1 JOHAN 5 - PATHIAN LEKHABU THIANGTHO (BSI)

Ginna chu Khawvel Zawna ahi

¹ Jesu chu Khrista ahi ti ging zosia chu Pathian ah piang a hiu; chuleh, a hingtu hepi zosia’n a hinte le a hepi sek ui.

² Zia hin Pathian chate I hepi dan uh I hiau hi; Pathian I hepiu ah, a thupiakte I zop ua hin.

³ Pathian hepina chu zia hi ahi, a thupiakte I zop uh hi. A thupiakte le a haksa puai.

⁴ Pathian ah piang tapo in khawvel hi a nuaisia sek ngal in. Chun, khawvel nuaisia ah zawna chu zia hi ahi: I ginnau hi.

⁵ Jesu chu Pathian Chapa ahi ti gingte bep longal chun kua a hem khawvel zo sek?

Pathian Chapa Chungchâng Hiatsakna

⁶ Zia hi ahi tui leh thisan ah hungpa chu, Jesu Khrista hi; tui bep ah hilo in, tui ah leh thisan ah ahi zawi. Zia thu hiatsakpa chu Thagau ahi, Thagau chu thutak chu ahi ngal a.

⁷ Hiatsaktu pathum a um hi:

⁸ Thagau tawh, tui tawh, thisan; zia pathumte chu a kituak chiat ui.

⁹ Mihingte hiatsakna bawn I pom uh chun, Pathian hiatsakna chu a thupi zaw nalai hi; Pathian hiatsakna chu zia hi ahi: a chapa chanchin a hiatsakna hi.

¹⁰ Pathian Chapa gingte’n hetpina chu a lunggil un a nei chiat tau hi. Pathian ginglote’n vang ama chu juauthei a chansak tau hi, Pathian in a Chapa chanchin a hiatsak chu a gin lo ziak un.

¹¹ Hiatsakna chu zia hi ahi: Pathian in kumtuang hinna ei pia ta’n, zia hinna chu a Chapa ah um ahi.

¹² Kuale Chapa nei taphot chun hinna a nei un, Pathian Chapa nei lo taphot chun hinna a nei puau hi.

Thu Khâkna

¹³ Kumtuang hinna la nei ui, ti la hettheina ding un, nang uh Pathian Chapa min gingte kiang in zia thute hi ka hun zik ahi.

¹⁴ Chuleh, a ma-âng ah I hânsannau chu zia hi ahi, ama doi gual I dot taphot uh ama’n ei ngaithâk piak hi ti hi.

¹⁵ Tichun, I dot taphot uh ei ngaithâk piak hi ti I het leh, a kiang ah I dotteu chu I mu tau hi, ti I hiau.

¹⁶ La suapi pakhat thina khop hilo gitlona bawl la mu chun, don in la tin, Pathian in ama tawhbang kiang ah chun hinna pia’n tin; chuleh, thina khop hilo gitlona bawlte kiang ah chunle pia’n a. Thina khop gitlona a um ah, zia gual mite â ding ah chun pauchap un ka ti ahi puai.

¹⁷ Dik lona zosia hi gitlona ahi’n; himaleh, thina khop hilo gitlona a um hi.

¹⁸ Kuale, Pathian hinte chun gitlona a bawl zing ta puau hi, ti I hiau hi. Pathian ah piangte chu Ama’n a vêng zing ah, migilo in amau chu a khoi thei ta puai.

¹⁹ Pathian chate I hiu ti leh, khawvel pumpi hi migilopa thunuai ah um ahi, ti I hiau hi.

²⁰ Chun, Pathian Chapa chu a hung ah, midik chu hethei dingin hiattheina ei pia tai, ti I hiau hi; chuleh, a Chapa Jesu Khrista ah um in, midik ah chun I um uh ahi. Ama chu Pathian dik tak leh kumtuang hinna ahi.

²¹ Naute haw, milimte ah kipat kikoi kiang un.