1 KHANGTHU 14 - PATHIAN LEKHABU THIANGTHO (BSI)

Jerusalem Khua David Kikhualdetna

¹ Tura Lengpa Hiram chun David kiang in palai a sawl ah, a In ding sak piak di’n suangsêk thiamte, thingbawl thiamte leh sidar thingte tawh a thot tai.

² Ziaphatchun David in, Lalpa‘n ama chu Israelte chung ah leng ding ah a tundin dan leh, a lenggam chu a mipi Israelte jal ah nasa tak ah sukdet gua ahi ti a hechian tai.

³ Jerusalem ah chun David in ji dang dang le a nei belap ah; tichun, David in chanu chapa tam tak a hun nei belap tai.

⁴ Jerusalem khua a chate min chu ziate hi a hiu: Shammua, Shobab, Nathan, Solomon,

⁵ Ibhar, Elishua leh Elpelet;

⁶ Nogah, Nepheg leh Japhia;

⁷ Elishama, Beeliada leh Eliphelet.

Philistinte A Zaw’na

⁸ Philistinte chun Israelte zosia chung ah leng dingin David chu sathau a nu’ tau hi ti a het phat un, Philistinte zosia chu David hawl dingin a kuan tau a; chuleh, David in zia thu chu a het ziakin amau do dingin a kuandok tai.

⁹ Philistinte chu hung kuan in, Rephaim phâijawl chu a hun sim tau hi.

¹⁰ David in Pathian a dong ah, “Philistinte do dingin kuan ding ka hi em? Amau chu ka khut in lei pia diam?” a ti’n. Lalpa chun a kiang in, “Kuan to in, amau chu la khut ah hun pia ding ka hi,” ti’n a gen tai.

¹¹ Tichun, Baal-perazim mun ah chun a vakidopi ah, David in a zo tai. Ziaphatchun David in, “Pathian in ka gâlte chu ka khut mang in tuikhang gual in a phujak tai,” a ti’n. Ziaziakchun, zia mun chu Baal-perazim sak ahi tai.

¹² Zia tak ah chun Philistinte chun a pathianteu chu a nusia tau ah, chun, David thupiak dungzui in zia haw chu a hâl tum tau hi.

¹³ Philistinte chun zia phâijang chu khatvei a hung do kit un.

¹⁴ David in Pathian a dot phatin, Pathian in a kiang ah chun, “Amau chu delzui ziang kin la, ûm kîmvêl inla, thingtheimi bul jawn ah hung in.

¹⁵ Thingtheimi kung haw chung jawn ah mi kijawt git la het phat leh, amau do dingin kuandok in; Philistin sepaite do dingin la ma lam ah Pathian a la chia ta ahi,” ti’n a hun hil tai.

¹⁶ Pathian in thu a piak dungzui in David in a bawl ah; tichun, Gibeon ah kipat Gezer tiang in Philistin sepaite chu a that gam tai.

¹⁷ David chu gam zosia’n a minthang ta ma ma ah, Lalpa‘n namtinte chu a lausak tai.