Mattha 24 - Tha Fower Gospels ïn Ulstèr-Scots 2021

Jesus foretells whut's aheid

¹ As Jesus wus waakin awa frae tha Temple gruns, hïs follaers cum up an saed tae hïm, “Wud ye jist luk at thaim biggins!”

² “Dae ye see aa these thïngs?” he axt thaim. “A'm tellin ye, no yin stane here wull be left abain tha ither; the'll aa be tummelt doon!”

³ An latèr on, as Jesus wus sïttin on tha Moont o Olives, tha follaers cum tae hïm on hïs lane. “Tell iz,” the' saed, “whan wull aa thïs cum aboot, an whut wull be tha sign o yer cumin, an o tha enn o tha age?”

⁴ Jesus saed bak tae thaim, “Tak heed an dïnnae let oniebodie lead yis aglee.

⁵ Fer monies a yin wull cum ïn ma name, sayin, ‘A be tha Christ’, an the'll lead monie fowk aglee.

⁶ Ye wull hear tell o wars an o taak aboot wars, but dïnnae be püt aboot. Fer sitch thïngs maun happen, but tha enn ïs no near jist yit.

⁷ Nations wull mak war on ither nations, an kïngdoms wull rise up agin ither kïngdoms. Thair wull be dirths, [plagues] an irthquakes ïn monie pairts.

⁸ Aa thïs ïs onlie tha stairt o tha bairin pains cumin on.

⁹ Then ye'll be hannit ower tae be persecutit an püt tae deith, an ye'll be haitit bi aa nations jist fer bein ma follaers.

¹⁰ At that time a hale lock o fowk wull turn awa frae tha faith, an the'll bethray an hait yin anither.

¹¹ A hale lock o fauss proaphits wull rise up an lead monies a yin asthray;

¹² an acause wïckitness wull be on tha up, tha love o maist fowk wull growe coul,

¹³ but tha yin that tholes tae tha enn wull be saved.

¹⁴ An tha Guid News o tha Kïngdom wull be praicht ïn tha hale warl as a wutness tae aa tha nations, an then tha enn wull cum.

¹⁵ Sae whaniver ye see ‘tha abomination o desolation’ stannin ïn tha halie place - tha abomination tha proaphit Daniel spauk aboot,” (Reader, ye'll unnèrstan ma mainin here)

¹⁶ “then thaim at's ïn Judea maun tak tae tha hïlls.

¹⁷ Naebodie that's on hïs ruiftap shud gae doon tae tak oniethin oot o tha hoose.

¹⁸ An naebodie that's awa oot ïn hïs fiel shud be gaun bak fer hïs cóat.

¹⁹ In thaim days ït'll be tarrible fer weemen that's expectin, an fer mithers wi weans at tha breesht!

²⁰ Pray tae God that ye dïnnae hae tae flee ïn tha wuntèr or on tha Sabbath.

²¹ Fer then thair'll be sitch despert sufferin - faur waur ner thair iver wus frae tha stairt o tha warl til noo - an tha laik o thïs'll niver be saen agane.

²² If thaim days wurnae shoartent, thair wud be naebodie left; but fer tha sake o tha chosen yins, thaim days wull be shoartent.

²³ At that time ïf oniebodie says tae ye, ‘Luk, here ïs tha Messiah!’ or, ‘Thair he ïs!’ dïnnae tak onie heed.

²⁴ Fer fauss messiahs an fauss proaphits wull rise up an dae michtie signs an wunnèrs; an fowk wull be tuk ïn bi thaim, ay, an ïf the'r able, the' wull fool even tha chosen yins as weel.

²⁵ Luk, A hae toul ye aforehan, sae as ye'll know.

²⁶ Sae then ïf oniebodie tells ye, ‘Thair he ïs, oot ïn tha wuldèrness,’ dïnnae gae oot; or, ‘He's hidin here ïn tha hoose,’ dïnnae believe ït.

