1 JOHAN 2 - PATHIAN LEKHABU THIANGTHO (BSI)

Jesu Ei Genpiakpa

¹ Ka chate haw, thil la hi’khial lona ding un zia thilte hi ka hun zik ahi. Ahi’n la, kua’n le thil a hi’khial chun, Pa kiang ah ei gen piak ding Jesu Khrista midik chu I nei ui.

² Ama chu I gitlonateu thupha choina ahi; eimau gitlona bep hilo in, khawvel pumpi gitlona thupha choina le ahi.

³ A thupiakte I zop ua chun ama chu I hiau hi ti zia chun I hethei ui.

⁴ A thupiakte zawm lo ah ama ka hia’i, tite chu mi juauthei a hi’n, thutak chule ama ah chun a um puai.

⁵ Himaleh, a thu zawm tapo chu, ama ah chun Pathian hepina chu a bukim hi. Zia chun ama ah I um uh chu I hethei ui.

⁶ Kuale ama ah ka um zing hi ti tapo chu, ama tawidan gual in a tawi ding ahi.

Thupiak Thak

⁷ Doitakte haw, thupiak thak la kiang un ka hun zik pua’n, thupiak lui, a lim ah kipat la neisau kha ka hun zik zaw ahi. Zia thupiak lui chu la hiatsau ahi.

⁸ Himaleh, thupiak thak le ka hun zik tho hi; zia chu ama leh nangmau ah kilang ta chu ahi; thim chu hung bei intin, vâk dik tak chu a hung vâk tangal a.

⁹ Kuale a suapi haw zing ngal ah, “Vâk ah um ka hi,” ti chu thim ah um zing nalai ahi.

¹⁰ Kuale a suapi hepi chu vâk ah um zing ahi; ama ah chun kipalpaina ding a um puai.

¹¹ Himaleh, kuale gingtu dang hua vang chu thim ah um in, thim ah khawsa’n, thim in a mit a sukthûm ziakin a chiana dingle a hepuai.

¹² Naute haw, ama min ziak ah, la gitlonateu ngaidam ahi tâk ziakin, la kiang un ka hun zik ahi.

¹³ Pate haw, ama a lim ah kipat um zing chu la het ziak un, la kiang un ka hun zik ahi. Tangvalte haw, migilo chu la zaw tâk ziak un, la kiang un ka hun zik ahi.

¹⁴ Naute haw, Pa chu la het tâk ziak un, la kiang un ka hun zik ahi. Pate haw, ama a lim ah kipat um zing chu, la het ziak un, la kiang un ka hun zik ahi. Tangvalte haw, nanghaw chu la hat un, Pathian thu nangmau ah a um zing ah, migilo chu la zaw tâk ziak un, la kiang un ka hun zik ahi.

¹⁵ Khawvel leh a sung ah thil umte haw hile thangai diak kiu in. Kua’n le khawvel a thangai chun, Pa hepina chu ama ah chun a um puai.

¹⁶ Khawvel ah thil um zosia, taksa nopnate, mit ah mu nopnate leh hausakna ki-uanpinate hi Pa ah kipat a hipua’n, khawvel ah kipat ahi zaw ngal a.

¹⁷ Chuleh, khawvel leh a nopnate hi a mangthai zing hi; himaleh, Pathian lung lam hi’te vang chu kumtuang in hing in a.

Khrista Dodâlte Kãl Ding ah Hilna

¹⁸ Chate haw, hun nunung chu ahi tai! Khrista dodâlte chu hung ding a hiu ti la hiatsa gual un, tu’hin Khrista dodâl tam tak a hung tau hi. Zia ah kipat hin hun nunung ahi, ti I hethei ui.

¹⁹ Amau chu I pawl ua kipat a pawtdok tau a; himaleh, I pawl ua pang ahi puau hi; I pawl ua mi hileu chu I lak un um zing ding ahi ngal un. Himaleh, I pawl ua mi a hi’lo dan uh kichetna dingin a pawtdok tau hi.

²⁰ Himaleh, nang uh vang, Mithiangtho chun sathau a nu’ la hitau a, hetna la nei chiat tau hi.

²¹ Thutak la het lo ziak ua ka hun zik a hipua’n, la het ziak uh leh thutak ah chun juau a um puai ti la het ziak un ka hun zik ahi zawi.

²² Jesu chu Khrista ahi ti gingcha lo khêl ah mi juauthei kua a hem um? Pa leh Chapa gingcha lo chu Khrista dodâl ahi.

²³ Kuale Chapa ging lo chun Pa chu a nei puai; Chapa ging taphot chun Pa le a nei hi.

²⁴ A lim ah kipat la het uh kha nangmau ah umsak zing un. A lim ah kipat la het uh chu nangmau ah a um zing chun, Chapa leh Pa ah um zing in lau.

²⁵ Ama’n ei tiam piak chu kumtuang hinna hi ahi.

²⁶ Nangmau hun pui mang gawte umdan chu la kiang un ka hun zik a hi.

²⁷ Nang uh vang, a sathau nu’na la chan uh chu nangmau ah a um zing ah, kuama zilsak la ngai ta puau hi. Ama sathau nu’na chun bangkim a hun hil ah, dik tak leh juau a hilo ziakin, zia chun a hun hil gual in ama ah um zing un.

²⁸ Tu’hin, chate haw, ama ah chun um zing tau in; tichun, ama hung kilâk phat leh, a ma-âng ah zakcha lo leh hangsan tak ah I umtheina ding un.

²⁹ Ama chu midik ahi ti la het ua leh, kuale dik tak ah thilhi tapo chu ama ah piang ahi ti hechian thei in lau.