1 JOHAN 3 - PATHIAN LEKHABU THIANGTHO (BSI)

Pathian Chate

¹ Ngai tiam un, Pa’n ei hepina ziak ah Pathian chate ei sak tâk hi a nasa na lawm lawm e! Zia gual ding chu I hi him uh ahi. Ama chu khawvel in a het lo ziakin, ei haw le ei he lo a hiu.

² Doitakte haw, tu’hin chu Pathian chate I hitau hi; bang gual ah I um ding uh vang a kilang nai puai. Ama chu a hung kilat phat leh, ama chu ahi’na gual tak in mu tai tiu in, ama gual in um ding I hiu ti vang I hiau hi.

³ Kuale, zia kinepna nei taphot chu ama a thiantho gual in a kisuthiangtho sek ui.

Gitlo Hi Pathian Cha Hi’na Tawh A Kituak Puai

⁴ Gitlo bawl taphot chu dan botsia a hiu; gitlona chu dan bawsiatna ahi.

⁵ Ama chu gitlona la mang dingin a hung kilang a; chuleh, ama ah chun gitlona a um puai, ti la hiau hi.

⁶ Kuale ama ah um chun gitlo a bawl zing puai; kuale gitlo bawl zing chun ama a mu puau ah, het le a hepuau hi.

⁷ Naute haw, kuama’n hun thêm zo kiu hen. Thil dik bawl taphot chu ama a dik gual in, midik a hiu.

⁸ Gitlo bawl taphot chu diabol ah pawt ahi; diabol chun a tîl ah kipat in gitlo a bawl tangal a. Pathian Chapa hung kilatna ziak pen chu, diabol nasepte sukmangthai a hi’theina ding ahi.

⁹ Kuale Pathian ah piang chun, Pathian chi ama ah a um zing ziakin gitlo a bawl zing ta puai.

¹⁰ Zia hin Pathian chate leh diabol chate chu tâklat ahi: thil diklo bawl taphot chu Pathian ah kipat ahi puau in, a suapite hepilo taphot chule ahi diak puau hi.

Kihepitua Chiat Ding

¹¹ Zia hi a lim ah kipat thu la het uh chu ahi: I kihepi tua chiat diu ahi, ti hi.

¹² Kaina gual ah khan um puai tiu, ama chu gilopa ah kipan ahi ziakin, a suapipa a that tai. Bang ziak ah a tha a hem? Ama thilhi’te chu a pha pua’n, a suapipa thilhi’te kha a dik ziakin ahi.

¹³ Suapite haw, khawvel in a hun huat hi maksa kiu in.

¹⁴ I kihepitua ziak ua hin, thina kipat hinna I gâl kâi tau hi ti I hiau hi. Kuale hepina neilo chu thina um zing ahi.

¹⁵ A suapi hua taphot chu tualthat a hiu; tualthatte chun kumtuang hinna a nei puau hi ti le la hiau.

¹⁶ Zia hin hepina chu I hethei ui: ama’n ei uh â ding ah a hinna a piak tâk hi; ei unle midangte â ding ah I hinnau I piak diu ahi.

¹⁷ Kua’nle khawvel sum leh pâi nei in, a suapi tasam chu mu ngal in, panpi nuamlo ta leh, Pathian hepina ama ah bang ti’n a um thei diam?

¹⁸ Naute haw, a thu leh kam sung bep in kihepi puai tiu in, thu tak leh thilhi in hizaw hen.

¹⁹ Chuleh, I lungthim un thiamlo ei chan phat leh le, thu tak ah um I hi’dan leh, a ma-âng ah le lauthawnglo ah ei umsak thei ziakin, eimau I kihechian thei sek uh ahi;

²⁰ Pathian chu I lungthim sâng un a lian zaw’n, bangkim a he suak ngal a.

²¹ Doitakte haw, I lungthim un thiamlo ei chansaklo chun, Pathian âng in I hangsan un,

²² chuleh, a thupiakte zawm ah a kipakna lam I bawl sek ziak un, I dot taphot I mu sek uh ahi.

²³ A thupiak chu zia hi ahi: A chapa Jesu Khrista min ging in, ama’n thu ei piak gual in kihepi tua chiat leu hing, ti hi.

²⁴ A thupiakte zawm zosia chu ama ah a um zing un, ama le amau ah chun a um zing hi. A Thagau ei piak ah hin ama chu eimau ah a um zing hi ti I hethei ui.