Mattha 28 - Tha Fower Gospels ïn Ulstèr-Scots 2021

Tha empie tomb

¹ It wus eftèr tha Sabbath, at daylicht on tha furst day o tha week, an Mary Magdalene an tha ither Mary cum tae luk at tha tomb.

² Aa o a suddent, thair wus a michtie irthquake, fer an angel o tha Loard cum doon frae heiven! He gaed tae tha tomb, an he rowlt bak tha stane an he sut on ït.

³ He wus bricht as lichtnin, an hïs claes wus white as snaa.

⁴ Whaniver the' saa hïm, tha gairds at tha tomb shuk wi fear an the' becum laik deid men.

⁵ But tha angel saed tae tha weemen, “Dïnnae be feart, fer A ken that ye'r lukkin fer Jesus, that wus crucyfied.

⁶ He's no here; he's ris, jist as he saed he wud. Cum an see tha place whar he wus layed oot.

⁷ Quïck! Gae an tell hïs follaers, ‘He haes ris frae tha deid an he's awa on aheid o ye ïntae Galilee. Ye'll see hïm thair.’ Noo mine whut A hae toul ye.”

⁸ Sae tha weemen hurriet frae tha tomb; the' wur afeart, yit fu o joy. The' run tae tell hïs follaers,

⁹ whan aa o a suddent Jesus appeart fornent thaim. “Fair faa ye!” saed he. An the' went tae hïm, tuk houl o hïs feet an wurshipt hïm.

¹⁰ Then Jesus saed tae thaim, “Dïnnae be feart. Gae an tell ma brithers tae gae ïntae Galilee, an the'll see me thair.”

Tha storie tha gairds püt roon

¹¹ While tha weemen wur on thair wye, some o tha gairds went ïntae tha cïtie an toul tha heid preeshts aa that haed cum aboot.

¹² An whaniver tha heid preeshts haed gethert thegither wi tha eldèrs, the' collogued amang thairsels, an the' gien tha sodgers a bïg amoont o siller,

¹³ an the' toul thaim, “Ye'r tae say, ‘Tha follaers o Jesus cum ïn tha nicht an stole hïm awa whan we wur sleepin.’

¹⁴ If tha Guviner hears tell o thïs, we'll taak hïm roon, an keep ye oot o bother.”

¹⁵ Sae tha sodgers tuk tha siller an daen as the' wur toul. An thïs storie haes gan roon amang tha Jews tae thïs verie day.

Jesus senns oot hïs follaers

¹⁶ Then tha eleiven follaers gaed tae Galilee, tae tha muntin whar Jesus haed toul thaim.

¹⁷ Whaniver the' saen hïm, the' wurshipt hïm; but some aye haed thair doots.

¹⁸ Then Jesus cum tae thaim an saed, “Aa thortie haes bin gien tae me ïn heiven an on irth.

¹⁹ Sae gang an mak follaers o aa nations, baptisin thaim ïn tha name o tha Faither an o tha Sinn an o tha Halie Spïrit,

²⁰ taichin thaim tae keep aa tha commauns A hae gien ye. An know thïs: A be wi ye iverie day, ay, tae tha verie enn o time.”