a hotu ding un Asaiah;

⁷ Gershom chate lak ah mi za khat leh sawmthum, a hotu ding un Joel;

⁸ Elizaphan chate lak ah mi za ni, a hotu ding un Shemaiah;

⁹ Hebron chate lak ah mi sawmgiat, a hotu ding un Eliel;

¹⁰ Uzziel chate lak ah mi za khat leh sawm leh ni, a hotu ding un Amminadab a guat tai.

¹¹ David in thiampute lakah Zodak leh Abiathar tawh, Levite lak ah Uriel, Asaiah, Joel, Shemaiah, Eliel leh Amminadab cheng chu a ko a,

¹² a kiang un, “Nanghaw hi Levite Inkuan lak ah hotute la hiu a; Israelte Pathian, Lalpa thuthung thingkuang, a umna ding ah ka guatna la puak lut theina ding un, nangmau leh la chanauteu haw chu suthiangtho un.

¹³ I la bawl gi’nat lo ziak ua, nanghaw’n a lim tak ah la la puak lo ziak un, Lalpa I Pathian uh I chung un a la lungna ahi kha,” ti’n a gen tai.

¹⁴ Tichun, Israelte Pathian, Lalpa thuthung thingkuang chu paw lut dingin, thiampute leh Levite zosia chu a kisuthiangtho tau hi.

¹⁵ Lalpa‘n Mosi kiang ah thu a la piak dungzui in, Pathian thuthung thingkuang chu Levite chun a jawnna jawl ah chun a liangko un a jawn tau hi.

¹⁶ David in Levite lak ah hotute kiang ah chun, amau Inkuan lak ah kipat thilgithei gi tawh thua ah La sa dingte, khuangneu tawh, mût-ham thei chitin thua ah, a ngai thei pen ah kipakna La sa ding leh kiko ding mi guat lawk dinginle thu a pia’i.

¹⁷ Tichun, Levite chun Joel chapa Heman tawh, a chanaute lak ah Berekiah chapa Asaph tawh; Merari chate leh a chanauteu, Kushaiah chapa Ethan chu a teldok un;

¹⁸ amau zathuap ding ah chun a chanauteu, Zekariah, Jaaziel, Shemiramoth, Jehiel, Unni, Eliab, Benaiah, Maaseiah, Maattithiah, Eliphelehu, leh Mikneiah tawh kotkhak vêngtu Obed-edom tawh Jeiel cheng chu a guat ui.

¹⁹ Lasak thiam Heman, Asaph leh Ethan chun sum-eng dak khutbet bêng in tiu in;

²⁰ Zekariah, Aziel, Shemiramoth, Jehiel, Unni, Eliab, Maaseiah leh Benaiah cheng hin Alamoth La kai ah gui sawm nei tumdingte ah guat a hiu a;

²¹ himaleh, Mattithiah, Eliphelehu, Mikneiah, Obed-edom, Jeiel leh Azaziah cheng hin, Sheminith La kai ah theile mût dingah guat a hiu a;

²² a puitu ding un a guat tai.

²³ Berekhiah leh Elkanah chu thuthung thingkuang umna kotkhak vêngtu dingin a guat ui.

²⁴ Thiampute lak ah Shebaniah, Joshaphat, Nathanel, Amasai, Zekariah, Benaiah leh Eliezer cheng hi, Pathian Thuthung thingkuang ma-âng ah pengkul mût dingah guatdaw a hiu ah, Obed-edom tawh Jehiah chule thuthung thingkuang umna kotkhak vêng ah pang dingah guat a hiu hi.

Jerusalem Khua Thuthung Thingkuang Puaklutna

²⁵ Tichun, David tawh Israel lawi upate leh sepai sang khat chung ah thuneite chu a chiau ah, Obed-edom In ah kipat Lalpa Thuthung thingkuang chu kipak tak ah vapawdok dingin a kuan tau hi.

²⁶ Chuleh, Lalpa thuthung thingkuang jawn ah pang Levite chu Pathian in a panpi ziakin, bawngchal pasagi leh belamchal pasagi in kithoina a bawl tau hi.

²⁷ David tawh Levite lak ah Thuthung thingkuang jawnte tawh, La sate leh La sate lakah puitu Kenaniah cheng chu puan malngat in a kivan un; David chu puan malngat ah kisiam thiampu puanâk in a kithuam hi.

²⁸ Tichun, Israelte zosia chun, belam kîte, pengkulte, dakkhutbette, theile leh thilgithei gui neite tumgi kawm ah ngai tak ah kiko in, Lalpa Thuthung thingkuang chu a hun paw to tau ahi.

²⁹ Lalpa Thuthung thingkuang chu David Khawpi a hun puak lut lai ua chun, Saul chanu Mikhal in tukvan ah kipat a vak et leh, Lengpa David lâm ah kichawm chu a vak mu ta’n; tichun, a lungthim tak ah chun a la japi gu ma ma ziang tai.