1 KHANGTHU 10 - PATHIAN LEKHABU THIANGTHO (BSI)

Saul leh A Chapa Thi’na

¹ Philistinte chun Israelte a hung do tau a; tichun, Israelte chu Philistinte zo lo in a jamsia tau ah, mi tam tak le Gilboa tâng ah chun thalup in a um nalai un,

² Philistinte chun Saul leh a chapate a delpha tau a; tichun, Saul chapa Jonathan, Abinadab tawh Malkhishua cheng hi Philistinte chun a that tau hi.

³ Saul chu nasa zaw diak in a hun do un; thal kapte chun ama a tup chuam un, a hun kap liam tau hi.

⁴ Ziaphatchun, Saul in a gâlvan pawpa kiang ah chun, “Zia zektanlo haw khut ah ka pûk ah, tawtthanghuai ah ei bawl sâng un, la chemjam hun jukdok in la ei sunthil ziang tiam in,” ti’n a gen a. Himaleh, a gâlvan pawpa chun a tizat ziakin, a sunthil ziang nuam ta pua’n. Tichun, Saul in ama chemjam chu a jukdok ah, a baw thil tai.

⁵ A gâlvan pawpa chun Saul a thi tai ti a het phat in, ama’nle a chemjam jukdok in, a kisun lum tai.

⁶ Zia gual chun Saul chu a thi ta’n; ama leh a chapa pathumte tawh a Inkuan un a thi zo tau hi.

⁷ Phâijawl ah Israel um zosia’n Saul tawh a chate a thi zo tau hi ti a het phat un, a khuau nusia in a jam jak zo tau a; tichun, Philistinte a hung un, a hun lua tau hi.

⁸ A jing ah Philistinte’n a gâl thalupteu van lakhawm ding ah a hung ua leh, Gilboa tâng ah chun Saul tawh a chate luang chu a va mudok tau hi.

⁹ A gâlvante a suadaw zaw phat un a luchang a lau ah, a gâlvan haw chu tawh a pawkhawm un, a gâlzawnau thu chu Philistinte gam sung pumpi ah milim pathiante leh mipi zosia kiang ah gen vêl dingin mi a sawl tau hi.

¹⁰ A gâlvante chu a milim pathian In un a koi un, a luchang chu Dagon hona In ah chun a tâkdok tau hi.

¹¹ Himaleh, Jabesh-Gilead khua mite chun Saul chung ah Philistinte thilbawl chu a la het phat un,

¹² mi hangsan zosia a kuandok ua, Saul luang leh a chate luang chu vala’n, Jabesh khua lam in a hun puau hi. Chuleh, a guteu chu Jebesh khua gangpi thingbul nuai in a vui un, ni sagi sung anngawl in a sûn tau hi.

¹³ Tichun, Saul chu a ginum lo ziakin a thi tai; Lalpa thupiak zui lo in Lalpa chung in a ginum pua’n; zia bep chule hilo in, Lalpa dong lo in thitha jawlte haw po a dong zaw ta’n,

¹⁴ ziaziakchun, ama chu Lalpa‘n a that ah, a lenggam chule Jesse chapa David kiang in a pedok ta ahi.