²⁷ Fer jist as tha lichtnin fleshes ower tha lïft, frae tha East tae tha Wast, that's whut tha cumin o tha Sinn o Man wull be laik.

²⁸ Whariver ye see a crood o vultèrs, ye know thair's a deid bodie thair.

²⁹ Al at yinst eftèr tha sufferin o thaim days, ‘tha sin wull be dairkint, tha muin wull no gie onie licht; tha starns wull faa frae tha heivens, an tha pooers o tha lïft wull be dinnelt.’

Tha cumin o tha Sinn o Man

³⁰ An then, tha sign o tha Sinn o Man wull appear ïn tha heivens abain, an aa tha nations o tha irth wull murn. The'll see tha Sinn o Man cumin on tha cloods o heiven, wi pooer an muckle glorie.

³¹ He'll senn hïs angels oot wi a lood caa o tha trumpet, an the'll gether hïs chosen yins frae tha fower wuns, frae tha yin enn o heiven tae tha tither.

³² Noo, lairn thïs lesson frae tha fïg tree. As shuin as ïts brenches stairts tae bud, an ïts leafs cum oot, ye ken tha simmer ïs no faur aff.

³³ In tha same wye, whaniver ye see aa these thïngs, ye'll ken tha time ïs nearhan, ay, richt at tha verie dure.

³⁴ A tell ye tha truith, thair's fowks leevin noo that'll no dee, afore aa these thïngs haes cum aboot!

³⁵ Heiven an irth wull pass awa, but ma wurds wull niver pass awa.

³⁶ Hooaniver, naebodie knows tha day an tha oor o aa thïs, no even tha angels ïn heiven, ner tha Sinn; tha Faither alane kens ït.

³⁷ Whaniver tha Sinn o Man cums bak, ït'll be jist laik ït wus ïn Noah's day.

³⁸ Fer ïn tha days afore tha Flood, fowk wus aitin an drïnkin an gettin merriet, richt up tae tha verie day Noah went ïntae tha airk;

³⁹ an the' kent naethin aboot whut wud happen, til tha Flood cum an tuk thaim al awa. An that's whut ït'll be laik, whaniver tha Sinn o Man cums bak.

⁴⁰ Twa men wull be at wark ïn tha fiel; yin wull be tuk an tha ither left behin.

⁴¹ Twa weemen wull be grindin mail; yin wull be tuk an tha ither left behin.

⁴² Sae yous keep watchin tae, fer yis dïnnae ken whut day yer Loard's cumin.

⁴³ Ye can be shair o thïs: ïf ye haed a hoose, an ye knowed whut oor o tha nicht a thief wus cumin, ye'd be watchin fer hïm, wud ye no? An ye wudnae alloo yer hoose tae be brauk ïntae.

⁴⁴ Sae yous maun be readie tae, fer ye dïnnae ken tha oor tha Sinn o Man wull cum.

⁴⁵ Wha ïs a sarvint ye'd caa faithfu an wise? Is ït no tha yin that tha maistèr haes püt ïn chairge o tha ither sarvints ïn hïs hoose, tae gie thaim thair fair share o mait at tha richt time?

⁴⁶ Whaniver hïs maistèr cums bak, onie sarvint ectin laik thïs wull be a happie man.

⁴⁷ A tell ye tha truith, he'll pit that sarvint ïn chairge o iveriethin he haes.

⁴⁸ But jist say that sarvint ïs wïckit an says tae hissel, ‘He's a lang time o cumin, tha maistèr,’

⁴⁹ an he stairts tae bate up hïs fella sarvints an tae ait an collogue wi thaim that's fand o tha drïnk;

⁵⁰ Weel, tha maistèr o that sarvint wull cum bak on a day an oor whan tha sarvint ïsnae lukkin oot fer hïm.

⁵¹ An tha maistèr wull dae awa wi hïm an pit hïm alang wi tha hippycrates; ye can be shair that whar they wull be, thair'll be greetin an scringein o teeth!”