Mattha 4 - Tha Fower Gospels ïn Ulstèr-Scots 2021

Jesus tempit bi tha Deil

¹ Then Jesus wus taen bi tha Spïrit ïntae tha wuldèrness fer tae be tempit bi tha Deil.

² Eftèr gaun wioot mait fer fowertie days an fowertie nichts, he wus gye hung'rie.

³ Tha tempter cum tae hïm an saed, “If ye ir tha Sinn o God, tell thaim thair stanes tae turn ïntae breid.”

⁴ Jesus saed bak tae hïm, “It ïs writ: ‘Man cannae leeve bi breid alane, but bi iverie wurd at cums frae tha mooth o God.’ ”

⁵ Then tha Deil tuk hïm tae tha halie cïtie an stud hïm up on tha verie tap o tha Hoose o God.

⁶ “If ye ir tha Sinn o God,” saed he, “throw yersel doon! Fer tha Guid Buik says: ‘He wull tell hïs angels tae luk eftèr ye, an wi thair hans the' wull haud ye up, fer fear ye dunt yer fit agin a stane.’ ”

⁷ Jesus saed bak tae hïm, “It's ïn tha Buik forbye: ‘Ye ir no tae temp tha Loard yer God.’ ”

⁸ An nixt thïng, tha Deil tuk hïm tae a bïg heich muntin an lut hïm see aa tha kïngdoms o tha warl ïn aa thair glorie.

⁹ “A wull gie ye aa thïs,” he saed, “ïf ye'll jist boo doon an woarship me.”

¹⁰ Jesus saed tae hïm, “Awa or that, Satan! Fer ït ïs writ doon: ‘Ye ir tae woarship tha Loard yer God an tae sarve naebodie but hïm.’ ”

¹¹ Then tha Deil lut hïm be, an angels cum an lukt eftèr hïm.

Tha stairt o Jesus' mïnistrie

¹² Noo whan Jesus heerd tha wittins that Jhone haed bin püt ïn jail, he went bak ïntae Galilee.

¹³ An eftèr leain Nazareth, he gaed tae Capernaum an he stapt thair. Capernaum wus bi tha Loch ïn tha dïstrict o Zebulun an Naphtali --

¹⁴ tae brïng aboot whut wus foretoul bi tha proaphit Isaiah:

¹⁵ “In tha lan o Zebulun an tha lan o Naphtali, on tha wye tae tha Loch, on tha ither side o tha Joardan, ïn Galilee whar tha Gentiles leeve -

¹⁶ tha fowk that sut ïn tha dairk hae saa a bricht licht; an on tha yins leevin ïn tha lan o tha shedda o deith, tha licht haes cum ïn.”

¹⁷ Frae then on Jesus begun tae praich, “Turn awa frae yer sïns, fer tha Kïngdom o Heiven haes cum nearhan ye.”

Jesus' furst follaers

¹⁸ Yin day, whan Jesus wus waakin alang tha loch shore o Galilee, he saa twa brithers, Simon caad Petèr an hïs brither Andra. The' wur castin a neyt ïntae tha wattèr, fer the' wrocht at tha fïshin.

¹⁹ “Cum an follae me,” Jesus saed, “an A wull mak ye fïshers o men.”

²⁰ An richt awa the' layed doon thair neyts an the' follaed eftèr hïm.

²¹ He gan on frae thair, an saen twa ither brithers, Jeames tha sinn o Zebedee an hïs brither Jhone. The' wur ïn a bóat wi thair faither Zebedee, mennin thair neyts. Jesus caad thaim,

²² an richt awa the' left tha bóat an thair faither, an the' follaed hïm.

Jesus maks aa kines o seeck fowk bettèr

²³ Jesus trevelt aa roon Galilee, taichin ïn thair Meetin Hooses, an praichin tha Guid Wittins o tha Kïngdom, an curin iverie disaise an ailment amang tha fowk.

²⁴ Wurd aboot hïm spreed aa ower Syria, an the' brocht tae hïm aa tha seeck fowk wi aa kines o disaises: thaim that wus tormentit, or bothert wi ïll spïrits, or tuk fïts, or fowk that wus paralysed, an he made thaim bettèr.

²⁵ Bïg croods follaed hïm frae Galilee, an tha Ten Toons, an Jerusalem, an Judea an tha dïstrict on tha ither side o tha rïver Joardan.